Xihondzo xo Rindza Ni Xalamuka!—I Timagazini Leti Nga Ni Ntiyiso
1 Nkandziyiso wa Xihondzo xo Rindza, wa January 1, 1994, tluka 22, wu hi tsundzuxile leswaku timagazini ta hina ti humesa “swihloko leswi nga enkarhini leswi hlangavetaneke ni swilaveko swa xiviri swa vanhu.” Hi lava ku ti hangalasa swinene timagazini leti. Hi tin’hweti ta April na May, Xihondzo xo Rindza ni Xalamuka! ti ta fambisiwa evutirhelini bya hina, hi ti fambisa tanihi swikhokhelo. Hambi leswi xikhokhelo xa Xihondzo xo Rindza ku nga nyiko ya kona, eswiyin’weni swo tala hi ta fambisa xikhokhelo xa timagazini leti ha timbirhi.
2 Ntirho wa yindlu na yindlu wu hi nyika nkarhi lowunene wa ku fambisa timagazini leti. Ku nyikela vumbhoni bya xitshuketa lebyi humelelaka ni maendzo yo vuyela, na swona swi endla leswaku hi kota ku ti fambisa nkarhi na nkarhi. Ku nyikela vumbhoni eswitarateni ni ku ya etindhawini ta mabindzu ta le nsin’wini ya ka hina na tona i tindlela leti humelelaka to kuma swikhokhelo ni ku engetela timagazini leti hi ti fambisaka.
3 Timhaka To Vulavula Ha Tona: Nkandziyiso wa April 1 wa Xihondzo xo Rindza wu kambisisa tinhloko-mhaka leti nge “Misava Yo Antswa—Xana Ko Va Norho Ke?” ni leyi nge “Misava Yo Antswa—Yi Tshinele!” Leswi swi fambisana kahle hakunene ni xikongomelo xa magazini lowu xo huwelela Mfumo wa Xikwembu. Xihloko xa vumbirhi xi gimeta hi ku kombisa ndlela leyi paradeyisi yi nga ta va ya xiviri ha kona ehansi ka vuhosi bya Kreste Yesu.—Lk. 23:43.
4 “Xana U Nga Wu Kuma Kwihi Nkongomiso Wo Tshembeka?” i xivutiso lexi ku vulavuriwaka ha xona enkandziyisweni wa April 15. Minkandziyiso ya May yi ta yisa mhaka leyi emahlweni eka swihloko leswi nge “Xana Vukhongeri Bya Swi Enerisa Swilaveko Swa Wena?” ni lexi nge “Ha Yini U Hlaya Bibele?” Hi fanele hi swi kota ku sungula mabulo hi ku olova ni vanhu lava vonaka leswaku vutomi bya vona a byi vuli nchumu naswona a byi na xikongomelo.
5 Ku Engetela Nhlayo Leyi Hi Yi Fambisaka: Xihondzo xo Rindza xa January 1 xi nyikele swiringanyeto swa mune swo engetela nhlayo leyi hi yi fambisaka. Hi khutaziwe leswaku (1) hi ti tiva kahle timagazini. Loko hi ti hlaya, hi fanele hi ehleketa hi swihloko leswi swi nga ta tsakisa vanhu va le nsin’wini ya hina. Nakambe, loko nkarhi na nkarhi hi famba ni tikopi, hi nga ha ti fambisela vatirhi-kulorhi, vaakelani, vadyondzisi, lava hi dyondzaka na vona xikolo kumbe vaxavi.
6 Hi tsundzuxiwile leswaku (2) hi olovisa rungula ra hina. Hi hlawula yinhla yin’we leyi tsakisaka ivi hi yi veka hi marito yo koma. Loko wo swi kota ku endla leswaku n’wini wa muti a amukela magazini, wona wu ta “tivulavulela” eka munhu loyi u hlanganeke na yena kumbe eka van’wana va le ndyangwini.
7 Xilaveko xin’wana i (3) ku pfumelelana ni swiyimo. I swinene ku tiva swihloko swo hambana-hambana leswi u nga vulavulaka ha swona—xin’wana xi va xa vantshwa, xin’wana xi va xa vavanuna naswona kumbexana xin’wana lexi hambaneke xi va xa vavasati.
8 Xo hetelela, hi fanele hi (4) tivekela pakani ya munhu hi xiyexe ya nhlayo leyi hi nga yi fambisaka. Hambi leswi vandlha ri nga ta ka ri nga hi vekeli nhlayo yo karhi, hi nga tivekela pakani hi hexe. Leswi swi nga hi susumetela ngopfu leswaku hi hiseka eku fambiseni ka timagazini. Loko hi fambisa nhlayo leyi ringanaka ya timagazini, hi nga susumeteleka ku fambisa ku tlula kwalaho.
9 Hi lava leswaku van’wana va tiva hi Mfumo wa Xikwembu. A hi wu tirhiseni kahle mpfuno lowunene lowu humaka eka timagazini leti eku haxeni ka rungula ra Mfumo.—Mt. 10:7.