Bokisi Ra Swivutiso

◼ Xana hi nga ba riqingho ri ya eka Sosayiti leswaku hi kuma tinhlamulo ta swivutiso swa Bibele kumbe loko hi lava ku pfuniwa hi swin’wana?

Vanhu vo tala va tirhisa riqingho leswaku va endla swilo hi ku hatlisa, kambe hakanyingi a swi vangiwi hi ku lava ku hatlisa ntsena. Emisaveni swi tolovelekile ku lava ku rhangisa swilo leswi pfunaka wena; vanhu a va swi lavi ku tikarhata.

Vona ku hambana loku nga kona loko hi languta xitsundzuxo xa Xikwembu! Xi hi byela leswaku hi lava vutivi ku kotisa rifuwo leri fihliweke, leswi swi lavaka leswaku hi tikarhata. Ntokoto wu komba leswaku loko hi endla sweswo swi hi enerisa hi laha ku nga heriki.—Swiv. 2:1-4.

Matshalatshala yo tano i manene loko xivutiso xi tlakuka hi nkarhi lowu hi lunghiselelaka nkulumo ya minhlangano kumbe loko hi langutane ni xiphiqo xa hina vini. Ematshan’wini yo bela Sosayiti riqingho, hi ta pfuneka loko hi tiendlela nkambisiso eBibeleni ni le tibukwini ta hina, ngopfu-ngopfu eka Watch Tower Publications Index, hi mhaka ya Matsalwa ni swikombo swa yona swa tinhloko-mhaka leswi nga swa nkoka.

Endzhaku ka loko se hi ‘lavisise rifuwo leri fihliweke’ hi ndlela yoleyo, hi nga ha ya eka un’wana wa vakulu va vandlha loko ha ha lava ku pfuniwa. Vakulu va ni vutivi lebyikulu bya Bibele ni ntokoto wa ku lavisisa rungula. Mpfuno wa vona wo ringanisela wu ta faneleka swinene loko hi lava ku pfuniwa eka xiphiqo xa hina kumbe xiboho lexi hi xi endlaka, hikuva va hi toloverile ni xiyimo xa hina va xi toloverile.—Ringanisa Mintirho 8:30, 31.

Loko ka ha laveka rungula rin’wana leri humaka eka Sosayiti, hakanyingi swa antswa ku rhumela papila. Vakulu na vona va nga pfuna eku ri tsaleni. Papila leri ri ta nyika nkarhi wo hlamula hi ndzavisiso lowu eneleke kumbe ku kambisisa, leswi hakanyingi swi nga kotekiki ku endliwa hi riqingho.