Vuyeriwa Exikolweni Xa Vutirheli Bya Le Tilweni Xa 1996—Xiyenge 1
1 Xana u swi hlayile swiletelo leswi nyikeriweke eka “Xiyimiso Xa Xikolo Xa Vutirheli Bya Le Tilweni Xa 1996”? Xana u ku xiyile ku cinca loku nga kona? Ku sukela hi January ku ya ka December, Nkulumo No. 3 yi ta va yi sekeriwe exibukwanini lexi nge Tinhloko-mhaka To Vulavurisana Ta Bibele. Ku sukela hi January ku ya ka April Nkulumo No. 4 yi ta va yi sekeriwe ebukwini leyi nge Ku Hlamulana, naswona ku sukela hi May ku ya ka December, yi ta va yi sekeriwe ebukwini leyintshwa leyi nge Vutivi.
2 Swiavelo Swa Swichudeni: Nkulumo No. 3 yi nyikiwa makwerhu wa xisati. Tanihi leswi yi sekeriweke exibukwanini lexi nge Tinhloko-mhaka To Vulavurisana, mavekelo ma fanele ma katsa ku veka vumbhoni hi yindlu na yindlu kumbe hi xitshuketa. Hi ku ya hi nhloko-mhaka ya kona, yi nga ha tlhela yi vekiwa tanihi riendzo ro vuyela kumbe tanihi nhlamulo ya xivutiso lexi vutisiweke hi xichudeni xa Bibele vhiki leri nga hundza.
3 Nkulumo No. 4 yi fanele yi tsakisa naswona yi tirha. Loko yi sekeriwe ebukwini leyi nge Ku Hlamulana, naswona makwerhu wa xisati a ri yena la nyikelaka nkulumo leyi, mavekelo ma fanele ma katsa ku veka vumbhoni hi yindlu na yindlu kumbe hi xitshuketa. Loko yi sekeriwe ebukwini leyi nge Vutivi, yi fanele ku vekiwa tanihi riendzo ro vuyela kumbe dyondzo ya le kaya ya Bibele. Leswi swi ta pfuna ngopfu, tanihi leswi buku leyi nge Vutivi yi nga ta tirhisiwa ngopfu eku fambiseni tidyondzo ta le kaya ta Bibele. Loko mavekelo ya ri dyondzo ya Bibele ya le kaya, vamakwerhu havambirhi va nga ha tshama ehansi. Nghenani xikan’we edyondzweni hi ku endla tinhlamuselo to koma ta manghenelo, kutani u vutisa xivutiso lexi nga ebukwini. N’wini wa muti u fanele a tiendla munhu wa misava hakunene. Matsalwa lama komberiweke ma nga ha pfuriwa ivi ma hlayiwa loko nkarhi wu pfumela. Makwerhu wa xisati u fanele a tirhisa vutshila byo dyondzisa hi ku tlhontlha n’wini wa muti hi swivutiso ni hi ku hlamulana na yena hi matsalwa lama hlayiweke.
4 Ku fanele ku endliwa yini loko matsalwa lama kombisiweke ya xiavelo xexo ma tele ngopfu lerova ku nga buriwa ha wona hi ntlhanu wa timinete? Hlawula matsalwa-nkulu lama kandziyisaka tinhla-nkulu. Loko matsalwa ma nga talanga, ku nga ha buriwa hi tinhla-nkulu ta dyondzo yoleyo ti ndlandlamuxiwa. Nkarhi wun’wana, ndzimana kumbe xivulwa lexi nga ebukwini xi nga ha hlayiwa kutani ku buriwa ha xona ni n’wini wa muti.
5 Bokisi leri nge “Kambela Vutivi Bya Wena,” leri kumekaka emakumu ka ndzima yin’wana ni yin’wana ya buku leyi nge Vutivi, muhuweleri loyi xiavelo xakwe xi hlanganisaka tindzimana to hetelela ta ndzima a nga ha ri hlamusela hi ku komisa. Mabokisi ya rungula lama welaka eka tindzimana ta xiavelo na wona ku nga ha buriwa ha wona loko nkarhi wu pfumela. Loko bokisi ra rungula ri humelela exikarhi ka swiavelo swimbirhi, makwerhu la tamelaka xiavelo xo sungula a nga ha ri tirhisa. Swifaniso leswi nga ebukwini swi nga ha hlamuseriwa loko swi fambisana ni mhaka leyi dyondziwaka.
6 Loko makwerhu wa xinuna a veka Nkulumo No. 4 yi ta tameriwa tanihi nkulumo. Makwerhu u fanele a dyondza mhaka ya nkulumo kahle. Veka nkulumo leyi fambisanaka na xihloko, naswona u hlawula matsalwa ya Bibele lama nga ta pfuna vayingiseri ku vona ndlela leyi rungula ri nga ha tirhisiwaka ha yona evutirhelini. Nkarhi wun’wana, ndzimana kumbe xivulwa lexi nga ebukwini xi nga ha hlayiwa ni ku hlamuseriwa hi xivulavuri.
7 Loko hi wu tirhisa hi laha ku heleleke ndzetelo lowu hi wu kumaka exikolweni, hi ta kota ku “twarisa Rito,” hi ndlela leyi kombisaka “[vutshila] [e]ku dyondziseni.”—2 Tim. 4:2, ringanisa NW.