Vana La Akaka
1 Tanihi leswi hi hanyaka ‘eminkarhini yo nonon’hwa,’ hinkwerhu ka hina ha xi lava xikhutazo. (2 Tim. 3:1) Hikwalaho ka leswi a xi xiya swinene xilaveko lexi ni le sikwini rakwe, Pawulo a hisekela ku tihlanganisa ni vamakwavo a endla minkarhi leyi yi va yo “tiyisana swin’we.” U khutaze vamakwavo ku ‘lava leswi va pfunaka . . . ni ku akisana.’ (Rhom. 1:11, 12; 14:19) Matshalatshala lawa ma humelerile eku ‘tiyiseni mimoya-xiviri ya vadyondzisiwa, ma va khutaza ku tiya eripfumelweni.’ (Mint. 14:22) Xikhutazo xa muxaka wolowo ha xi lava swinene namuntlha.
2 Hi nga aka van’wana hi leswi hi swi vulaka. Loko ma vuriwe kahle, marito ya hina ma nga fana ni “[maapula] ya nsuku e ntewaneni wa silver.” (Swiv. 25:11) Hi ku hlamula eminhlanganweni, ha ‘khutazana.’ (Hev. 10:25) Ririmi ra hina ri nga tirhisiwa hi ndlela leyinene loko hi rungulelana mintokoto, hi bumabumelana kumbe hi bula hi timhaka ta moya. Ku tirhisiwa loko tano ka ririmi ka ‘aka, ni ku tisa nkateko eka lava hi yingiselaka.’—Ef. 4:29.
3 Vulavula Hi Swilo Leswi Akaka: Eka Vafilipiya 4:8, Pawulo u nyikele swiletelo leswi nga hi pfunaka loko hi vulavula. U vule leswaku hi fanele ku anakanya hi swilo leswi nga ntiyiso, leswi chavisekaka, leswi lulameke, leswi tengeke, leswi tsakisaka, leswi nkhensekaka, leswi nga ni vunene ni leswi dzunekaka. Nkarhi na nkarhi hi ta tiyiseka leswaku leswi hi swi vulaka swi ta va ntiyiso ni ku vuyerisa eka van’wana loko swi sekeriwe eRitweni ra Xikwembu. (Yoh. 17:17) Ku tinyiketela ka hina ka Vukreste, leswi hi swi dyondzaka eminhlanganweni ya vandlha, ndlela leyi hi hetisisaka vutirheli bya hina hi xitalo ha yona ni timhaka tin’wana to tano i swilo leswi chavisekaka. Mabulo lama akaka mayelana ni mimpimanyeto ni misinya ya milawu ya Rito ra Xikwembu ma fanele ku hi pfuna leswaku hi ‘leteriwa ku ponisiwa.’ (2 Tim. 3:15) Hi nga phofula ku tlangela ka hina mahanyelo lama tengeke ya lava nga enhlengeletanweni ya Yehovha leyi baseke. Hi nga bumabumela mintirho ya vamakwerhu ya rirhandzu ni ya tintswalo. (Yoh. 13:34, 35) Swilo leswi nkhensekaka swi katsa timfanelo letinene ta Vukreste ta ripfumelo, ntsako, ku rhula ni ku leha mbilu leswi hi swi vonaka eka vamakwerhu. Ku bula hi swilo swo tano leswi tengeke ni leswi dzunekaka swi ‘aka van’wana.’—Rhom. 15:2.
4 Masiku hinkwawo, hi langutane ni swivilelo swa misava leswi hetaka matimba. Mawaku ndlela leyi swi phyuphyisaka ha yona ku bakanya swilo leswi ivi hi avelana mabulo ya rirhandzu ni vamakwerhu! Nkarhi wa risima lowu hi kotaka ku wu heta hi ri swin’we i rifuwo leri rhandzekaka. Loko nkarhi na nkarhi hi khutazana ni ku akana, entiyisweni van’wana va ta ku eka hina: “Va ndzi rhulise mbilu.”—1 Kor. 16:18.