Minhlangano Ya Nkoka Ya Ntirho Wa Nsimu
1 Eka Luka 10:1-11, ku ni rhekhodo ya nhlangano lowu Yesu a veke na wona ni vadyondzisiwa va 70 lava a va ha ku hlawuriwa, a va pfuna ku lunghiselela ntirho wa nsimu. U va kongomise hi ndlela yo hlawuleka ku va pfuna leswaku va hleleka, va lunghiselela leswi va nga ta swi vula ni ku langutana ni swiyimo swo nonon’hwa. Hi nga dyondza hi ku kambisisa mhaka leyi.
2 Swi le rivaleni leswaku hinkwavo vadyondzisiwa va 70 a va ri kona ku ta hlangana na Yesu. Ku lahleka nkarhi wo tala loko vanhu van’wana va hlwela ku fika eminhlanganweni ya ntirho nkarhi na nkarhi. Hi ntolovelo ku fika ka vona endzhaku ka nkarhi swi endla leswaku mintlawa yi tlhela yi hleriwa hi vuntshwa ku katsa ni swiavelo swa nsimu. Hakanyingi leswi swi hlwerisa ntlawa hinkwawo. Hinkwerhu hi nga endla xiphemu xa hina hi ku fika hi nkarhi naswona xikan’we-kan’we hi lunghekela ku hundzela ensin’wini.
3 Yesu u nyike ntlawa wolowo nhloko-mhaka yo vulavurisana leyi a va ta yi tirhisa leyi nge, “Mfumo wa Xikwembu.” (Lk. 10:9) Hi averiwe ku chumayela rungula leri fanaka, naswona hi ntolovelo hi tsakela swiringanyeto leswi pfunaka mayelana ni leswi hi nga ta swi vula. Mufambisi a nga ha kombetela ebukwini leyi nge Reasoning, leyi nga ni swingheniso swo tlula 40 ni tindzimana leti faneleke ta Matsalwa leti nga tirhisiwaka ehansi ka swiyimo swo hambana-hambana. Mpfuxeto wo koma wa xingheniso xin’we kumbe swimbirhi wu nga hi pfuna hi va ni swo karhi swo swi vula, swi hi endla hi vulavula hi ntshunxekile emitini.
4 Yesu a nga byelanga vadyondzisiwa vakwe leswi va nga ta swi vula ntsena, kambe u va byele ni ndlela yo swi vula ha yona. (Lk. 10:5, 6) Minkombiso leyi vaka kona enongonokweni wa Nhlangano wa Ntirho yi kombisa ndlela leyi hi nga tiphofulaka ha yona hi laha ku humelelaka. Mufambisi a nga ha pfuxeta leswi nyikeriweke enhlanganweni lowu hundzeke ivi a nyika swiringanyeto swa ndlela leyi swi nga tirhisiwaka ha yona evutirhelini siku rero. Nkombiso wo koma wa mhaka yo olova ya Matsalwa wu nga hi pfuna leswaku hi hlanganisa leswi hi swi ehleketaka ivi hi swi vula hi marito ya hina.
5 Yesu u tlhele a byela vadyondzisiwa vakwe ndlela leyi va faneleke va tikhoma ha yona. (Lk. 10:7, 8) Hi ku fanana mufambisi a nga ha hi nyika nkongomiso lowu nga hi pfunaka ku papalata nchumu wun’wana ni wun’wana lowu nga kavanyetaka ntirho wa hina. A nga tlhela a hi tsundzuxa leswaku hi nga hlengeletani hi yima emahandzeni ya tindlela kumbe ku dya nkarhi hi phikizana ni vakaneti. A nga ha hi tsundzuxa ku hlayisa rhekhodo ya yindlu na yindlu leyi kongomeke. Vatswari va nga lava xitsundzuxo mayelana ni ku khathalela vana va vona hi vutlharhi.
6 Vadyondzisiwa volavo va 70 va yingisele swiletelo swa Yesu ivi va “tlhela hi ku ṭaka.” (Lk. 10:17, BX) Loko hi yingisela nkongomiso lowu hi wu kumaka eminhlanganweni ya ntirho, na hina hi nga langutela ntsako lowukulu eku chumayeleni ka rungula ra Mfumo.—Mint. 13:48, 49, 52.