Vantshwa—Kongomisani Mikondzo Ya N’wina Hi Vutlharhi
1 Tata wa hina Yehovha, u tsakela nhluvuko wa vantshwa. Hi ku yingisela milawu yakwe ya rirhandzu, vantshwa va tsakisa mbilu ya yena va tlhela va phyuphyisa mimoya-xiviri ya vona. (Swiv. 27:11; Mt. 11:28-30) Va pfumelela Yehovha a kongomisa mikondzo ya vona hi vutlharhi.—Swiv. 16:9.
2 Kreste Yesu u veke xikombiso evuntshweni byakwe tanihi loyi a amukeriweke hi Xikwembu ni vanhu. (Lk. 2:52) Vantshwa namuntlha va fanele va tikarhatela ku endla leswi fanaka. Muntshwa la kongomisaka mikondzo yakwe hi vutlharhi u fanele a vonaka hi ku landzelela ka yena swilo swa moya. Loko a ri ni malembe ya 12, Yesu a a tiviwa hi ku navela ka yena ku vulavula ni van’wana hi Yehovha. (Lk. 2:46, 47) Vantshwa namuntlha va kombe ku navela loku fanaka ko hlamusela ripfumelo ra vona eka van’wana.—wTS90 matl. 29-30; wTS87 12/1 tl. 21.
3 Xana n’wina vantshwa mi nga endla yini sweswi, ngopfu-ngopfu ni le ka tin’hweti leti taka leswaku mi “ḍunisa Yehova hi rifuwo ra [n’wina]”? (Swiv. 3:9) Ha yini u nga engeteli nkarhi lowu u wu tirhisaka entirhweni wo chumayela ni ku dyondzisa mahungu lamanene, kumbexana u va phayona leri pfunaka? U nga hlamala hi ntsako lowukulu ni mimbuyelo yin’wana leyi yi vaka kona loko u hlanganyela hi xitalo evutirhelini. Leswi nakambe swi ta ku nyika nkarhi wo tirha entirhweni wa nsimu swin’we ni vahuweleri vo tala vo hambana-hambana. U nga ha swi kota ku sungula ka ha ri sweswi hi ku rhamba muhuweleri un’we kumbe vambirhi lava nga ni ntokoto leswaku va tirha na wena eka mahelo-vhiki lawa.
4 Vatswari va nga nyika xikhutazo ni mpfuno lowukulu eka vana va vona hi ku tirhisa minkarhi yo titoloveta swin’we ni ku famba na vona evutirhelini. Van’wana lava tiyeke evandlheni va nga veka xikombiso hi ku kombela vantshwa leswaku va famba na vona evutirhelini bya yindlu na yindlu ni le ka maendzo yo vuyela ni le ntirhweni wa tidyondzo ta Bibele. Ku hlangana lokukulu ni vahuweleri vo tano lava tiyeke emoyeni ku ta aka vantshwa ni ku va pfuna va “kongoma eku hetisekeni.”—Hev. 6:1.
5 Mukreste un’wana ni un’wana u fanele ku antswisa vuswikoti byakwe byo dyondzisa. Vantshwa na vona va fanerile. Xana n’wina lavantshwa ma swi lunghiselela swiavelo leswi mi nga ha vaka ni lunghelo ro swi nyikela eXikolweni xa Vutirheli bya le Tilweni? Xana mi ni xiyimiso xa nkarhi na nkarhi xa ku hlaya ni dyondzo ya n’wina vini ni nkarhi wa ku anakanyisisa? Xana mi hatlisa mi tirhisa mhaka leyi mi yi hlayaka? Xana mi yi lunghiselela kahle minhlangano leswaku mi twisisa mhaka ya kona hi xitalo, mi lunghekela ni ku hlamula? Xana mi tsala tinhla leti pfunaka leti boxiwaka hi nkarhi wa nhlangano ivi mi ringeta ku tirhisa swiringanyeto leswi nyikiweke eka Vutirheli Bya Hina Bya Mfumo?
6 U nga lahlekeriwi hi minkarhi yo hlanganyela eku basiseni ka Holo ya Mfumo ni ku pfuna vamakwerhu va xinuna ni va xisati lava kuleke kumbe lava nga swigono, u va pfuna hi mintirho ya le kaya kumbe hi tindlela tin’wana letinene. U nga honisi ku endla minyikelo ya wena ya nkarhi na nkarhi yo pfuna ku khathalela swilaveko swa Holo ya Mfumo ni ntirho wa misava hinkwayo wa Sosayiti.
7 Loko hi ‘tshama hi xalamukile hi ku ya hi rito ra Yehovha’ naswona hi n’wi pfumelela a kongomisa mikondzo ya hina, u ta hi yisa entsakweni ni le ka malunghelo man’wana ya ntirho.—Ps. 119:9.