Dzunisa Xikwembu Xa Ntumbuluko

¹ Timbala to saseka, ku pela ka dyambu loko saseka, xibakabaka lexi nga ni tinyeleti ni vusiku, miloti ya swinyanyana—i mani loyi u dzunisaka yena hikwalaho ka swilo leswi swo tsakisa? Ina, hi susumeteleka ku dzunisa Xikwembu xa ntumbuluko. Hi mbilu hinkwayo hi pfumelelana ni marito lama nga eka Nhlavutelo 4:11. Hi mhaka ya leswi a tumbuluxeke swilo hinkwaswo Yehovha Xikwembu u lulameriwa hi ku dzunisiwa hi hina.

² Hi September, hina tanihi malandza yo tshembeka ya Yehovha, hi ni lunghelo ro vula ntiyiso hi Muvumbi wa hina ni kungu rakwe lerinene hi misava leyi. Buku leyi nge U Nga Hanya Hi Masiku aParadeyisini eMisaveni i yin’wana ya tibuku letinene leti hi tshameke hi va na tona to pfuna vanhu va twisisa Bibele. Buku leyi yi hi hlomisela ku lwela ntiyiso wa xisekelo wa Bibele.

³ Minkarhi Yo Fambisa Buku Leyi: Swi nga hi pfuna loko hi anakanyisisa hi ku endla nxaxamelo wa minkarhi yo fambisa buku leyi. A swi kanakanisi leswaku ntirho wa yindlu na yindlu wu ta va wona wa nkoka lowu hi fambisaka ha wona buku leyi nge Hanya Hi Masiku. September i n’hweti yo rhanga ya lembe ra ntirho. Xana u nga veka nkarhi lowu engetelekeke eka n’hweti leyi leswaku u hlanganyela eka ntirho lowu? Mavandlha yo tala ma ta va ma tirha nsimu leyi nga aviwangiki. Ha yini u nga endli matshalatshala lama engetelekeke yo fambisa buku leyi eka hinkwavo vanhu lava nga byi kumiki ngopfu vumbhoni? Mpimo lowutsongo wa buku leyi nge Hanya Hi Masiku wu nga famba hi ku olova eka vanhu lava tshamaka emigangeni leyi nga evusiwaneni.

⁴ Timbhoni letintshwa na tona ti fanele ku fambisa buku leyi eka vadyondzi-kulobye ni vadyondzisi. Ha yini u nga tshineleli un’wana ni un’wana wa vadyondzisi va wena ni vadyondzi-kulobye lava u vonaka leswaku va ta tsakela ku hlaya buku leyi leyinene. Hi swihi swiyimo swin’wana leswi hi nga fambisaka kona buku leyi nge Hanya Hi Masiku eka swona? Muchayeri un’wana wa lori u fambise buku leyi eka vanhu lava a a hlangana na vona loko a ri eku fambeni. Rungula rakwe a ri olova. U kombe vanhu buku leyi ivi a hlamusela leswaku u dyondze swilo swo tala leswinene eka yona ni leswaku leswi a swi dyondzeke swi hundzule vutomi byakwe. Hi tin’hweti tinharhu u fambise 200 wa tibuku leti nge Hanya Hi Masiku hi ndlela leyi ya xitshuketa.—w83 12/1 matl. 29-30.

⁵ Evutirhelini bya yindlu na yindlu, ku nyikela vumbhoni exitarateni, ku endla maendzo yo vuyela—ku bumabumeriwa leswaku muhuweleri un’wana ni un’wana a tilunghisela ku va ni kopi yin’we kumbe timbirhi leti nge Hanya Hi Masiku. U nga yi siyi loko u ya ensin’wini! Langutelo ra wena lerinene loko u vulavulela buku leyi, u hlamusela leswi nga endzeni ka yona ni ku yi fambisa ri ta pfula ndlela yo sungula tidyondzo to tala letintshwa ta Bibele.

⁶ Un’wana ni un’wana wa hina a khongelele ku pfuniwa hi Yehovha leswaku hi ta tirhisa nkarhi wun’wana ni wun’wana hi byela vanhu hi Muvumbi wa hina lonene. Lava tindlela to tirhisa buku leyi nge Hanya Hi Masiku. Onge xitirho lexi lexinene xi nga pfuxa ku tsakela ko hanya hi masiku eka vanhu vo tala, leswaku ku dzuneka ku ya eka Munyiki wa vutomi ni “[Muendli wa, NW] matilo ni misav̌a.”—Ps. 146:6.