Xihondzo xo Rindza Ni Xalamuka!—Timagazini Ta Minkarhi Ya Hina Ya Nkoka!
1 Hi ku hetiseka ka vuprofeta bya Bibele, ku humelela swiendlakalo leswikulu ngopfu emisaveni! Loko hi anakanyisisa hi leswi swi humelelaka emisaveni ni le xikarhi ka nhlengeletano ya swa le tilweni, hi nga yi twisisa kahle ndlela leyi swi nga swa xihatla ha yona leswaku hi chumayela ‘mahungu lamanene’ ya Mfumo. (Mar. 13:10) Leswi swi hi nyika xivangelo xo ya emahlweni ni vutirheli bya hina hi ku hiseka hi n’hweti ya April.
2 Nkoka wa rungula ra hina wu kandziyisiwa hi ntirho wo hlawuleka lowu hi nga ta wu nghenela n’hweti leyi. Hi mahlo-ngati hi langutele ku humesiwa ka xiphephana xa Kingdom News lexi hi nga ta xi hangalasa hi April na May. Leswaku hi aka ku hisekela ka hina ntirho lowu ku katsa ni ku hlakulela ku tsakela ensin’wini ya hina, Xihondzo xo Rindza ni Xalamuka! ti ta va ti rhwele swihloko leswi nga enkarhini leswi kandziyisaka nkoka wa vuprofeta wa swiendlakalo swa misava leswi kavanyetaka. Hi April ku fambisiwa xikhokhelo xa Xihondzo xo Rindza. Van’wana va nga ha tsakela ku fambisa xikhokhelo xa Xihondzo xo Rindza ni Xalamuka! Xana hi nga ri lunghiselela njhani rungula leri nga ta pfuxa ku tsakela timagazini?
3 Handle ko kanakana u ta swi kota ku endla rungula leri humelelaka hi ku landzelela magoza lawa ya xisekelo: (1) Hlawula xihloko eka yin’wana ya timagazini lexi u vonaka leswaku xi nga tsakisa vanhu va le ndhawini ya ka n’wina. (2) Hlawula mhaka kumbe tsalwa leri tshahiweke exihlokweni xexo leri u tshembaka leswaku ri ta pfuxa ku tsakela eka n’wini wa muti. (3) Lunghiselela rungula ro koma leri katsaka ku pfuxela ka xinghana, xivutiso kumbe mhaka leyi kandziyisaka mhaka yo tsakisa ya Matsalwa ni xirhambo lexi humaka embilwini xo endla munhu leswaku a amukela timagazini. Hi laha u nga vonaka ha kona, leswi swa olova naswona a swi rharhangananga. Kumbexana u nga hlangana ni muhuweleri un’wana loyi u tirhaka na yena evutirhelini ivi mi lunghiselela rungula.
4 Tanihi leswi “Xalamuka!” ya May 8 yi vutisaka xivutiso lexi nge, “Xana Lawa I Masiku Ya Makumu?,” u nga ha pfuxeta mhaka leyi nga le hansi ka nhloko-mhaka leyi nge “Masiku Ya Makumu” eka tluka 13 ra buku leyi nge “Reasoning.” U nga ha sungula hi ku vula u ku:
◼ “Hi endzele ku ta bula hi nhlamuselo ya swiendlakalo swa mpfilumpfilu leswi humelelaka laha hi nga kona. Xiya leswi xihloko lexi xi swi vulaka . . .”
5 “Xihondzo xo Rindza” xa April 1 xi vutisa xivutiso lexi nge: “Vukhongeri—Xana Swa Yila Ku Vulavula Ha Byona?” Loko u fambisa magazini lowu u nga ha ku:
◼ “Hakanyingi ku vuriwa leswaku vukhongeri i mhaka leyi swi nga fanelangiki ku buriwa ha yona hikuva ya tikaneta. Xana u anakanya yini hi sweswo?” Kutani kombetela eka marito yo karhi exihlokweni.
6 U nga ha va u tirhisa “Xihondzo xo Rindza” xa April 15 lexi nga ni xihloko lexi nge “Xana Swa Koteka Ku Kuma Ntiyiso Wa Vukhongeri?” U nga ha kuma n’wangulo lowunene hi xingheniso lexi:
◼ “Hikwalaho ka leswi ku nga ni vukhongeri byo tala namuntlha, vanhu van’wana va tivutisa loko swi koteka ku kuma ntiyiso wa vukhongeri. Xihloko lexi xi paluxa ndlela leyi mina na wena hi nga kumaka ha yona nhlamulo leyi enerisaka eka xivutiso lexi. . . .”
7 U nga si ya ensin’wini, ha yini u nga titoloveti rungula ra wena ni muhuweleri un’wana leswaku u ri tiva kahle? Kumbexana mi ta kota ku avelana swiringanyeto leswi pfunaka leswi nga ta engetela ku humelela ka wena swi tlhela swi ku nyika xivindzi lexi engetelekeke.
8 Tanihi leswi makumu ya mafambiselo lawa ya swilo ma tshinelaka, onge hi nga engetela matshalatshala ya hina yo pfuna vanhu va timbilu letinene leswaku va huma eBabilona Lonkulu. (Nhlav. 18:4) Xihondzo xo Rindza ni Xalamuka! swi endla xiphemu xa nkoka entirhweni lowu nga ta ka wu nga phindhiwi. Hi khensa swinene leswi Yehovha a hi nyikeke switirho leswi leswinene leswaku hi swi tirhisa!