Twarisa Mahungu Lamanene Hi Xihondzo xo Rindza
1 Xihondzo xo Rindza xi hlawulekile hakunene hikuva xi rhwala mahungu lamanene. Ku hambana na xona, tibuku to tala ta misava ti humesa mahungu yo biha ni lama hetaka matimba. Hi nga va kombisisa ku yini van’wana leswaku Xihondzo xo Rindza xi hambanile, xi rhwele rungula leri phyuphyisaka hakunene?
2 Hi nga yisa nyingiso eka “Xikongomelo Xa Xihondzo xo Rindza” eka tluka 2 ra magazini. Kombisa leswaku xikongomelo xa xona i ku tlakusa Yehova tanihi Hosi Leyikulu, xi xiya swiendlakalo swa misava leswi hetisisaka vuprofeta bya Bibele, xi nyika rungula leri chavelelaka eka lava tshikileriwaka, naswona xi tiyisa ripfumelo emalunghiselelweni ya Xikwembu ya ku hi ponisa.
3 Xana tinhlamuselo ta hina hi Xihondzo xo Rindza ti nyikela mianakanyo yo tano hi ndlela leyi khorwisaka? A hi fanelanga hi vula xivulwa lexi tsakisaka xo pfuxa ku tsakela ka nkarhinyana ntsena; xi fanele xi va ni mongo, xi nyika ntshembo lowu vumbaka ku tsakela ku lava ku tiva leswi engetelekeke.
4 Ku Lunghiselela Ka Laveka: Hi fanele hi hlaya magazini wun’wana ni wun’wana hi vukheta, hi kambisisa marungula yo hambana-hambana hi ri karhi hi tsundzuka nsimu ya hina. Ku kamba Matsalwa lama kombisiweke swi engetela ku twisisa ka hina. Leswi swi nga kurisa ku tlangela ka hina ntiyiso swi tlhela swi hi susumetela ku wu avela van’wana. Loko ntiyiso wu nga ri kona etimbilwini ta hina, a hi nge susumeteleki ku vulavula.
5 Hi lava ku khutaza vanhu vo tala hi laha swi kotekaka ha kona leswaku va endla xikhokhelo xa Xihondzo xo Rindza. Hambi leswi handle ko kanana hi nga ta kuma swikhokhelo swa hina swo tala loko hi famba hi yindlu na yindlu, a hi fanelanga hi rivala lava hi xaviselanaka na vona, vaakelani ni maxaka ya hina. Xana vana va hina va na xona xikhokhelo? Xana hi tshame hi anakanya hi ku rhumela xikhokhelo xa nyiko eka wun’wana loyi hi n’wi rhandzaka hakunene? Ku vuriwa yini hi lava nkarhi na nkarhi hi endlaka maendzo yo vuyela eka vona kumbe hambi ku ri swichudeni swa hina swa Bibele? Loko vanhu va nga xi koti xikhokhelo xa lembe, va endlele xikhokhelo xa tin’hweti ta tsevu. Loko munhu a ala nyiko ya xikhokhelo, ringanyeta leswaku a teka timagazini timbirhi.
6 Loko u hlaya swihloko swa le nkandziyisweni wa sweswinyana wa Xihondzo xo Rindza, ringeta ku tsundzuka mabulo lawa u veke na wona enkarhini lowu hundzeke ni vini va miti laha swihloko leswi swi pfuxeke ku tsakela eka vona. Tiyiseka leswaku u tlhelela ni nkandziyiso wolowo leswaku mi yisa bulo emahlweni.
7 A hi swi tivi leswaku mahungu lamanene ma ha ta twarisiwa nkarhi wo lehisa ku yini ni mpimo wo fikela kwihi. Hambi swi ri tano, hi nga tiyiseka leswaku Xihondzo xo Rindza xi ta endla xiphemu lexikulu eka leswi hetisisiwaka. Hi ku tirhisa lunghiselelo leri, hi fanele hi tekelela vaapostola hi ku “dyondzisa, [ni ku] twarisa mahungu lamanene ya rito ra [Yehova, NW]” hi ku gingiriteka.—Mintirho 15:35.