Ku Twarisa Mahungu Lamanene

Hi Timagazini eNsin’wini Leyi Hlanganisiwaka Hi Ku Hatlisa

1 Eka Mintirho 8:25 hi hlaya leswaku Petro na Yohane va nyikele vumbhoni lebyi teleke eSamariya kutani va twarisa ‘mahungu lamanene emitini leyo tala.’ Namuntlha, na hina hi fanele hi tirhisa vutlhari eku hlanganiseni ka nsimu leyi averiweke bandlha ra hina leswaku vumbhoni lebyi teleke byi nyikeriwa.

2 Hi ku andza loku hatlisaka ka vahuweleri, mabandlha yo tala sweswi ma hlanganisa nsimu ya wona hi ku hatlisa swinene. Hambi loko angulo wa hina wo sungula eku tirheni ka nsimu hi ku phindha-phindha wu nga ha vaka lowu landzulaka, leswi a swi fanelanga swi va tano. Eka nkandziyiso wun’wana ni wun’wana wa Xihondzo xo Rindza na Awake!, nkarhi hinkwawo ku na swihloko leswintshwa ni leswi tsakisaka leswi hi nga avelanaka swona ni vanhu ensin’wini ya ka hina. Nakambe, tanihi leswi hi hlanganisaka nsimu ya hina hi ku hatlisa, hi ni nkarhi lowu engetelekeke wo wu heta eka yindlu yin’wana ni yin’wana.

VULAVURISANA NI VANHU

3 Ku nyikela ko koma swinene ka timagazini ku tirhisiwile leswaku ku hlanganisiwa nsimu ya hina hinkwayo ni ku hangalasa timagazini hi xitalo. Hambi swi ri tano, vahuweleri lava tirhaka tinsimu leti hlanganisiwaka hi ku hatlisa va endla kahle swinene ku heta nkarhi wo tala leswaku va vulavula ni vini va miti. Hambi ku ri vana lavantsongo va nga engetela eka leswi swi va tsakiseke exihlokweni. Xana leswi swi nga hetisisiwa hi ndlela yihi? I swa nkoka ku tolovelana ni swihloko swa timagazini. Leswi swi lava nkarhi ni ku lunghiselela ka ha ri emahlweni. Loko u hlaya timagazini, languta leswi swi nga ta tsakisa vanhu ensin’wini ya ka n’wina. Kutani, u nga si ya entirhweni, kambisisa timagazini ivi u hlawula swihloko leswi u nga ta swi kombisa. Xiya nhloko-mhaka leyi u nga ta yi kombisa loko u hlangavetana ni swiyimo swo hambana-hambana emakaya. Tirhisa yin’we ya timhaka letinene eka magazini tanihi xisekelo xa xingheniso xa wena. Koka mianakanyo ya n’wini wa muti hi bulo ra xinghana.

TSUNDZUKA XIKONGOMELO XA HINA

4 Xikongomelo xa hina eku fambeni hi yindlu na yindlu a hi ku vona leswaku hi nga fambisa timagazini kumbe tibuku tingani. Ku navela ka hina i ku pfuna van’wana leswaku va kuma vutivi lebyi kongomeke bya ntiyiso. Petro na Yohane va vule rito ra Yehova eka Vasamariya hi mukhuva lowu faneleke naswona hina hi laha ku fanaka hi fanele ku heta nkarhi lowu faneleke ku vona leswaku vanhu ensin’wini ya hina va nyikiwa nkarhi wo amukela ntiyiso.

5 Hi ku tirhisa timagazini ta hina hi laha ku humelelaka tanihi xisekelo xa mabulo ya hina, hi nga hetisisa xikongomelo lexi. Hi fanele ku khongelela hina ni van’wana leswaku hi nyikiwa ‘vuswikoti byo vulavula . . . ku tivisa xihundla lexo kwetsima xa mahungu lamanene, . . . hi xivindzi.’—Vaef. 6:18-20.