Yehovha U Nyika Matimba
1 Leswi hi nga vanhu va Yehovha, hi nyikiwe xiavelo xo chumayela mahungu lamanene hi ri karhi hi hlayisa mahanyelo ya hina ‘ma ri lamanene exikarhi ka vamatiko.’ (1 Pet. 2:12; Mt. 24:14) Hikwalaho ka minkarhi leyo nonon’hwa kun’we ni ku tsana ni swihoxo swa hina vini, a hi nge wu hetisisi ntirho lowu hi ri hexe. (2 Tim. 3:1-5) Mawaku ndlela leyi hi tsakaka ha yona leswi hi nga tshembelaka eka Yehovha leswaku a hi pfuna!
2 Muapostola Pawulo u tiyisele miringo yo tala. (2 Kor. 11:23-27) Xana u swi kotise ku yini ku langutana ni miringo leyi ni ku heta ntirho lowu a averiweke wona? Yehovha u n’wi nyike ‘matimba lama tlulaka lama tolovelekeke.’ (2 Kor. 4:7) Pawulo a a xiya mpfuno wo tano wa Xikwembu loko a tsala a ku: “Ndzi nga endla hinkwaswo hi matimba ya Loyi a ndzi tiyisaka.” (Flp. 4:13) Yehovha u ta hi pfuna hi ndlela leyi fanaka. Xana hi nga wu kumisa ku yini mpfuno lowu?
3 Hi Ku Khongela Hi Matimba: Yesu u hi khutaze leswaku hi ‘hambeta hi kombela, hi lava ni ku gongondza,’ naswona hi nga heli matimba. (Lk. 11:5-10) Ku phikelela ka hina hi khongela ku kombisa Yehovha ndlela leyi hi khathalaka ha yona, mpimo wa ku navela ka hina, ni ku tiya ka nsusumeto wa hina. (Ps. 55:17; 88:1, 13; Rhom. 1:9-11) Pawulo a xiya nkoka wa ku phikelela eku khongeleni loko a hi khutaza leswaku hi “nga tshiki ku khongela.” (1 Tes. 5:17) Xikhongelo hi yin’wana ya tindlela letikulu leti hi kumaka mpfuno wa Yehovha ha tona.
4 Hi Ku Landzela Nkongomiso Wa Le Tilweni: “Vulawuri bya le tilweni” swi vula “ku fuma ka Xikwembu,” lexi nga rirhandzu. Ha vuyeriwa hi ku fuma ka xona loko hi amukela vuhosi bya xona ni ku landzela swiletelo swa xona loko hi endla swiboho leswikulu ni leswitsongo. “Nandza la tshembekaka, wo tlhariha” u yimela ku fuma ka le tilweni emisaveni leyi. (Mt. 24:45-47) Ku tirhisana ni nhlengeletano leyi “nandza” a yi tirhisaka i swa nkoka leswaku hi kuma mikateko ya Yehovha. (Ringanisa Vaheveru 13:17.) Yehovha u ta hakela ku tshembeka ka hina eka yena ni ku tiyimisela ku yingisa milawu ya yena hi ku hi nyika matimba lawa hi ma lavaka hi nkarhi wa kona.—Hev. 4:16.
5 Hi Ku Tshama Hi Ri Ekusuhi Ni Vamakwerhu: Rirhandzu i mfungho lowu hlawulaka vadyondzisiwa va Yesu. (Yoh. 13:34, 35) Hikwalaho ka leswi hi nga ni vumunhu lebyi hambaneke, ku nga pfuka timholovo minkarhi yin’wana. Hi fanele ku twelana vusiwana, hi rivalelana. (Ef. 4:32) Leswi swi endla swi koteka ku tshama ekusuhi ni vamakwerhu eripfumelweni ni ku khutaziwa hi ku tiyisela ka vona emiringweni. “Hi ku tiva leswaku vamakwe[rhu] emisaveni hinkwayo va hlangana ni maxangu yo fana ni lawa [hi] nga na wona,” hi kuma matimba yo huma eka Xikwembu leswaku hi langutana ni mintshikilelo leyi fanaka.—1 Pet. 5:9.
6 Hi Ku Hlayisa Mukhuva Lowunene Wa Dyondzo Ya Munhu Hi Xiyexe: Ku tiyisa mianakanyo ni timbilu ta hina hi tlhelo ra moya swi hi pfuna ku ala nhlaselo wa Sathana. (1 Pet. 5:8) Mukhuva lowunene wa dyondzo ya munhu hi xiyexe wu ta engetela mphakelo wa hina wa vutivi lebyi humaka eka Xikwembu. Hi nga kuma matimba eka byona loko hi langutana ni swiphiqo swa siku rin’wana ni rin’wana. Pawulo u kandziyise leswaku ‘vutivi lebyi kongomeke’ byi hoxa xandla swinene ku hi pfuna leswaku hi kota ku ponisiwa. (1 Tim. 2:3, 4) I swa nkoka leswaku hi dya swakudya swa moya nkarhi na nkarhi.
7 Malunghiselelo hinkwawo lama faneleke lama hi pfunaka leswaku hi tshama hi ri ni matimba ma kumeka hi ku olova evandlheni ra Vukreste. Ku seketela mintirho ya rona hi mbilu hinkwayo swi ta hi tiyisa leswaku hi ‘famba hi nga karhali.’—Esa. 40:29-31.