Yehovha U Hi Nyika Matimba
1 Hi rihi langutelo ra wena hi muapostola Pawulo? Loko hi ri karhi hi hlaya buku ya Mintirho, hi vona ndlela leyi a a hiseka ha yona entirhweni wa Yehovha. Xana Pawulo u swi kotise ku yini ku endla hinkwaswo leswi a swi endleke? U te: “Eka swilo hinkwaswo ndzi ni ntamu hikwalaho ka loyi a ndzi nyikaka matimba.” (Filp. 4:13) Na hina hi nga vuyeriwa eka matimba lawa Yehovha a ma nyikaka. Njhani? Hi ku tirhisa malunghiselelo ya tsevu lawa a hi endleleke wona leswaku ma hi pfuxeta ni ku hi tiyisa emoyeni.
2 Rito Ra Xikwembu: Tanihi leswi hi faneleke ku dya leswaku hi tshama hi tiyile emirini, hi fanele ku tiwundla hi Rito ra Xikwembu leswaku hi tshama hi hanyile emoyeni. (Mat. 4:4) Bibele yi hi nyika matimba lama nga hi tiyisaka. Leswaku hi tshama hi ri karhi hi hiseka ni ku gingiritekela ntiyiso, hi fanele ku va ni dyondzo leyi nga ni xikongomelo ni ku anakanyisisa, loko swi koteka hi endla tano siku ni siku.—Ps. 1:2, 3.
3 Xikhongelo: I swa nkoka leswaku hi tshinela ekusuhi na Yehovha, ngopfu-ngopfu loko hi lava nchumu wo karhi hi ku hlawuleka. Hi ku tirhisa moya wakwe, u nyika matimba lama hlakarherisaka eka lava ma kombelaka eka yena hi xikhongelo. (Luka 11:13; Efe. 3:16) Matsalwa ma hi khutaza ku “phikelela exikhongelweni.” (Rhom. 12:12) Xana na wena u endla tano?
4 Vandlha: Hi tlhela hi kuma matimba ni xikhutazo eminhlanganweni ya vandlha ni le ka vunakulobye bya rirhandzu lebyi hi byi tsakelaka ni vamakwerhu. (Hev. 10:24, 25) Loko hi karhatekile, va hi khutaza ni ku hi pfuna hi rirhandzu.—Swiv. 17:17; Ekl. 4:10.
5 Vutirheli Bya Nsimu: Ku hlanganyela evutirhelini bya nsimu minkarhi hinkwayo swi hi pfuna ku tshama hi langute Mfumo ni mikateko ya wona. Ha khutazeka loko hi pfuna van’wana leswaku va dyondza hi Yehovha. (Mint. 20:35) A hi nge swi koti hinkwerhu ku ya laha ku nga ni xilaveko lexikulu kumbe ku nghenela vutirheli bya nkarhi hinkwawo, kambe hi nga hlanganyela evutirhelini hi tindlela tin’wana leti nga ni xikongomelo.—Hev. 6:10-12.
6 Valanguteri Lava Nga Vakreste: Ha vuyeriwa hi xikhutazo ni mpfuno lowu vakulu va hi nyikaka wona. Yehovha u va avele ku risa ntlhambi wa Xikwembu lowu vekiweke emavokweni ya vona. (1 Pet. 5:2) Valanguteri lava famba-fambaka va aka mavandlha lawa va ma endzelaka, hilaha na Pawulo a endleke hakona enkarhini wakwe.—Rhom. 1:11, 12.
7 Swikombiso Swa Lava Tshembekeke: Swi tiyisa nhlana ku anakanya hi swikombiso leswinene swa vatirhi-kulorhi lava tshembekaka, va nkarhi lowu hundzeke ni va manguva lawa. (Hev. 12:1) Loko u lava ku pfuxeta matimba ya wena, ha yini u nga hlayi man’wana ya matimu lama khutazaka etimagazinini ta hina, xiviko lexi akaka xa Buku Ya Lembe, kumbe man’wana ya marungula lama tsakisaka ya matimu ya manguva lawa ya Timbhoni ta Yehovha ebukwini leyi nge Vahuweleri?
8 Makwerhu un’wana, loyi sweswi a nga ni malembe yo tlula 90 hi vukhale, u kume ntiyiso a ha ri jaha. Loko a ha ri muntshwa, ripfumelo ra yena ri ringiwile. Xo sungula, van’wana lava a va hlanganyela hi ku hiseka ni vandlha va tshike nhlengeletano ya Yehovha. Ku tlhela ku va ntirho wa yindlu ni yindlu lowu a wu n’wi tikela. Nilokoswiritano, minkarhi hinkwayo a a titshege hi Yehovha. Hi ku famba ka nkarhi se a a tsakela vutirheli. Xana swi tano ni namuntlha? Hambileswi rihanyo ra yena ri hohlokaka, wa ha ri xirho xa ndyangu wa Bethele ya le Brooklyn, tlhelo xirho xa Huvo leyi Fumaka. A nga tisoli hileswi a namarheleke nhlengeletano ya Yehovha.
9 Makwerhu wa xisati, loyi a nga xirho xa ndyangu wa Bethele eBritain, u khuvuriwe a ri ni malembe ya 13 hi vukhale. Lembe leri tlhandlameke, yena ni bhuti wakwe va sungule ku phayona, kutani lembe leri landzeleke rero, tata wakwe u pfaleriwile hi nkarhi wa Nyimpi ya Vumbirhi ya Misava hikwalaho ka vukala-tlhelo bya yena. U hambete a tshemba Yehovha leswaku a n’wi nyika matimba naswona u ye emahlweni a tirhela Xikwembu xa ntiyiso. Hi ku famba ka nkarhi u tekiwe hi makwerhu wo tshembeka kutani havumbirhi bya vona va hambete va endla ku rhandza ka Yehovha. Endzhaku ko heta malembe ya 35 va tekanile, nuna wa yena u fe hi xitshuketa. U tlhele a kuma matimba eka Yehovha naswona u hambete a n’wi tirhela ku ta fikela namuntlha, a langutele ku va xirho xa hilaha ku nga heriki xa ndyangu wa Yehovha wa laha misaveni.
10 Yehovha u pfuna malandza yakwe yo tshembeka a tlhela a ma nyika matimba. “Loyi a karhaleke u n’wi nyika matimba; kasi loyi a nga riki na wona matimba lamakulu u n’wi engetelela matimba.” Hi nga kuma matimba exihlobyeni lexi xa matimba lama nga heriki, hi ku tirhisa malunghiselelo hinkwawo ya tsevu lama boxiweke laha henhla. Tsundzuka: “Lava tshembaka Yehovha va ta tlhela va kuma matimba. . . . Va ta tsutsuma va nga heli matimba; va ta famba va nga karhali.” (Esa. 40:29-31) Pawulo u titshege hi ku helela hi Yehovha leswaku a n’wi nyika matimba, kutani na hina hi fanele ku endla tano.