Pfuna Van’wana Va Dyondza Ntiyiso
1 Yesu u te emisaveni leswaku a ta nyikela vumbhoni bya ntiyiso. U letele vadyondzisiwa vakwe leswaku va va vadyondzisi, a endlela leswaku ntiyiso wu chumayeriwa eka van’wana. A a tiyiseka ngopfu leswaku va ta humelela eku dyondziseni ka van’wana lerova u va vitane ‘vadyondzisi va le rivaleni.’ (Mt. 13:52, NW) U fanise un’wana ni un’wana wa vona ni munhu la dyondzekeke loyi a nga ni tindhawu ta xiviri ta xuma laha a nga ta xi pambula kona. Namuntlha vadyondzisiwa va Yesu va tirhisa minkandziyiso ku hatlisisa ntirho wo chumayela ta Mfumo. N’hweti leyi hi ta va hi fambisa xibukwana lexi nge “Mahungu Lamanene Ya Mfumo” evanhwini va le nsin’wini ya hina. Laha xibukwana lexi xi nga riki kona, hi ta fambisa broxara. Xana switirho leswi swa nkoka swi nga tirhisiwa hi ndlela yihi?
2 Ku sungula bulo leri nga ta endla leswaku u fambisa xibukwana lexi nge “Mahungu Lamanene,” u nga ha vutisa u ku:
◼ “Xana u tshama u tivutisa leswaku ha yini ntshembo wa vumundzuku lebyi hlayisekeke wu ri wutsongo hi ndlela leyi, ku nga khathariseki matshalatshala hinkwawo ya munhu? [Yimela nhlamulo.] Bibele ya hlamusela leswaku ha yini matshalatshala yo tala swonghasi ma tsandzekile.” Hlaya Pisalema 146:3, 4. Endzhaku ko vulavurisana ni n’wini wa muti hi rungula leri nga eka ndzimana 41, u nga ha vutisa: “Xana i mani loyi hakunene a nga swi kotaka ku hi nyika nsirhelelo lowu nga heriki?” Hi ku ya hi ndlela leyi n’wini wa muti a angulaka ha yona, u nga ha ehleketa ku vulavula hi tinhla leti faneleke leti nga eka ndzimana 42 kumbe u hlela ku endla tano eriendzweni ra wena leri taka.
3 Hi leyi ndlela yin’wana leyi u nga ha yi tirhiselaka broxara leyi nge “Xana Xikwembu Xa Hi Khathalela Hakunene?”:
◼ “Vanhu vo tala va vutise swivutiso leswi nga le xifunengetweni xa broxara leyi. [Hlaya swivutiso swa kona, ivi u yimela nhlamulo.] Tanihi leswi Xikwembu lexi nga ni rirhandzu xi nga taka xi nga hlohloteli leswinene ni leswo biha hi nkarhi wun’we, xana u ehleketa yini hi xitshembiso xa xona lexi rhekhodiweke laha eka Esaya 65:21-24?” Loko u kuma nhlamulo leyi kombisaka ku tsakela ko karhi, pfula eka tindzimana 1 na 2 eka tluka 3, ehansi ka nhloko-mhaka leyi nge “Misava Leyi Pfumalaka Ku Xaniseka,” ivi u hlamusela leswi nga ta endliwa hi Mfumo wa Xikwembu.
4 Loko u fambisa broxara leyi nge “Vonani, Ndzi Endla Swilo Hinkwaswo Swi Va Swi Leswintshwa”!, u nga ha ku:
◼ “Ndzi lava ku ku byela hi mahungu lamanene mayelana ni xitshembiso lexi tshembekaka xa leswaku ku nga ri khale ku ta va ni ku rhula emisaveni hinkwayo. Xana a wu nge swi tsakeli ku vona nchumu wo tano? [Yimela nhlamulo.] Hinkwerhu hi ya vonile matshalatshala ya vanhu yo lava ku fikelela pakani leyi. Kambe xiya leswaku i mani loyi Bibele yi vulaka leswaku hi yena a nga ta tisa ku rhula loku nga heriki. [Hlaya Pisalema 46:8, 9.] Loko nyimpi ni lava va yi hlohlotelaka swi nga ha ri kona, Xikwembu a xi nge he tlheli xi pfumelela nyimpi emisaveni. Swiyimo swo tano swo rhula swi kombisiwe eka xifaniso lexi. [N’wi kombise xifunengeto xa le mahlweni ni xa le ndzhaku xa broxara leyi nge, “Vonani”!] Xana u nga rhandza ku hanya ehansi ka swiyimo leswi? [Yimela nhlamulo.] Broxara leyi yi pfune vanhu vo tala ku dyondza hi switshembiso leswi leswinene. Kopi leyi yi nga va ya wena hi munyikelo wa 90 wa tisente ntsena.”
5 Loko a tirhisa broxara leyi nge “Tsakela Vutomi eMisaveni Hi Masiku!,” muhuweleri lontsongo a nga ha vutisa:
◼ “Xana u nga swi tsakela ku hanya emisaveni ya paradeyisi yo tani? [N’wi kombise xifunengeto xa le mahlweni ni xa le ndzhaku, ivi u n’wi yimela a vulavula.] Mina ni ndyangu wa ka hina hi langutela ku ya hanya kwalaho hikwalaho ka leswi Bibele yi swi vulaka laha eka Yohane 17:3.” Endzhaku ko hlaya tsalwa, fambisela munhu yoloye broxara leswaku a yi hlaya hi munyikelo wa 90 wa tisente.
6 Loko u tirhisa tibroxara tin’wana evutirhelini bya wena n’hweti leyi, u nga ha lunghiselela swingheniso swa wena ni marungula ya wena ku fana ni swiringanyeto leswi hundzeke. U nga rivali ku komisa ni ku vulavula hi ndlela leyi akaka leswaku u ta pfuxa ku tsakela ka vini va miti.
7 Yehovha u hi nyike ntiyiso. Hi fanele hi yi tirhisa kahle minkarhi leyi hi nga na yona ku avelana wona ni van’wana, hi ndlela leyi tsariweke ni hi ku vulavurisana ni vanhu lava hi hlanganaka na vona. Hi ndlela leyi hi tikombisa hi ri vadyondzisi va le rivaleni vo pfuna van’wana hi laha ku nga heriki.—Mt. 28:19, 20.