Ku Pfuneka Hi Xitalo eXikolweni Xa Vutirheli Bya Le Tilweni
1 Xikolo xa Vutirheli bya le Tilweni xi tirhisiwe ku hi letela eku “dyondziseni,” leswaku hi ta swi kota ku hundzisela mintiyiso ya Bibele eka van’wana hi ndlela leyi humelelaka. (2 Tim. 4:2) Eka tinhloko-mhaka to hambana-hambana ta Bibele ta vhiki na vhiki hi kuma vutivi bya nkoka. Xana hi nga tiyiseka njhani leswaku ha pfuneka hi ku hetiseka eka ndzetelo lowu wa nkoka wa xikolo?
2 Rhiya ndleve eka marito yo pfula ya mulanguteri wa xikolo loko a ri karhi a boxa tinhla tin’wana to tsakisa leti hi nga ta ti dyondza enhlanganweni wolowo. Ehleketa hi swivutiso swihi na swihi leswi a nga ha swi vutisaka ni ndlela leyi u nga ha tirhisaka tinhlamulo ta kona ha yona loko u ri evutirhelini.
3 Nkulumo ya ndzayo a ko va mpfuxeto ntsena wa mhaka leyi tsariweke. Yi komba ndlela leyi mhaka leyi yi nga tirhaka ha yona ni ndlela leyi u nga pfunekaka ha yona. Ku lunghiselela ka ha ri emahlweni swi ta ku pfuna ku yingiserisisa tinhla-nkulu ni ku hlamula swivutiso leswi nga ta landzela.
4 Ku fambisana ni ku hlaya ka Bibele ka vhiki na vhiki ku nga ha engetela ku tsakela ka wena Rito ra Xikwembu. Vulavisisi lebyi engetelekeke byi nga ha paluxa vuxokoxoko lebyintshwa ni lebyi tsakisaka lebyi nga ta kurisa ku twisisa ka wena ntiyiso. Ku nyikeriwa ka tinhla-nkulu ta Bibele a hi ku phindha-phindha mhaka ya Bibele ntsena. Endzhaku ko hlanganisa mhaka hinkwayo hi ku komisa, xivulavuri xi ta boxa tinhla leti engetelekeke eka xiphemu lexi xi averiweke xona ivi xi kombisa ndlela leyi ti khumbaka vutomi ni vugandzeri bya hina ha yona. Yingisela leswaku u ta dyondza ndlela yo antswa yo tirhisa vuleteri bya Bibele.—Ps. 119:105.
5 Loko u averiwe nkulumo ya xichudeni, xiya yinhla ya ndzayo leyi u tirhelaka eka yona hi nkarhi wolowo. Hlaya swiringanyeto leswi nyikeriweke eka Buku Yo Letela Ya Xikolo leswi vulavulaka hi ntikelo wa mhaka yoleyo, ivi u ringeta ku swi tirhisa. Loko u hlawula mhaka ya nkulumo ya wena, ringeta ku kandziyisa tinhla leti nga ta tirha ensin’wini.—sg-TS matl. 96-9.
6 Loko u ri makwerhu wa xisati u averiwe ku nyikela Nkulumo ya Vu-3 kumbe Nkulumo ya Vu-4, ringeta ku nyikela mhaka hi mavekelo lama tolovelekeke. N’wini wa muti swi nga ha endleka a pfumela kumbe a nga pfumelelani na hinkwaswo leswi u swi vulaka; chivirikela ku kombisa ndlela leyi u nga pfunaka munhu yoloye ku anakanyisisa a ri karhi a tirhisa misinya ya milawu ya Bibele. (sg-TS matl. 153-8) Leswi swi pfuna vayingiseri ku vona ndlela leyi va nga langutanaka ha yona ni ku kanetiwa loku fanaka loko va hlangavetana na kona entirhweni wa nsimu. Lunghiselela ka ha ri emahlweni, naswona u hlela leswaku mi titoloveta swona ka ha ri na nkarhi ni n’wini wa muti. A swi laveki leswaku mi titoloveta endzhaku ka loko nhlangano wu sungurile.
7 Swichudeni leswi nyikelaka tinkulumo swi khutaziwa ku tshamela emahlweni ka holo. Leswi swi hlayisa nkarhi naswona swi endla leswaku mulanguteri wa xikolo a swi kota ku vulavula na wena hi ku kongoma. Hinkwerhu hi nga vuyeriwa eka switsundzuxo swa tintswalo ni leswi kongomeke leswi a swi nyikelaka, leswi sekeriweke eka Buku Yo Letela Ya Xikolo. Swi nga ha endleka a nga landzeleli tinhla ta ndzayo hi ku landzelelana ka tona eka Xiphephana xa Nkulumo xa Ndzayo; u ta hlawula yinhla ya ndzayo leyi sekeriweke eka swilaveko swa wena swa nkarhi wolowo leswaku u endla nhluvuko lowu antswaka.
8 Hinkwaswo leswi i swivangelo leswinene swa leswaku hi lunghiselela ni ku va kona eXikolweni xa Vutirheli bya le Tilweni vhiki rin’wana ni rin’wana. Ndzayo leyi hi yi kumaka yi nga hi pfuna leswaku hi tlhariha naswona hi va ni vuswikoti evutirhelini bya hina.—Swiv. 1:5.