Ku Fambisa Tidyondzo Ta Le Kaya Ta Bibele Leti Vuyerisaka

1 Wun’wana wa mintirho ya nkoka swinene leyi vatswari va yi endlaka i ku dyondzisa vana va vona ntiyiso. I xileriso lexi humaka eka Yehova. (Deut. 6:6, 7) Vana va lava nkongomiso leswaku va famba hi ndlela leyinene etikweni lero biha. Va fanele ku dyondza ku rhandza Yehova ni ntiyiso ni ku tiyimisela ku khomelela eka wona. Xihondzo xo Rindza xa August 1, 1988, tluka 11, xi te: “Ku nga khathariseki mindzhwalo yihi na yihi yin’wana leyi mi nga na yona kumbe makhombo lawa mi kongomanaka na wona, ku heta nkarhi ni vana va n’wina ku fanele ku va swo sungula. Nkarhi lowu hetiwaka swin’we wu ta mi pfumelela ku byala mimpimanyeto ya moya leyi nga ta sirhelela timbilu ta vana va n’wina ivi yi va nghenisa endleleni leyinene.”

2 Loko mindyangu yi ta swi kota ku landzela swikongomiso leswi nyikeriweke eRitweni ra Xikwembu, nkarhi wa dyondzo ya ndyangu wu fanele ku vekiwa etlhelo nkarhi na nkarhi. Tinhloko ta mindyangu ti fanele ku rhangisa nkhathalelo wa vumoya bya ndyangu. Loko nyingiso lowu faneleke wu nga nyikeriwi eka swilaveko swa moya swa ndyangu sweswi, kumbexana vatswari va ta hlangavetana ni swiphiqo leswikulu enkarhini lowu taka.

MHAKA NI TINDLELA TO DYONDZA HA TONA

3 I yini lexi xi nga dyondziwaka? Nhloko ya ndyangu yi le ka xiyimo lexinene xo tiva leswi ndyangu wu swi lavaka. A nga vutisa leswaku i yini leswi van’wana va anakanyaka leswaku swi nga pfuna kutani a kambisisa swiringanyeto swa vona. Ku pfumelelana ni swiyimo swi ta endla dyondzo ya ndyangu yi tirha ni ku phyuphyisa. Mindyangu yo tala yi hlawula ku lunghiselela dyondzo ya vhiki na vhiki ya Xihondzo xo Rindza. Hambi swi ri tano, swi nga ha laveka leswaku minkarhi yin’wana ku buriwa hi timhaka leti kongomeke leti hlanganisaka swiphiqo leswi vantshwa va langutanaka na swona exikolweni. Rungula leri humesiweke, leri vulavulaka hi ku gangisa, mintirho ya le ndzhaku ka xikolo, mintlangu ni mimboyamelo ya mahanyelo yo biha ri nga xiyiwa hi ndlela leyi akaka, leyi khuthazaka. I swa nkoka leswaku nhloko ya ndyangu nkarhi na nkarhi yi tlhela yi kambisisa leswaku i rungula rihi leri ndyangu wu ri lavaka, ni ndlela yo antswa leyi yi nga fikelelaka timbilu ta vona ha rona.—Vona The Watchtower, February 15, 1971, matluka 105-6.

4 Dyondzo yi fanele ku fambisiwa hi ndlela yihi? Hlakulela xiyimo lexi ntshunxekeke ni lexi xiximekaka. Papalata endlelo leri tikaka, leri nga pfumeleriki ntshunxeko. Vutisa swivutiso leswi engetelekeke, tirhisa swikombiso ku phyuphyisa miehleketo, ni ku katsa hinkwavo. Swipfuneto leswi vonakaka, ku fana ni mimepe ni tichati, swi nga tirhisiwa ku antswisa mhaka. Swiavelo swi nga nyikeriwa ku kambisisa mhaka eka Index kumbe eka tivholumo ta Insight, hi ku ya hi malembe ni vuswikoti bya vana. Nghenisa vana lavantsongo ebulwini hi xihatla loko se va swi kota ku hlamula. Swivutiso swo olova leswi lavaka tinhlamulo ta marito yo koma va nga vutisiwa swona. U nga tirhisi minkarhi yo dyondza ku holovela vana. Ematshan’wini ya sweswo, va bumabumele, kombisa ku tlangela matshalatshala ya vona, chivirikela ku avelana malangutelo ya swa moya na vona.

5 U nga tiyiseka njhani leswaku u fikelela mbilu? Khutaza hinkwavo ku nyikela tinhlamulo hi marito ya vona vini. Hi vutlhari tirhisa swivutiso swa mavonelo ku vona malangutelo ya mbilu ya vona. U nga vutisa: “Xana vana exikolweni va titwa njhani ehenhleni ka mhaka leyi? Xana u na ku kanakana eyinhleni leyi?” Xiya leswaku u nga hlundzukisiwi hi tinhlamulo leti vana va nga ha tinyikelaka eka swivutiso swa mavonelo, kumbe vana va wena va nga ha lahlekeriwa hi tshunxeko wo tiphofula hi vutshembeki. Va nyike nkarhi wo vulavula. Ku swi tiva ka vona leswaku wa va khathalela ni ku khathalela swiphiqo swa vona swi ta endla matshalatshala ya wena yo dyondzisa ma olova ngopfu.—Vona Xihondzo xo Rindza, November 1, 1986, matluka 23-5.

6 Tsundzuka leswaku xikongomelo lexikulu xa dyondzo ya wena ya le kaya i ku nghenisa mianakanyo ya Yehova naswona hayi ku kuma nhlamulo ntsena ya ku hlamula enhlanganweni wa bandlha. (Vaef. 3:17-19) Leswi swi vula ku tirhela ku nghenisa rungula embilwini. Nyika ndyangu swivangelo swa leswaku ha yini va fanele va lava ku endla ku rhandza ka Xikwembu ni leswaku ha yini yoleyo yi ri yona ndlela yo antswa evuton’wini.

7 Dyondzo ya le kaya ya Bibele ya nkarhi na nkarhi i ya nkoka eku akeni ka vumoya bya ndyangu. Yi letela ni ku hlomisa vana ku hlangavetana ni swiphiqo swa vutomi. N’wina vatswari mi le ka xiyimo lexinene xa ku pfuna vana va n’wina. Amukela vutihlamuleri lebyi byi nyikiweke hi Xikwembu. Entiyisweni Yehova u ta mi katekisa loko mi endla matshalatshala hinkwawo ya ku hambeta eku fambiseni ka dyondzo ya le kaya ya Bibele leyi vuyerisaka.