I Mani Loyi A Endleke Xikwembu?

Anakanya hi tatana a ri karhi a vulavula ni n’wana wa yena wa mufana la nga ni malembe ya nkombo. U ri: “Khale ka khaleni Xikwembu xi tumbuluxe misava ni hinkwaswo leswi nga eka yona, dyambu, n’weti ni tinyeleti.” Hiloko n’wana yoloye a anakanyisisa hi mhaka yoleyo swa xinkarhana ivi a ku: “Papa, i mani loyi a endleke Xikwembu?”

Tatana a n’wi hlamula a ku: “A ku na loyi a endleke Xikwembu, i khale xi ri kona.” Nhlamuselo yoleyo yo olova yi endle leswaku n’wana yoloye a eneriseka swa xinkarhana. Loko a ri karhi a kula, xivutiso lexi xi hambeta xi n’wi karhata. Swa n’wi tikela ku twisisa leswaku swi tisa ku yini leswaku Xikwembu xi nga ri na masungulo hikuva hambi ku ri vuako hinkwabyo byi ni masungulo. Wa tivutisa a ku: “Xikwembu xi huma kwihi?”

Bibele yi ri yini? Yi hlamula hilaha tatana a hlamuleke n’wana wakwe hakona. Muxe u tsale a ku: “Oho Yehovha, . . . tintshava ti nga si velekiwa, kumbexana u humese misava ni tiko leri noneke, u Xikwembu ku suka enkarhini lowu nga riki na makumu ku ya enkarhini lowu nga riki na makumu.” (Pisalema 90:1, 2) Hilaha ku fanaka, muprofeta Esaya u te: “Xana a wu si swi tiva kumbe ku swi twa? Yehovha, Mutumbuluxi wa vugima-musi bya misava, i Xikwembu hilaha ku nga riki na makumu.” (Esaya 40:28) Hilaha ku fanaka papila ra Yudha ri vula leswaku Xikwembu xi ve kona “ku sukela khale koloko.”—Yudha 25.

Matsalwa wolawo ma hi kombisa leswaku Xikwembu i “Hosi leyi nga riki na makumu,” hilaha muapostola Pawulo a xi hlamuselaka hakona.(1 Timotiya 1:17) Leswi swi vula leswaku Xikwembu i khale xi ri kona ku nga khathariseki leswaku hi tlherisela malembe endzhaku ku fikela kwihi. Xi ta tshama xi ri kona hilaha ku nga heriki. (Nhlavutelo 1:8) Xisweswo hi yona mhaka leyi xi vuriwaka Lowa Matimba Hinkwawo hikwalaho ka leswi xi tshamaka hi masiku.

Ha yini swi hi tikela ku twisisa mhaka leyi? Leswi hi hanyaka nkarhi wo koma swi endla hi nga swi twisisi leswaku Yehovha u ni nkarhi wo tanihi kwihi a ri kona. Leswi Xikwembu xi nga xa hilaha ku nga heriki, eka xona malembe ya gidi ma fana ni siku. (2 Petro 3:8) Hi xikombiso: Xana swi nga koteka leswaku njiya leyi ngo hanya kwalomu ka masiku ya 50 ntsena, yi twisisa vutomi bya hina vanhu bya malembe 70 kumbe 80. Nikatsongo! Kambe, Bibele yi hlamusela leswaku hina hi fana ni tinjiya toleto loko hi ringanisiwa ni Muvumbi wa hina Lonkulu. Hambi ku ri vuswikoti bya hina byo anakanya a hi nchumu loko byi pimanisiwa ni bya xona. (Esaya 40:22; 55:8, 9) Hikwalaho, a swi hlamarisi leswi ku nga ni swilo swin’wana leswi hi nga swi twisisiki hiku helela malunghana na Yehovha.

Hambileswi swi nga tikaka ku twisisa mhaka ya leswaku Xikwembu i xa hilaha ku nga heriki, hi nga swi xiya leswaku mhaka leyi ya twala. Loko ku ri ni loyi a tumbuluxeke Xikwembu, munhu yoloye u fanele a ri Muvumbi. Bibele yi vula leswaku Yehovha u “tumbuluxe swilo hinkwaswo.” (Nhlavutelo 4:11) Ku tlula kwalaho, ha swi tiva leswaku eku sunguleni vuako hinkwabyo a byi nga ri kona. (Genesa 1:1, 2) Xana byi huma kwihi? Ku fanele ku ri ni Muvumbi loyi a byi endleke. Nakambe u ve kona swivumbiwa leswin’wana swo tlhariha swi nga si tumbuluxiwa, swo tanihi N’wana wakwe loyi a tswariweke a ri swakwe ni tintsumi. (Yobo 38:4, 7; Vakolosa 1:15) Swi le rivaleni leswaku eku sunguleni hi yena ntsena a a ri kona. Hikwalaho hi yena a tumbuluxeke; a ku nga ri na nchumu lexi a xi ri kona lexi a xi ta n’wi tumbuluxa.

Vukona bya hina ni vuako hinkwabyo swi kombisa leswaku ku ni Xikwembu xa hilaha ku nga heriki. Xikwembu lexi ku nga khale xi ri kona, xi endle leswaku vuako hinkwabyo byi tirha kahle ni nkongomiso wa byona. Endzhaku ka sweswo xi tumbuluxe swilo hinkwaswo leswi hanyaka.—Yobo 33:4.