Xana U Nga Tlhela U Nghenela Ntirho Wa Vuphayona?

¹ Emalembeni ya ntlhanu lama hundzeke, magidi ya maphayona ya nkarhi hinkwawo ma boheke ku tshika ntirho wa vuphayona. Xana a wu ri un’wana wa vona? Loko swi ri tano, a swi kanakanisi leswaku a wu ri ni xivangelo xo tshika lunghelo leri. Kumbexana ku vile nchumu lowu a wu nga wu rindzelanga, lowu a wu nga ta wu lawula. Xana xiyimo xa ha ri tano? Loko ku vile xiphiqo xa rihanyo, xa timali kumbe vutihlamuleri bya ndyangu leswi endleke leswaku u boheka ku tshika, xana swiyimo swa wena se swa antswa? Xana u nga endla mindzulamiso leyi faneleke leyi nga ta ku pfumelela ku tlhela u kuma malunghelo ya vuphayona bya nkarhi hinkwawo nakambe? Xana u tshame u anakanya hi ku tlhela u endla xikombelo?

² Hi laha u tivaka ha kona, ku hleleka kahle ni xiyimiso lexi endliweke hi vukheta swa laveka loko u lava ku humelela tanihi phayona. Hambi leswi hi ntolovelo ku nga riki na nkarhi wo tala wo tihungasa, hakanyingi minkarhi yo wisa yo koma ya phayona yi tikomba yi enerisa ni ku vuyerisa swinene. (Swiv. 19:​17; Mint. 20:​35) Hi ku tshama u khomekile entirhweni, u sirhelelekile eka nkucetelo wa vutianakanyi, ku hlongorisa vutomi bya vulovolovo lebyi landzeleriwaka hi misava. Yehovha u tshembise leswaku u ta ku fuwisa hi tlhelo ra moya loko u tinyiketela ni ku rhangisa swilaveko swa Mfumo. Kunene u ta kuma ntsako wa xiviri ni ku eneriseka hi ku tinyiketela entirhweni wa Yehovha hi mbilu hinkwayo.​—⁠Swiv. 10:​22; Kol. 3:​23, 24.

³ Xana vutirheli bya nkarhi hinkwawo byi fanele byi langutiwa byi ri lunghelo ra vanhu va nga ri vangani ntsena vo hlawuleka? Doo. Hi ku ya hi xiboho xa hina xa ku tinyiketela, Mukreste un’wana ni un’wana u fanele ku anakanyisisa hi vuenti hi ntirho wa nkarhi hinkwawo handle ka loko swiyimo swi nga n’wi pfumeleli.​—⁠Mar. 12:⁠30.

⁴ Loko rihanyo ni vutihlamuleri bya wena bya Matsalwa swi nga ku pfumeleli nikatsongo ku phayona sweswi, tiyiseka leswaku Yehovha wa swi tiva ni ku swi twisisa. U ta ku hakela hi vutshembeki bya wena eka leswi swiyimo swa wena swi ku pfumelelaka swona. (1 Kor. 4:⁠2; 2 Kor. 8:​12) Kambe loko sweswi swi ku pfumelela ku phayona nakambe, ha yini u nga vonani na mulanguteri la ungamelaka ivi u kombela fomo ya xikombelo xa vuphayona?

⁵ Xana Ndyangu Wa Wena Wu Nga Pfuna? U nga ha va u tshike vuphayona hikwalaho ka ku va u lava ku khathalela vutihlamuleri bya ndyangu. Xana swirho leswin’wana swa ndyangu se swi nga swi kota ku pfuna leswaku u tlhela u nghenela ntirho wa vuphayona? Eka van’wana, hikwalaho ka mpfunonyana lowu va wu kumaka wo khathalela vutihlamuleri byo karhi, va nga swi kota ku tlhela va sungula ku phayona.

⁶ Ntirhisano lowunene ni matshalatshala lama engetelekeke ya swirho leswin’wana swa ndyangu swi nga ha endla leswaku leswi swi koteka. Mpfuno wu nga ha va hi tlhelo ra swa timali kumbe swo famba, ni ku tirha ni loyi a phayonaka nkarhi na nkarhi entirhweni wa le nsin’wini. Kumbexana ku ni tindlela tin’wana leti va nga pfunaka ha tona. Loko swiyimo swi nga ku pfumeleli leswaku u nghenela lunghelo ra ntirho nakambe, kumbexana un’wana endyangwini a nga pfuniwa leswaku a endla tano.

⁷ Ha yini mi nga burisani hi mhaka leyi tanihi ndyangu? Swi nga koteka leswaku xirho xin’wana xa ndyangu xi va phayona loko mi swi endla hi ndyangu. Loko phayona rin’wana ri engetela nhlayo ya maphayona, swi fanerile leswaku ndyangu hinkwawo wu titwa wu hoxe xandla. Moya wo tano wo hanana a wu nge engeteli vumbhoni bya Mfumo ensin’wini ntsena, kambe wu ta tlhela wu endla leswaku ndyangu wu hlangana emoyeni.​—⁠Lk. 6:​38; Flp. 2:​2-⁠4.