Swivutiso Swa Vahlayi

Ndzi fanele ndzi endla yini loko ndzi ri ni xivutiso malunghana ni mhaka yo karhi leyi ndzi yi hlayeke eBibeleni kumbe loko ndzi lava xitsundzuxo malunghana ni xiphiqo lexi ndzi nga na xona?

Swivuriso 2:1-5 yi hi khutaza hinkwerhu leswaku hi ‘hambeta hi lava’ ku twisisa onge hiloko hi ri eku lavisiseni ka “xuma lexi fihliweke.” Leswi swi vula leswaku hi fanele hi tikarhata swinene loko hi lava tinhlamulo ta swivutiso swa hina swa le Bibeleni ni ntlhantlho wa swiphiqo swa hina. Hi nga swi endlisa ku yini leswi?

Buku leyi nge Vuyeriwa Eka Vuleteri Bya Xikolo Xa Vutirheli Bya Le Tilweni, eka matluka 33-38, yi tlhuvutsa nhloko-mhaka leyi nge “Ndlela Yo Endla Vulavisisi” hi ku tirhisa switirhisiwa leswi lunghiseleriweke hi “hlonga ro tshembeka ni ro tlhariha.” (Mat. 24:45) Tluka 36 ri hlamusela ndlela yo tirhisa buku leyi nge Watch Tower Publications Index, leyi avanyisiweke hi xikombo xa tinhloko-mhaka ni xa tindzimana. Maendlelo lawa ma pfuna leswaku u kota ku lava rungula hi ku tirhisa rito leri yimelaka mhaka yo karhi kumbe ndzimana ya Bibele, xisweswo u ta kuma nxaxamelo wa swikombo leswi u nga swi kambaka. Lehisa mbilu loko u lava nhlamulo kumbe nkongomiso wo karhi. Tsundzuka leswaku u lavisisa “xuma lexi fihliweke,” lexi swi lavaka nkarhi ni matshalatshala leswaku u xi kuma.

I ntiyiso leswaku ku ni tinhloko-mhaka ni matsalwa man’wana lawa minkandziyiso ya hina yi nga si tshamaka yi vulavula ha wona. Naswona hambiloko yi tshame yi vulavula hi ndzimana yo karhi ya le Bibeleni, swi nga ha endleka yi nga vulavulanga ha yona hi xikongomelo xo hlamula xivutiso lexi u nga na xona. Nakambe timhaka tin’wana ta le Bibeleni ti pfuxa swivutiso hileswi ku nga hlamuseriwangiki vuxokoxoko hinkwabyo eMatsalweni. Xisweswo, a hi nge ti kumi tinhlamulo ta xivutiso xin’wana ni xin’wana lexi hi nga vaka na xona hi nkarhi wolowo. Kutani loko swi ri tano, hi fanele hi papalata ku mbambela malunghana ni swilo leswi nga ta ka swi nga hlamuleki hikuva loko hi mbambela hi nga sungula ku phikizana hi “swivutiso leswi lavaka ndzavisiso ku nga ri ku ava nchumu wo karhi lowu humaka eka Xikwembu mayelana ni ripfumelo.” (1 Tim. 1:4; 2 Tim. 2:23; Tito 3:9) Rhavi kumbe yindlu-nkulu ya hina a swi nge swi koti ku kambisisa ni ku hlamula swivutiso hinkwaswo swo tano leswi ku nga siki vulavuriwaka ha swona eminkandziyisweni ya hina. Hi nga tiyiseka leswaku Bibele yi nyikela rungula leri ringaneke leswaku yi hi kongomisa evuton’wini. Kambe timhaka leti hi nga ti twisisiki ti endla leswaku hi kombisa leswaku ha xi tshemba swinene Xikwembu ni Rito ra xona.—Hlaya matluka 185-187 ya buku leyi nge Tshinela Eka Yehovha.

U fanele u endla yini loko se u endle hinkwaswo leswi u nga swi kotaka leswaku u lavisisa mhaka leyi ku khumbaka wena n’wini kambe a wu si wu kuma nkongomiso kumbe ntlhantlho lowu u wu lavaka? U nga ya eka mupfumeri-kuloni loyi a wupfeke, kumbexana eka un’wana wa vakulu evandlheni ra ka n’wina. Va yi tiva kahle Bibele naswona va ni ntokoto malunghana ni mahanyelo ya Vukreste. Mpfuno wa vona wu nga ku vuyerisa ngopfu-ngopfu loko u lava xitsundzuxo hi xiphiqo lexi u nga na xona kumbe xiboho lexi u lavaka ku xi teka, hikuva va ku tiva naswona va tiva ni swiyimo swa wena. Nakambe u nga rivali ku khongela hi ku kongoma eka Yehovha hi swikarhato swa wena ni ku n’wi kombela leswaku a kongomisa mianakanyo ya wena hi moya wakwe lowo kwetsima “hikuva Yehovha u nyika vutlhari . . . ni ku twisisa.”—Swiv. 2:6; Luka 11:13.