Xana Va Ta Swi Twisa Ku Yini Loko Hi Nga Tlheleli?
1 “Va ta . . . twisa ku yini, loko va nga ri na mudyondzisi xana?” (Rhom. 10:14) Hakunene, xana va ta yi twisisa njhani nhlamuselo ya ntiyiso loko hi nga endli maendzo yo vuyela lama humelelaka? Emutini wun’wana ni wun’wana laha hi koteke ku vulavula ni n’wini wa muti hi rungula ra Mfumo ku laveka leswaku hi tlhelela. N’hweti leyi hi nga swi kota ku landzelela bulo ra hina ro sungula hi mianakanyo yin’wana ya Matsalwa leyi humaka exibukwanini xin’wana ni xin’wana lexi hi xi fambiseke, naswona sweswo swi nga hi yisa edyondzweni ya Bibele hi laha ku humelelaka.
2 Loko u fambise xibukwana lexi nge “Mahungu Lamanene Ya Mfumo,” u nga ha swi kota ku sungula bulo leri nga ta yisa edyondzweni ya Bibele hi ndlela leyi. Loko u kombetela exifunengetweni xa le mahlweni, u nga ha vutisa u ku:
◼ “Xana u nga rhandza ku hanya emisaveni leyi vumundzuku bya wena ni ndyangu wa wena byi tiyisekisiweke? [Yimela nhlamulo. Kutani u pfula eka ndzimana 42.] Hinkwerhu ka hina ha swi navela, hambi leswi vo tala va kanakanaka loko swi ta kala swi humelela. Eka Xikwembu, lexi tshembisaka leswaku leswi swi ta va ntiyiso, swi ta koteka.” Hlaya Mikiya 4:3, 4 tanihi laha yi tshahiweke ha kona eka ndzimana 42, kumbe u yi hlaya eBibeleni ya wena. Yana emahlweni u hlamusela leswaku va kona vanhu emisaveni hinkwayo lava ana se va kumaka ntsako ni ku rhula ka mianakanyo loku fambisanaka ni ntshembo lowu tiyeke wa vumundzuku. Boxa tinhla ta Matsalwa leti nga endzimaneni 43, ivi u hlamusela ndlela leyi dyondzo ya xibukwana lexi yi nga n’wi pfunaka ha yona n’wini wa muti leswaku a dyondza leswi engetelekeke. Loko munhu yoloye a tsakela, endla malunghiselelo ya riendzo ro vuyela hi xihatla leri nga ta yisa bulo emahlweni.
3 Loko u tlhelela endzhaku ko fambisa broxara leyi nge “Xana Xikwembu Xa Hi Khathalela Hakunene?,” kumbexana swo fana ni leswi swi nga humelela:
◼ “Eriendzweni ra mina leri hundzeke, hi bule hi xivutiso lexi nge, Xana xi kona Xikwembu lexi khathalelaka? Xana u ehleketa leswaku Xikwembu xi hi khathalela kahle lerova xi nga herisa ku xaniseka ni madzolonga? [Endzhaku ka loko munhu yoleyo a hlamurile, pfula eka ndzimana 22, eka tluka 27 ivi u ya emahlweni.] Xikwembu xi tshembise leswaku xi ta siva misava leyi yo biha hi leyintshwa leyi ku nga ta tshama vanhu lavanene lava nga ta hanya hi ku rhula. [Hlaya Pisalema 37:11.] Mina na wena hi nga tsakela vutomi emisaveni yoleyo leyintshwa loko hi tshemba Bibele naswona hi tirhisa switsundzuxo swa yona.” Hlamusela lunghiselelo ra hina ro pfuna vanhu leswaku va dyondza Bibele.
4 Loko u endla riendzo ro vuyela endzhaku ko fambisa broxara leyi nge “Vonani, Ndzi Endla Swilo Hinkwaswo Swi Va Leswintshwa”!, u nga ha sungula hi ku n’wi kombisa xifaniso lexi nga exifunengetweni ivi u n’wi vutisa xivutiso lexi nge:
◼ “Xana u anakanya leswaku swi nga va njhani ku hanya emisaveni leyi hetisekeke? [Kuma nhlamuselo ya n’wini wa muti.] Leswi u swi vonaka exifanisweni lexi a hi swilo leswi ehleketiwaka ntsena; kambe swi sekeriwe eswitshembisweni swa xiviri leswi tsariweke eBibeleni. [Hlaya Nhlavutelo 21:4 na Pisalema 37:11, 29.] Ndzi lava ku ku hlamusela ndlela leyi wena ni ndyangu wa wena mi nga kumaka nkateko lowu ha yona.” Loko n’wini wa muti a kombisa ku tsakela, yisa bulo emahlweni ivi u n’wi tshembisa dyondzo ya Bibele.
5 Loko hi kuma vanhu lavanene lava lavaka ntiyiso, hi kombisa rirhandzu ra hina ra xiviri hi ku tlhelela hi ya va pfuna leswaku va teka goza mayelana ni leswi va swi tweke. Hi tirhisa ntiyiso wo kwetsima lowu hi nyikiweke wona leswaku hina ni lava va hi yingisaka hi pfuneka hi laha ku nga heriki.—1 Tim. 4:16.