A Hi Tsakeni Swin’we!
SWI ya swi tika swinene ku va vanhu va tsaka. Vanhu vo tala swa va tikela ku ehleketa hi timhaka to tsakisa leti va nga ti byelaka van’wana. Naswona vutomi bya manguva lawa, ngopfu-ngopfu emadorobeni lamakulu, byi endla leswaku vanhu va va nconge-yin’we kutani va va ni xivundza.
Alberto Oliverio, Profesa wa Vuvabyi bya Mianakanyo, u te: “Xivundza i tshamelo-maxelo namuntlha. A swi kanakanisi leswaku vutomi bya le madorobeni lamakulu byi endla leswaku vanhu va titwa va ri nconge-yin’we kumbe va ri ni xivundza. Minkarhi yo tala xivundza xi hi endla hi nga vi na mhaka ni mutirhi-kulorhi, muakelani kumbe munhu loyi a tirhaka ku ba muchini exitolo xa swakudya lexi nga laha hi tshamaka kona.” Xivundza xexo hakanyingi xi vanga ntshikilelo wa mianakanyo.
Hambiswiritano, langutelo ra Vakreste-kulorhi a ri tano. Muapostola Pawulo u te: “Tsakani minkarhi hinkwayo.” (1 Tes. 5:16) Hi ni swivangelo swo tala leswi hi endlaka hi tsaka ni ku khana. Hi gandzela Yehovha, Xikwembu lexi Tlakukeke; hi twisisa tidyondzo ta ntiyiso leti nga eBibeleni; hi ni ntshembo wo hanya hilaha ku nga heriki; naswona hi nga pfuna van’wana leswaku va kuma mikateko leyi fanaka.—Ps. 106:4, 5; Yer. 15:16; Rhom. 12:12.
Vakreste va ntiyiso va tsaka naswona va byelana timhaka leti tsakisaka ni Vakreste-kulobye. Kutani a swi hlamarisi leswi Pawulo a tsaleleke Vafilipiya a ku: “Ndza tsaka ni ku khana swin’we na n’wina hinkwenu. Kutani hi ndlela leyi fanaka na n’wina tsakani ni ku khana swin’we na mina.” (Filp. 2:17, 18) Eka tindzimana letimbirhi, Pawulo u vulavule kambirhi hi ku tsaka ni ku khana ni van’wana.
Hambiswiritano, Vakreste va fanele va tivonela leswaku va nga vi nconge-yin’we. Munhu loyi a tihambanisaka ni vapfumeri-kulobye a nge swi koti ku tsaka na vona evandlheni. Kutani, hi nga xi yingisa njhani xikhutazo xa Pawulo xa leswaku hi ‘hambeta hi tsaka eHosini’ ni vamakwerhu?—Filp. 3:1.
Tsaka Ni Vapfumeri-kuloni
Loko Pawulo a tsalela Vafilipiya papila, swi nga ha endleka leswaku a a khotsiwe eRhoma hikwalaho ka ntirho wakwe wo chumayela. (Filp. 1:7; 4:22) Kambe a nga swi pfumelelanga leswaku ku khotsiwa kakwe ku n’wi endla a nga byi hisekeli vutirheli byakwe. Ematshan’weni ya sweswo, u khanile hileswi a koteke ku tirhela Yehovha hilaha a nga kotaka hakona ni ku “chuluriwa ku fana ni gandzelo ra swakunwa.” (Filp. 2:17) Langutelo ra Pawulo ri kombisa leswaku ku va munhu a tsaka a swi titsheganga hi swiyimo leswi a nga ehansi ka swona. Hambileswi Pawulo a a khotsiwile, u te: “Ndzi ta hambeta ndzi tsaka.”—Filp. 1:18.
Pawulo u simeke vandlha eFilipiya naswona a a va rhandza ngopfu vamakwerhu va le vandlheni rero. A a swi tiva leswaku ku va byela mintokoto leyi tsakisaka leyi a yi kumeke entirhweni wa Yehovha a swi ta va khutaza. Hikwalaho, u te: “Kutani ndzi navela leswaku mi tiva, vamakwerhu, leswaku timhaka ta mina a ti endlanga swin’wana handle ka leswaku mahungu lamanene ma ya emahlweni, lerova timpecana ta mina ti tiviwa erivaleni hi ku fambisana na Kreste exikarhi ka Varindzi hinkwavo va Mufumi-nkulu ni lavan’wana hinkwavo.” (Filp. 1:12, 13) Ku va Pawulo a byele Vafilipiya ntokoto lowu lowu khutazaka a ku ri ndlela yin’wana leyi a a tsaka ha yona ni ku khana ni vamakwavo. Hilaha ku fanaka, Vafilipiya va fanele va tsake na Pawulo. Hambiswiritano, sweswo a swi lava leswaku va nga heli matimba hikwalaho ka leswi Pawulo a a langutana na swona. Ematshan’weni ya sweswo, a va fanele va tekelela xikombiso xakwe. (Filp. 1:14; 3:17) Ku engetela kwalaho, Vafilipiya a va ta pfuna Pawulo hi ku n’wi khongelela ni ku n’wi nyika xin’wana ni xin’wana lexi a xi lavaka.—Filp. 1:19; 4:14-16.
Xana hi ni langutelo leri fanaka ni ra Pawulo? Xana hi ringeta ku ehleketa hi swilo leswinene leswi endlekeke evuton’wini bya hina ni le nsin’wini? Loko hi ri ni vamakwerhu, i swinene ku va byela hi mintokoto yo tsakisa leyi hi veke na yona ensin’wini. A hi fanelanga hi va byela ntsena mintokoto yo hlawuleka leyi hi veke na yona. Hi nga ha va byela loko hi kume munhu loyi a yingiseke rungula ra Mfumo hileswi hi tirhiseke xingheniso lexinene kumbe hileswi hi tirhiseke ndlela yo karhi yo kombisana na yena hi mhaka yo karhi. Hi nga ha va byela loko hi ve ni bulo ro tsakisa ni n’wini wa muti malunghana ni ndzimana yo karhi ya Bibele. Kumbe hi nga ha va byela leswaku siku rin’wana loko hi ri ensin’wini, vanhu va swi xiyile leswaku hi Timbhoni ta Yehovha kutani sweswo swi ri swoxe swi ve vumbhoni lebyinene eka vona. Ku byela van’wana hi mintokoto yo tano i ndlela yo tsaka na vona.
Vanhu vo tala va Yehovha va titsone swilo swo tala naswona va ha titsona ninamuntlha leswaku va chumayela mahungu lamanene. Maphayona, valanguteri va miganga ni va swifundzha, vatirhi va le Bethele, varhumiwa ni vamakwerhu lava tirhaka ku aka ematikweni man’wana va tirha hi matimba va tsakile entirhweni wa vona wa nkarhi hinkwawo. Xana hi tsaka na vona? Hi nga kombisa leswaku ha wu tlangela ntirho wa vona nileswaku hi tsaka na vona leswi va nga “vatirhi-kulorhi emfun’weni wa Xikwembu.” (Kol. 4:11) Sweswo hi nga swi kombisa hi ku va khutaza loko hi ri na vona eminhlanganweni ya vandlha kumbe etinhlengeletanweni. Nakambe hi nga tekelela xikombiso xa vona. Hi nga tlhela hi tixavela “nkarhi” wo yingisela mintokoto ya vona ni timhaka leti khutazaka hi ku va komba malwandla, kumbexana hi va rhambela emakaya ya hina leswaku hi ta dya swakudya na vona.—Filp. 4:10.
Tsaka Ni Lava Langutanaka Ni Miringo
Ku va Pawulo a kote ku tiyiselela nxaniso ni ku hlula miringo swi n’wi pfune leswaku a tiyimisela swinene ku tshama a tshembekile eka Yehovha. (Kol. 1:24; Yak. 1:2, 3) A a swi tiva leswaku vamakwavo eFilipiya swi nga ha endleka a va ta langutana ni miringo leyi fanaka. Kutani swi n’wi tsakisile ku tiva leswaku loko o tiyisela miringo, a a ta va khutaza leswaku na vona va tiyisela. Hikwalaho u tsale a ku: “N’wina mi nyikiwe lunghelo hikwalaho ka Kreste, ku nga ri ro veka ripfumelo ra n’wina eka yena ntsena, kambe ni ku xaniseka hikwalaho ka yena. Hikuva mi ni nyimpi yo fana ni leyi mi yi voneke malunghana na mina ni yo fana ni leyi mi twaka ha yona sweswi malunghana na mina.”—Filp. 1:29, 30.
Ninamuntlha Vakreste va kanetiwa hikwalaho ka ntirho wa vona wo chumayela. Minkarhi yin’wana va kanetiwa hi ndlela ya tihanyi kambe hakanyingi va kanetiwa hi tindlela leti tumbeleke. Hi xikombiso, vagwinehi va nga ha va hehla hi swihehlo swa mavunwa, va nga ha vengiwa hi swirho swa mindyangu ya vona ni ku hlekuriwa hi vatirhi-kulobye kumbe vadyondzi-kulobye. Yesu u vule leswaku miringo leyi a yi fanelanga yi hi hlamarisa kumbe yi hi heta matimba. Ematshan’weni ya sweswo, yi fanele yi hi tsakisa. U te: “Ma tsaka n’wina loko vanhu va mi rhukana ni ku mi xanisa ni ku mi hembela hi swilo hinkwaswo swo homboloka hikwalaho ka mina. Tsakani mi khana, hikuva hakelo ya n’wina i yikulu ematilweni.”—Mat. 5:11, 12.
A hi fanelanga hi khomiwa hi rhumbyana loko hi twa leswaku vamakwerhu va xanisiwa hi ndlela ya tihanyi ematikweni man’wana. Kambe, hi fanele hi tsaka hikwalaho ka leswi va tiyiselaka. Hi nga khongela eka Yehovha hi kombela leswaku a tiyisa ripfumelo ra vona ni ku va pfuna va tiyisela nxaniso wolowo. (Filp. 1:3, 4) Tanihi leswi swi nga riki kona swilo swin’wana leswi hi nga va endlelaka swona vamakwerhu volavo lava rhandzekaka, hi nga pfuna vamakwerhu lava nga emavandlheni ya hina lava langutanaka ni miringo. Hi nga kombisa hi swiendlo leswaku ha khathala ha vona. Minkarhi yin’wana hi nga hlela minkarhi yo tsaka na vona hi ku va rhambela eka Vugandzeri bya hina bya Ndyangu bya nimadyambu, hi ku famba na vona entirhweni wo chumayela ni ku tihungasa na vona.
Hi ni swivangelo swo tala swo tsaka swin’we ni vamakwerhu. Kutani a hi papalateni moya wa misava leyi wa ku va nconge-yin’we kutani hi hambeta hi tsaka ni vamakwerhu. Loko hi endla tano, a hi nge endli leswaku vandlha ri va ni rirhandzu ni vun’we ntsena kambe hi ta tlhela hi tiphina hi ku helela hi xinakulobye xa Vukreste. (Filp. 2:1, 2) Pawulo u hi khutaze a ku: “Nkarhi hinkwawo tsakani eHosini. Nakambe ndzi ri, Tsakani!”—Filp. 4:4.
[Laha Xifaniso Xi Humaka Kona eka tluka 6]
Globe: Courtesy of Replogle Globes