Ku Twarisa Mahungu Lamanene
Hi Buku Leyi Nge Ku Chaputa Ka Nhlavutelo
1 Vana va Kora va tsale mayelana na Yehova va ku: “Xikwembu lexi, i Xikwembu xa hina hi laha ku nga heriki; xi ta hi fambisa ku ya fika eku feni.” (Ps. 48:14) Vavanuna volavo vo tshembeka, hi ku tiyiseka va veke ntshembo wa vona eka Yehova, va hanya vutomi bya vona hinkwabyo hi ku fambisana ni swiletelo swa Xikwembu. Mawaku swikombiso leswinene leswi va hi vekeleke swona! Lava va kongomisiwaka hi Yehova namuntlha va tokota ku phyuphya ni ku vonakala. (Esa. 58:11) Va papalata khombo ra lava landzelaka ‘vakongomisi vo fe mahlo’ va mafambiselo lawa yo biha, lava yisaka valandzeri va vona “ekheleni” ra ku xaniseka ni mpfilumpfilu.—Mat. 15:14.
2 Nkongomiso wa Xikwembu i wa nkoka ngopfu namuntlha tanihi leswi misava leyi hi rhendzeleke yi nyanyaka yi va leyi pfilunganyekeke ni ku va ni makhombo. Vanhu vo tala a va swi twisisi naswona va lava tinhlamulo leti anerisaka. Kutani ke, i swa nkoka swonghasi leswaku hi va khutaza ku hlaya buku ya Ku Chaputa Ka Nhlavutelo! Buku leyi yi nyikela nkongomiso wa Xikwembu hi ku hlamusela swiendlakalo leswi tsekatsekisaka misava swa siku ra hina hi mpfuno wa vuprofeta bya Nhlavutelo. Rungula ro tano ri tisa ku ntshunxeka ni ku nyika nkongomiso lowu twalaka wa ndlela leyi vanhu va nga hanyaka vutomi lebyi tsakisaka Xikwembu ha yona.
KU KOMBISA BUKU YA KU CHAPUTA KA NHLAVUTELO
3 Yinhla leyi nyanyulaka ya buku ya Ku Chaputa Ka Nhlavutelo i swifaniso swa yona, leswi nga swipfuneto leswikulu swo dyondzisa. Tirhisa swifaniso leswi hi laha ku humelelaka loko u fambisa buku entirhweni wa nsimu. Hi xikombiso, eka tluka 302 ku na xifaniso lexi vangamaka xa mikateko ya Mfumo. Leyi i nhlamuselo ya mutshila ya leswi ku vulavuriwaka ha swona eka 2 Petro 3:13 na Nhlavutelo 21:4, matsalwa mambirhi lama nga eka Mhaka ya hina yo Vulavurisana.
4 Endzhaku ko titivisa, hi nga sungula bulo hi ndlela leyi: “Hi endzela ku ta bula hi nhlamuselo ya leswi humelelaka exikarhi ka hina emisaveni namuntlha. Varhangeri van’wana va misava va ehleketa onge hi le ndzilakaneni wa nguva leyintshwa ya ku rhula. Xana u ehleketa leswaku swi tano? [Pfumelela n’wini wa muti a hlamula.] Hambi loko tihulumendhe ti tikomba ti tlhantlha ku kanetana kun’wana ka politiki, malangutelo ya vanhu ehenhleni ka van’wana ni xiendlakalo xa vukari hakanyingi ri tikomba ri lwisana ni matshalatshala ya vanhu ya ku tisa ku rhula. Hambi swi ri tano, eka 2 Petro 3:13 Bibele yi hi tiyisekisa hi vandla lerintshwa ra le misaveni leri nga ta tirha ehansi ka hulumendhe ya le tilweni. [Hlaya tsalwa ivi u pfula buku eka tluka 302.] Lexi i xifaniso lexi dirohiweke xa leswi tsalwa leri ri vulavulaka ha swona. I yini lexi ku tsakisaka eka xifaniso lexi? [Yimela nhlamulo.] Malunghana ni swiyimo leswi nga ta va kona emisaveni, nakambe Bibele ya vula eka Nhlavutelo 21:4 yi ku [hlaya tsalwa eka tluka 303, ndzimana 6]. Hambi ku ri rifu a ri nge ku herisi ku rhula loku Xikwembu xi nga ta ku simeka.” U nga ha kuma swingheniso swo tala leswi fanelaka nsimu ya ka n’wina eka matluka 9-15 ya buku leyi nge Reasoning.
5 Hambi leswi hi lavaka ku kombisa mikateko ya Mfumo eku nyikeleni ka mahungu lamanene, nakambe hi fanele ku pfuna vanhu lava tsakelaka va tlangela rungula ra xihatla leri Yesu Kriste a ri vuleke eka buku ya Nhlavutelo. Hikwalaho, hi ta lava ku gimeta bulo ra hina hi xikhutazo xa xihatla ni ku tinyiketela ku pfuna lava tshembekeke leswaku va twisisa leswaku ku avanyisa ehenhla ka mafambiselo lawa ni lava va ma seketelaka ku ta ta ku nga ri khale.
6 Vuprofeta bya Nhlavutelo i xihlovo lexikulu xa ku phyuphya ni ntsako. Yehova u twarisa xirhambo eka hinkwavo va timbilu to tshembeka leswaku va landzela vurhangeri bya yena ivi va vuyeriwa. A hi nyikeleni buku ya Ku Chaputa Ka Nhlavutelo hi ku chivirika leswaku hinkwavo va kongomisiwa hi nkongomiso wa vutlhari wa Yehova.