Ntshovelo Lowukulu!

YESU u profete leswaku valandzeri vakwe a va ta tiphina hi ntshovelo lowukulu enkarhini lowu wa makumu. (Mat. 9:37; 24:14) Xiya ndlela leyi marito yakwe ma hetisekeke ha yona hi ndlela leyi hlamarisaka eTranscarpathia le Ukraine. Eka madoroba manharhu ntsena lama nga ekusuhi ni kwalaho, ku ni mavandlha ya 50 lama nga ni vahuweleri vo tlula 5 400.a Entiyisweni, un’we eka vaaki va mune va madoroba wolawo manharhu, i Mbhoni ya Yehovha!

Xana yi njhani nsimu leyi va chumayelaka eka yona? Makwerhu la vuriwaka Vasile, u ri: “Vanhu va kona va xixima Bibele, va rhandza vululami, va rhandza mindyangu ya vona naswona va rhandza ku pfuna van’wana.” U engeta a ku: “A hi mikarhi hinkwayo va pfumelelanaka ni leswi hi swi dyondzisaka. Kambe va rhiya ndleve loko u va komba leswi humaka eBibeleni.”

Vamakwerhu va kwalaho va langutana ni ntlhontlho lowu nga tolovelekangiki hileswi ku nga ni vanhu vatsongo lava va faneleke va va chumayela. Hi xikombiso, vandlha rin’wana ri ni vahuweleri va 134 kambe nsimu ya vona yi ni 50 wa tindlu ntsena! Xana vahuweleri lava va langutana njhani ni xiyimo lexi?

Vamakwerhu vo tala va tinyiketela leswaku va ya tirha laha ku nga ni xilaveko lexikulu. Makwerhu la nga ni malembe ya 90, la vuriwaka Ionash, u ri: “Hi xiringaniso, muhuweleri un’we evandlheni ra hina u fanele a chumayela eka miti yimbirhi. Loko ndzi nga si vabya, a ndzi chumayela emakaya, naswona a ndzi tlhela ndzi ya eka nsimu leyi nga aviwangiki leyi nga eka mpfhuka wa tikhilomitara ta 160 laha a ndzi chumayela vanhu lava vulavulaka ririmi ra Xihungari.” Vahuweleri va fanele va titsona swo karhi leswaku va kota ku ya pfuna ensin’wini yin’wana. Ionash, u engeta a ku: “A ndzi pfuka hi 4:00 nimixo leswaku ndzi ya khandziya xitimela naswona a ndzi chumayela kukondza ku va 6:00 nimadyambu loko xitimela xi vuya. A ndzi endla sweswo kambirhi kumbe kanharhu evhikini.” Xana matshalatshala yakwe ma ve ni vuyelo lebyinene? U ri: “A swi ndzi tsakisa ku tirha nsimu yoleyo. Ndzi ve ni nkateko wo pfuna ndyangu lowu tshamaka ekule leswaku wu dyondza ntiyiso.”

Swa twisiseka leswaku a hi hinkwavo emavandlheni ya le ndhawini yoleyo lava kotaka ku ya tirha ensin’wini ya le kule. Kambe vahuweleri hinkwavo, ku katsa ni lava kuleke va tikarhatela ku hlanganisa nsimu ya vona hi rixaladza. Hikwalaho, hi 2017, nhlayo ya vanhu lava veke kona exitsundzuxweni, eka madoroba wolawo manharhu loko yi hlanganile yi phindhe nhlayo ya vahuweleri va kwalaho kambirhi kumbe a ku ri hafu ya vaaki va madoroba wolawo manharhu. A swi kanakanisi leswaku kun’wana ni kun’wana laha hi tirhelaka kona ku ni “swo tala swo swi endla entirhweni wa Hosi.”—1 Kor. 15:58.