I Vamani Lava Nga Tsakisiwaka Hi Minkandziyiso Leyi?

1. Loko hi hlaya tikopi ta hina ta Xihondzo xo Rindza ni Xalamuka!, hi fanele hi anakanyisisa hi yini naswona ha yini?

¹ Xihondzo xo Rindza ni Xalamuka! swi tsariwa ku ri karhi ku anakanyiwa hi vanhu lava nga ensin’wini ya misava hinkwayo. Hi yona mhaka leyi swi nga ni tinhloko-mhaka to hambana-hambana. Loko hi hlaya nhloko-mhaka yin’wana ni yin’wana eka kopi leyi hi yi kumaka, hi fanele hi anakanyisisa hi munhu loyi yi nga n’wi tsakisaka, kutani hi n’wi fambisela yona.

2. Hi tihi tinhloko-mhaka leti nga eka timagazini ta hina leti nga ha tsakeriwaka hi van’wana?

² Xana Xihondzo xa sweswi xi vulavula hi tinhloko-mhaka ta le Bibeleni leti wena ni mutirhi-kuloni mi vulavuleke ha tona? Xana ku ni nhloko-mhaka leyi vulavulaka hi vutomi bya ndyangu leyi nga pfunaka xaka ra wena? Xana u kona munhu loyi u n’wi tivaka la kunguhataka ku ya etikweni leri kombisiweke eka Xalamuka!? Xana yin’wana ya timagazini ta hina yi nga va pfuna van’wa-mabindzu kumbe vatirhela-mfumo vo karhi ensin’wini ya n’wina? Hi xikombiso, magazini lowu vulavulaka hi swiphiqo leswi vadyuhari va langutanaka na swona wu nga ha tsakeriwa swinene emakaya lawa ku hlayisiwaka vadyuhari. Maphorisa ma nga ha tsakela magazini lowu vulavulaka hi vugevenga kumbe maphorisa.

3. Boxa ntokoto lowu kombisaka nkoka wo fambisa minkandziyiso yo karhi ya timagazini eka lava hi ehleketaka leswaku va ta tsakisiwa hi leswi nga eka yona.

³ Vuyelo: Endzhaku ka loko mpatswa wa laha Afrika Dzonga wu kume Xalamuka! ya October 2011 leyi nga ni nhloko-mhaka leyi nge, “Ndlela Yo Kurisa Vana Leswaku Va Va Ni Vutihlamuleri,” wu fonele swikolo swa 25 ni swikolo swo dyondzela ku hlayisa lava dyuhale ensin’wini ya wona. Swikolo swa 22 swi amukele tikopi ta magazini kutani swi tinyika swichudeni swa swona. Mpatswa wun’wana wa kwala tikweni na wona wu endle leswi fanaka kutani wu fambisa tikopi ta magazini eswikolweni leswi nga ensin’wini ya wona. Xikolo xin’wana xi hlele ku tirhisa magazini eka tidyondzo ta xona ta vhiki ni vhiki. Mpatswa wu byele mulanguteri wa xifundzha ntokoto wa wona loyi a khutazeke mavandlha leswaku ma chumayela eswikolweni leswi nga ensin’wini ya wona. Rhavi ri amukele tioda to tala ta timagazini leti engeteleke lerova magazini lowu wu tlhele wu kandziyisiwa!

4. Ha yini hi lava ku fambisela vanhu vo tala timagazini?

⁴ Minkandziyiso ya hina yi hlamusela xivangelo lexi endlaka leswaku swiendlakalo leswi nga kona swi humelela kutani yi hi yisa eBibeleni ni ku vulavula hi Mfumo wa Xikwembu. Hi tona ntsena timagazini leti “twarisaka ku ponisiwa” emisaveni. (Esa. 52:7) Hikokwalaho, hi lava ku ti fambisela vanhu vo tala hilaha swi nga kotekaka hakona. Ndlela leyinene yo endla leswi i ku anakanyisisa hileswaku, ‘I vamani lava nga tsakisiwaka hi minkandziyiso leyi?’