Xihondzo xo Rindza—Swakudya Swa Moya Hi Nkarhi Wa Kona
1 Ku lava ku ringana malembe ya 114, Xihondzo xo Rindza a xi khongotela vahlayi va xona leswaku va xalamuka emoyeni. Magazini lowu fambisanaka na xona, Xalamuka! wu aka ntshembo eka xitshembiso xa Muvumbi xa misava leyintshwa ya ku rhula, ni nsirhelelo exikarhi ka rixaka ra hina. Hayimbirhi ka yona, minkandziyiso leyi yi ve switirho swo tshembeka leswi hi voningelaka endleleni ya misava ya munyama. (Esa. 60:2) Ntiyiso wa Rito ra Xikwembu a wu hundzuki, kambe ku wu twisisa ka hina ku ya ku kula tanihi leswi Yehovha a tirhisaka switirho leswi ni swin’wana leswaku a hi phamela ‘swakudya swa moya hi nkarhi wa kona.’—Mt. 24:45; Swiv. 4:18.
2 Tirhisa Timagazini Khwatsi: Hi nga kombisa ku tlangela ka hina rivoni ra moya leri hi ri amukeleke hi ku chivirika hi khutaza vanhu leswaku va hlaya Xihondzo xo Rindza ni Xalamuka! Vanhu van’wana va teka tikopi ta timagazni nkarhi wun’wana naswona swi le rivaleni leswaku va swi tsakela ku ti hlaya. Ha yini u nga va vutisi loko va ta swi tsakela ku amukela timagazini nkarhi na nkarhi hi poso?
3 Hi fanele hi khutaza vanhu vo tala hi laha hi nga kotaka ha kona leswaku va endla swikhokhelo swa Xihondzo xo Rindza ni Xalamuka! Hambi leswi handle ko kanakana hi nga ta kuma swikhokhelo swa hina swo tala loko hi famba hi yindlu na yindlu, hi nga rivali lava hi xaviselanaka na vona, vaakelani va hina ni maxaka. Xana vana va hina va na xona xikhokhelo? Xana hi tshame hi ehleketa hi ku rhumela nyiko ya xikhokhelo eka un’wana loyi hi n’wi rhandzaka? Ku vuriwa yini hi lava hi hambaka hi endla maendzo yo vuyela eka vona kumbe swichudeni swa hina swa Bibele? Loko vanhu va nga xi koti xikhokhelo xa lembe, va fambisele xikhokhelo xa tin’hweti ta tsevu. Loko munhu a ala nyiko ya xikhokhelo n’wi khutaze leswaku a hlaya timagazini hatimbirhi. Lawa ku nga ha va masungulo ya ntila lowuntshwa wa timagazini.
4 Eminkarhini ya sweswi hi vone ku hunguteka ka timagazini leti fambisiwaka eAfrika Dzonga. Ha yini hi nga endli matshalatshala yo hlawuleka hi April ya ku fambisa timagazini ta hina to saseka eka un’wana ni un’wana loyi hi hlanganaka na yena? Timagazini ti nga ha fambiseriwa vatirhi-kulorhi, vadyondzi-kulorhi ni maxaka. Nakambe u nga fambisa timagazini eka lava mi tivelanaka ebindzwini ni le ku vekeni ka vumbhoni exitarateni.
5 Timagazini letintshwa ti fanele ti nyikiwa vahuweleri hi ku hatlisa loko ti fika evandlheni. Loko u amukela nkandziyiso lowuntshwa, tolovelana na wona kahle. Hi tihi timhaka leti khumbaka ngopfu vanhu va ka n’wina? Xana i ku rhula ni nsirhelelo wa misava hinkwayo? I ikhonomi ke? I hulumendhe leyinene ke? I mbango ke? Lexi tsakisaka, Xihondzo xo Rindza xi yisa vanhu eka nhlamulo ya ntiyiso, Mfumo wa Xikwembu. (Dan. 2:44; Mt. 6:10) Hakunene i nyiko leyi nga riki na nxavo leyi humaka eka ‘Muleteri Lonkulu’ wa hina.—Esa. 30:20.
6 Hi April na May hi kuma nkarhi lowunene wo heta nkarhi lowu engetelekeke entirhweni wa nsimu. Tanihi leswi May a nga ni mavhiki ya ntlhanu lama teleke, vo tala va ta tsarisa tanihi maphayona ya nkarhinyana. Hinkwerhu hi nga veka tipakani ta hina vini sweswi leswaku hi engetela ntirho wa hina wa nsimu eka tin’hweti leti timbirhi ivi hi chivirikela ku khutaza hinkwavo lava hi hlanganaka na vona leswaku va endla xikhokhelo xa Xihondzo xo Rindza ni Xalamuka!