Ku Aka Vuxaka Lebyikulu Bya Ndyangu

1 Tanihi leswi ku nga ni swilaveko swo tala ehenhleni ka nkarhi wa vona, vatswari va langutana ni mphikamakaneta eku akeni ka ndyangu lowu tiyeke evugandzerini bya ntiyiso. Mindyangu ya Vukriste yi lava xiboho lexikulu lexi nyikelaka nseketelo eminkarhini ya sweswi leyi nonon’hwaka. (Ekl. 4:9-12; 2 Tim. 3:1-5) Loko vumoya byi kula, ndyangu wu va lowu hlanganeke swinene naswona wu ta tiyisiwa leswaku wu lwisana ni minhlaselo ya Sathana ni mafambiselo ya yena.

KU AKA TIMFANELO TA MOYA

2 Minhlangano ya bandlha ni dyondzo ya ndyangu ya Bibele i swilo swa nkoka exiyimisweni xa ndyangu xa vhiki na vhiki. (Deut. 6:6, 7; Vahev. 10:23-25; wTS86 11/1 matl. 23-25) Kambe ku laveka leswi engetelekeke. Ka ha ri na xivandla lexi pfulekeke loko leyi yi ri dyondzo hinkwayo ya moya leyi vana va yi kumaka.

3 Vuxaka lebyinene bya ndyangu bya kula loko vatswari va khathalela swinene vuhlayiseki bya moya bya vana. Le Israyele, vatswari a va ri ni vutihlamuleri bya ku dyondzisa ni ku letela vana va vona, va va toloveta hi rito na xikombiso. Nongonoko wa Muisrayele wa dyondzo a wu katsa vuleteri lebyi tirhaka eka lavakulu lava hanyaka, ku dyondzisa vutshila bya ku hlaya ni ku tsala ka xisekelo ni ku toloveta ku kurisa timfanelo ta moya. Eku dyondziseni ka vana, a ku kandziyisiwa ku va dyondzisa ku chava Yehova, Nawu, ku xixima vatswari ni vanhu lava dyuhaleke ni nkoka wa ku yingisa.

4 Lwela ku heta nkarhi lowu nga ni ntikelo ni ndyangu wa wena siku na siku. Timhaka ta moya ti nga hlamuseriwa hi matshamelo ya xitshuketa, yo tanihi minkarhi ya swakudya. Mutswari un’wana u xiyile hi vutlhari a ku: “Vatswari va ta heta nkarhi ni vana va vona—eku kuriseni timfanelo ta moya kumbe eku va pfuneni leswaku va huma eswiphiqweni hi ku landzelelana ka swona.” Swi antswa swonghasi ku aka timfanelo ta moya leti lavekaka eka vana leswaku va ta kota ku papalata swirimbani swa misava!—1 Vakor. 3:10-15.

KU TSAKELA NTIRHO WA NSIMU

5 Ntsako i nsusumeto lowu pfuxiwaka hi ku fikelela kumbe ku langutela ka leswinene. Loko munhu a tilulamisele ntirho wa nsimu, a nga ha langutela vuyelo lebyinene hi ndlela leyi faneleke. Xisweswo, ku lunghiselela i xilotlelo lexi yisaka entirhweni wa nsimu lowu tsakisaka. Ku titoloveta nkarhi na nkarhi ka leswi swi fanelaka ku vuriwa tanihi ndyangu ku nga si yiwa entirhweni wa nsimu swi aka ntshembo. (Ringanisa Tito 3:1b.) Un’wana ni un’wana a nga va ni pakani emianakanyweni. Rungula leri olovaka ri nga ha pfuxetiwa ni vana lavantsongo kumbe lava va sungulaka entirhweni wa nsimu.

6 Hi ku tirha ni vana va vona evutirhelini bya Vukriste, vatswari va nga va pfuna ku hlakulela ku khathalela ka munhu hi xiyexe eka vanhu loku kombisiweke hi Yehova na Yesu. Vutirheli nakambe byi hi pfuna ku vumba vuxaka lebyikulu na Yehova. (wTS82 6/1 matl. 24-32) Mindyangu yin’wana yi endla xiyimiso xa masiku lama taleke va ri swin’we, va kunguhata ku tihungasa lokunene endzhaku ka ntirho wa nsimu. Leswi swi nyikela nkarhi wa bulo ematshamelweni lama ntshunxekeke naswona swi hlanganisa vatswari ni vana kun’we.

7 Tiyimiseli ku vumba vutshila lebyi lavekaka bya ku vulavurisana leswaku u hlayisa vuxaka lebyikulu ni vana va wena. U nga pfumeleli nchumu xi ku sivela ku teka nkarhi lowu lavekaka wo tiyisa ndyangu wa wena hi tlhelo ra moya. Khongelela vana va wena ni ku khongela na vona, u ri karhi u tiva leswaku Yehova a nga hetisisa matshalatshala ya wena yo aka hi laha ku humelelaka.—Ps. 127:1; Swiv. 24:3.