Ku Byarha Vutihlamuleri Bya Hina Byo Endlela Van’wana Leswinene

1 Muapostola Pawulo u khutaze Vakriste va lembe xidzana ro sungula: “Mi nga rivali ku endla leswinene ni ku pambulela van’wana leswi mi nga na swona.” (Vahev. 13:16) Matshalatshala ya vona yo pfuna vamakwavo hambi ku ri ehansi ka swiyimo leswo biha a ma ta tiyisa rirhandzu ra vona eka Xikwembu ni le ka vona vini. (Yoh. 13:35) Na hina hi khutaziwa ku endla leswinene ni ku pambulela van’wana.

2 Ku fikela sweswi, Yehova u hi endlele malunghiselelo leswaku hi phameriwa kahle hi swa moya ni ku hlomisiwa kahle. Mawaku rungula ro tala swonghasi leri hi ri kumaka eka Xihondzo xo Rindza na Awake! yin’wana ni yin’wana. Mawaku ntsako lowu hi wu kumaka loko hi hlaya nkandziyiso wun’wana ni wun’wana hi xihatla hi laha swi kotekaka ha kona loko hi wu kuma! Loko hi anakanyisisa hi rungula ra Matsalwa, hi nga ha xiya tinhla to ti tirhisa evutirhelini bya nsimu ni le ka mabulo ya hina ni van’wana. Hi ku fanana, hi nga ha xava nkarhi wo lunghiselela nhlangano wun’wana ni wun’wana naswona ngopfu-ngopfu ku kambisisa Xihondzo xo Rindza vhiki na vhiki. Dyondzo ya munhu hi xiyexe ya Rito ra Xikwembu yi hi pfuna ku kurisa “miehleketo ya Kriste” naswona yi hi pfuna leswaku hi hundzisela leswinene eka lava hi hlanganaka na vona.—1 Vakor. 2:14-16; Ps. 19:14.

3 Vutihlamuleri Lebyi Fanelaka Ku Amukeriwa: Hinkwavo lava rhandzaka Yehova va nyiketela vutomi bya vona eka yena. Hi ku amukela vutihlamuleri lebyi yelanaka ni ku tinyiketela, hi kombisa leswaku hi va Yehova naswona hi tihambanisile ni misava ya Sathana ni tindlela ta yona to biha. Hi ku landzela xikombiso lexi siyiweke hi Kriste Yesu, hi vekela van’wana xikombiso lexinene. (1 Pet. 2:21) Minongonoko ya nhlengeletano ya xifundza yo tanihi leyi lunghiseleriweke lembe ra ntirho ra 1992, leyi nga ni nhloko-mhaka leyi nge “Ku Rhwala Ndzhwalo Wa Hina Vini Wa Vutihlamuleri,” yi hi khutaza ku namarhela ku tinyiketela ka hina.

4 Ku va kona nkarhi na nkarhi eminhlanganweni ya bandlha swi hi pfuna ku avelana mianakanyo leyi akaka. Dyondzo ya hina ya munhu hi xiyexe ni ku lunghiselela minhlangano swi hi nyika rungula ro tala lerinene leri hi nga avelanaka rona. Ku kombisa ku tsakela ko tano ka munhu hi xiyexe eka van’wana swi kondletela moya wa ndyangu lowu kufumelaka, wa xinghana. Hi ku hlanganyela eminhlanganweni, hi kombisa leswaku hakunene hi pfumelelana ni marito ya Pawulo lama rhekhodiweke eka Vaheveru 10:24, 25 naswona hi amukela vutihlamuleri bya hina byo khutaza van’wana.

5 Fanelekela Vutihlamuleri Lebyi Enge- telekeke: Hi lembe ra ntirho ra 1992, xana hi nga fanelekela vutihlamuleri lebyi engetelekeke, tanihi ntirho wa vuphayona bya nkarhinyana kumbe bya nkarhi hinkwawo? Ematshan’wini yo kandziyisa xilaveko xa tiawara swi nga fanelangi, ha yini u nga yisi nyingiso eka nkarhi lowu engetelekeke wo hlanganyela entirhweni wo hlengeleta? (Yoh. 4:35, 36) Ku tirha nkarhi na nkarhi ni vahuweleri ni maphayona man’wana lama nga ni ntokoto swi ta hi pfuna ku antswisa vuswikoti bya hina evutirhelini. Nhlayo leyi engetelekeke ya maphayona ya nkarhinyana na yona yi tirha tanihi xikhutazo xa matimba ebandlheni. Loko swi koteka, ha yini u nga tsarisi tanihi phayona ra nkarhi hinkwawo kumbe u hlela ku va phayona ra nkarhinyana nkarhi na nkarhi kumbe hi ku phindha-phindha hi laha swi kotekaka ha kona lembe leri ke?

6 Vutihlamuleri byi nyikiwa swirho swa xinuna leswi tinyiketeleke ni leswi khuvuriweke leswi fanelekaka swa bandlha. (1 Tim. 3:1-10, 12, 13) Hinkwavo va nga kombisa ku tsakela ka vona ku tirhela hi tinhlamulo ta vona leti anakanyeriweke kahle eminhlanganweni, ku hlanganyela eka Xikolo xa Vutirheli bya le Tilweni, ni ku amukela swiavelo swo nyikela nkombiso kumbe ku khathalela swiphemu swin’wana swa Nhlangano wa Ntirho. Hambi ku ri vana va nga va swikombiso hi tindlela leti na hi mahanyelo ya vona eHolweni ya Mfumo. Va nga pfuna hi ku tirha ni ntlawa wa dyondzo ya buku ya vona loko wu averiwe ku basisa Holo ya Mfumo kumbe ku khathalela swilaveko swin’wana swo tano.—km 4/76 matl. 1, 3.

7 Yesu u phofule ku rhandza ka yena ko amukela vutihlamuleri byo endlela van’wana leswinene hi marito lama nge: “Ndza swi rhandza.” (Luka 5:12, 13) Hi ku landzela xikombiso xa yena, na hina hi nga khutaza ni ku pfuna vamakwerhu, lava tsakelaka ni vanhu lavanene lava hi hlanganaka na vona entirhweni wa nsimu leswaku va hlanganyela nkarhi na nkarhi ni nhlengeletano ya Yehova. Ku amukela vutihlamuleri bya hina byo ‘endlela vanhu hinkwavo leswinene’ swi lava matshalatshala yo tiyimisela kumbexana ni ku tinyiketela ka hina ka munhu hi xiyexe. (Vagal. 6:10) Kambe loko hi vona leswinene leswi endliwaka, hi nga pfumelelana na Pawulo, la nga te: “Magandzelo lawa hi wona lama tsakisaka Xikwembu.”—Vahev. 13:16.