Ku Hlangavetana Ni Ntlhontlho Wa Vutirheli Bya Yindlu Na Yindlu
1 Mhaka ya ku famba hi yindlu na yindlu, hi endzela vanhu lava taka hi ku famba, i ntlhontlho lowukulu eka lava landzelaka vugandzeri byo tenga. Kambe ku rhandza Yehovha hi ku helela swi pfuna munhu leswaku a langutana ni ntlhontlho lowu, hambi ku ri lava velekiweke va ri ni tingana va endle nhluvuko ku ya fika laha va vaka vachumayeri va mahungu lamanene va nkarhi hinkwawo.
2 Swi le rivaleni hi ku ya hi Bibele leswaku Vakreste vo sungula a va haxa mahungu lamanene ya Mfumo wa Xikwembu hi ku famba hi yindlu na yindlu. (Mint. 5:42; 20:20, 21) Tanihi Vakreste va lembe xidzana leri ra vu-20, na hina hi hlanganyela entirhweni lowu. Ku rhandza Xikwembu ni vaakelani va hina swi hi susumetela ku endla ntirho lowu hambi loko hi hlangana ni ku nga tsakeli, ku hlekuriwa, ku rhuketeriwa ni ku kanetiwa lokukulu.
3 Leswi Swi Hetisisiwaka Hi Ku Hlangavetana Ni Ntlhontlho: Nkarhi wun’wana ni wun’wana loko hi endza, hi lwela ku byala timbewu ti nga ri tingani ta ntiyiso, hi tiva leswaku eku heteleleni vuyelo lebyi hi byi kumaka ku nga ha va mihandzu ya Mfumo. (Ekl. 11:6) Swiyimo swa vanhu swa hundzuka. Ku nga ha humelela xilo lexi xi nga ha endlaka n’wini wa muti a ehleketa hi leswi un’wana wa hina a swi vuleke ekaya kakwe, naswona a nga ha hi amukela hi mandla mambirhi nkarhi lowu taka.
4 Vutirheli bya hina bya yindlu na yindlu byi nyika vanhu lava rhandzaka ntiyiso ni ku lulama nkarhi wo dyondza hi Yehovha ni swikongomelo swa yena, byi va nghenisa endleleni leyi yisaka evuton’wini lebyi nga heriki. Xisweswo lava hlongorisaka ntsako wa misava va tsundzuxiwa hi rirhandzu leswaku va fanele va hundzuka leswaku va ta amukeriwa hi Yehovha. Vutirheli lebyi nakambe byi twarisa vito ra Yehovha ni ku n’wi dzunisa, hambi vini va miti va yingisela kumbe va nga yingiseli.—Ezek. 3:11.
5 Ku tirha evutirhelini swi hi pfuna ku kurisa mihandzu ya moya, tanihi rirhandzu ro pfumala vutianakanyi, ntsako, ku rhula ni ku lehisa mbilu. (Gal. 5:22) Swi hi pfuna ku titsongahata ni ku va ni ntwela-vusiwana, tanihi leswi swi katsaka ku endlela van’wana leswinene. Ku tshama hi khomekile entirhweni wa Yehovha swa hi sirhelela eka misava.—1 Kor. 15:58.
6 Mpfuno Wo Hlangavetana Ni Ntlhontlho: Lavantshwa va fanele va dyondza ndlela yo hlanganyela entirhweni lowu wo tsakisa swinene. Hakanyingi va pfumala ntshembo naswona hi ndlela yoleyo va nga ha hela matimba yo famba hi yindlu na yindlu. Hi nga bula na vona hi minkaneto leyi tolovelekeke ni hi leswi hi nga swi vulaka loko hi hlamula. Hi nga titoloveta ku tirhisa swiringanyeto swin’wana leswinene leswi nga ebukwini leyi nge Reasoning swa ku hlamula vatsemi va mabulo. Ha yini u nga kombeli ku va pfuna ku lunghiselela vutirheli bya nsimu? Va nga tlhela va kuma mpfuno lowukulu hi ku hamba va va kona eminhlanganweni ya ntirho wa nsimu kutani va tirha ni vahuweleri lava nga ni ntokoto swinene. Ku tirha ni ntlawa swi nga nyika matimba.
7 Loko hi famba hi yindlu na yindlu, hi ni lunghelo ro yimela Xikwembu xa hina, Yehovha. Hi kwihi ku dzuneka kun’wana lokukulu loku munhu a nga vaka na kona ku tlula ku va mutirhi-kulobye ni Xikwembu? (1 Kor. 3:9) Loko hi tshembela eka yena, moya wa yena wu ta hi pfuna hi hlangavetana ni ntlhontlho wa vutirheli bya yindlu na yindlu.—2 Kor. 3:5.