Byela Van’wana Ntiyiso Hi Ku Tirhisa Timagazini
1 Nkoka wa rungula ra ntiyiso, leri nga ra xiviri wu languteriwa ehansi ngopfu hi vanhu namuntlha hikwalaho ka ku navetisa loku hundzeletiweke, switshembiso leswi kanganyisaka swa politiki ni swihlambanyo leswi kanganyisaka emisaveni hinkwayo. Xihondzo xo Rindza ni Xalamuka! ti hlawulekile hikuva hi tona ntsena leti tivisaka ntiyiso mayelana ni Mfumo wa Xikwembu naswona ti hlamusela leswi hinkwerhu hi faneleke hi swi endla leswaku hi ta tsakela mikateko leyi nga heriki leyi wu nga ta yi tisa.
2 Etikweni rin’wana mutirhela-tiko wa swa marungula loyi a tsakeleke nkoka wa timagazini leti timbirhi hi ku tiyimisela u pfunile eku kumeni ka mpfumelelo wo ti hangalasa. U te: “Ndzi languta Xihondzo xo Rindza xi ri yin’wana ya timagazini letinene; ndzi swi tsakela ngopfu ku pfuna.” I lunghelo ra hina ku pfuna van’wana hi ku hangalasa timagazini leti nga nyikelaka vutivi lebyi nyikaka vutomi. (Yoh. 17:3) Xana u ta ti fambisa njhani timagazini leti ta nkoka hi May? Kumbexana swiringanyeto leswi landzelaka swi nga pfuna.
3 Loko u kombisa swihloko swo sungula eka “Xihondzo xo Rindza” xa May 15 u nga ha ku:
◼ “Hi vulavula ni vanhu hi buku leyi xaviwaka ngopfu emisaveni. Xana wa yi tiva? [Yimela nhlamulo.] Hi vulavula hi Bibele. Ku fanele ku ri ni xivangelo lexinene ngopfu lexi endleke vanhu vo tala va xava Bibele. Xivangelo xa kona xi kumeka eka 2 Timotiya 3:16.” Endzhaku ko hlaya tsalwa, vulavulela tinhla leti faneleke eka xin’wana xa swihloko. Fambisa xikhokhelo.
4 Kumbe endzhaku ka xingheniso xo koma, u nga ha vula swo fana ni leswi:
◼ “Kumbexana u swi xiyile leswaku emalembeni ya sweswinyana ku ve ni ku engeteleka ka ku karhateka emisaveni hinkwayo mayelana ni swiphiqo leswi langutanaka ni vana. Xana hi swihi swiphiqo swa vana leswi u swi vonaka endhawini leyi leswi ku karhataka?” Yimela nhlamulo. Vulavula hi swin’wana swa swiphiqo leswikulu leswi vana va langutanaka na swona emisaveni hinkwayo hi laha swi boxiweke ha kona eswihlokweni swo sungula swa Xalamuka! ya May 8, ivi u n’wi komba ntlhantlho lowu nyikeriwaka hi Mfumo wa Xikwembu.
5 Erhekhodweni ya wena ya maendzo yo vuyela, kumbexana u ni nxaxamelo wa lava kombiseke ku tsakela kutsongo eku sunguleni, kambe a ku vanga na vuyelo. Tanihi leswi va kombiseke ku tsakela kutsongo ntsena, swi nga ha endleka u nga voni xilaveko xa ku tshamela ku vuyela kona. Kambe u nga ha rhandza ku tirhisa nxaxamelo lowu ku aka ntila wa timagazini. Loko u xiya xihloko lexi u vonaka onge xi ta pfuxa ku tsakela eka munhu wo karhi, tiyiseka leswaku wa n’wi endzela munhu yoloye ivi u n’wi fambisela magazini wolowo kun’we ni xikhokhelo.
6 Ku Nyikela Vumbhoni Hi Xitshuketa: Leyi i ndlela leyinene ngopfu ya ku pfuxa ku tsakela eka timagazini. Ku kombisa swifunengeto leswi kokaka mahlo hi vutlhari swi nga ha va swi ringene leswaku u sungula bulo. Makwerhu un’wana wa xisati u veke minkandziyiso etafuleni rakwe leswaku vatirhi-kulobye va yi vona loko va hundza; u swi kotile ku fambisa to hlayanyana. Tiyiseka leswaku u famba ni tikopi to hlayanyana, naswona u endla matshalatshala yo ti fambisa n’hweti leyi loko u ya xava, u ya exikolweni, u famba hi bazi kumbe loko u hlangana ni vanhu kun’wana ni kun’wana.
7 Hi ku pfuniwa hi Xihondzo xo Rindza ni Xalamuka!, hi kume tinhlamulo ta nkoka mayelana na Yehovha ni vugandzeri byakwe. Hi lava ku tirhisa timagazini leti hi ndlela yin’wana ni yin’wana leyi kotekaka ku pfuna van’wana leswaku va tiva “Yehova, Šikwembu ša [ntiyiso, NW]!”—Ps. 31:5.