Vuyeriwa Eka Xiyimiso Xa Xikolo Xa Vutirheli Bya Le Tilweni Xa 1999
1 Yesu a a ri Mudyondzisi Lonkulu. Vanhu a “va hlamarisiwa hi ndlela yakwe yo dyondzisa.” (Mar. 1:22) Hambileswi a nga riki kona eka hina la nga vulavulaka a tlhela a dyondzisa ku fana na Yesu, hi nga lwela ku n’wi tekelela. (Mint. 4:13) Leswaku hi endla tano, ku hlanganyela exiyimisweni xa Xikolo xa Vutirheli bya le Tilweni ku ta hi pfuna leswaku hi hambeta hi antswisa vuswikoti bya hina byo vulavula ni ku dyondzisa.
2 Hi 1999, Nkulumo No. 1 yi ta va yi sekeriwe ngopfu eka timagazini ta 1997 ta Xihondzo xo Rindza ni Xalamuka! Matwisiselo ya hina ya timhaka ta moya ma ta antswisiwa ngopfu loko hi hlaya mhaka ka ha ri emahlweni kutani hi yi yingisa exiyimisweni xa xikolo. Lava va averiwaka ku nyikela tinkulumo ta ndzayo va fanele va kombisa ndlela leyi rungula leri ri tirhaka ha yona, va ri nyikela hi ndlela leyi tsakisaka ni leyi hanyaka. Nkulumo No. 3 yi ta va yi sekeriwe ebukwini leyi nge Ntsako eNdyangwini kumbe eka “Tinhloko-mhaka To Vulavurisana Ta Bibele” hilaha ti nga hakona eka Vuhundzuluxeri Bya Misava Leyintshwa Bya Matsalwa Ya Vukreste Ya Xigriki naswona Nkulumo No. 4 yi ta va yi sekeriwa ebukwini leyi nge Ntsako eNdyangwini kumbe eka “Tinhloko-mhaka To Vulavurisana Ta Bibele,” hilaha ti nga hakona eka Vuhundzuluxeri Bya Misava Leyintshwa Bya Matsalwa Ya Vukreste Ya Xigriki, hambileswi rungula ra tinkulumo leti ri nga ta nyikeriwa hi ku cincana ka tibuku leti. Mulanguteri wa xikolo u fanele a kambisisa rungula hi vukheta a nga si endla swiavelo. Swichudeni hinkwaswo leswi averiwaka ku nyikela rungula leri humaka ebukwini leyi nge Ntsako eNdyangwini swi fanele swi ri swikombiso leswinene evuton’wini bya swona bya le ndyangwini.
3 Tirhisa Ndzayo, Naswona Lunghiselela Kahle: Un’wana ni un’wana a nga antswisa vuswikoti byakwe byo vulavula ni ku dyondzisa. (1 Tim. 4:13) Hikwalaho, hi fanele hi lava xitsundzuxo naswona a hi fanelanga hi xi languta xi ri nchumu lowu hi faneleke hi wu papalata. (Swiv. 12:15; 19:20) Ku dyondzisa ntiyiso hilaha ku humelelaka eminhlanganweni ni le vutirhelini bya nsimu swi katsa leswi engetelekeke ku tlula ku hlamusela mhaka kumbe ku hlaya matsalwa hi ndlela yo hetisisa nawu. Hi fanele hi fikelela timbilu naswona hi khutaza lava va hi yingisaka. Leswi hi nga swi endla hi ku vulavula ntiyiso lowu sukaka embilwini, hi ndlela leyi khorwisaka. (Ringanisa Mintirho 2:37.) Ndzayo leyi hi yi kumaka exikolweni yi ta hi pfuna ku endla leswi.
4 Hi ku hatlisa loko u kuma xiavelo, ehleketa hi tinhla leti u faneleke u tirhela eka tona hilaha ti hlamuseriweke hakona ebukwini leyi nge Buku yo Letela ya Xikolo. Anakanya hi leswi u faneleke u swi endla leswaku u tirhisa ndzayo leyi u yi kumeke enkarhini lowu hundzeke. Ehleketa hi xihloko xa wena, ndlela leyi u nga ta yi hlela ha yona loko swi lava leswaku u endla tano, ni ndlela leyi u nga ta ma tirhisa ha yona matsalwa lama kumekaka eka mhaka leyi u averiweke yona. Ehleketisisa malunghana ni ndlela leyi u nga ta ri tirhisa ha yona rungula leri hi ndlela leyinene leswaku u dyondzisa ni ku khutaza.—1 Tim. 4:15, 16.
5 Loko u chava ku tsarisa exikolweni, khongela ha swona, u tlhela u burisana ni mulanguteri wa xikolo malunghana ni ndlela leyi u titwaka ha yona. Un’wana ni un’wana a nga pfuneka loko o xi tirhisa hi vutalo xiyimiso lexi nga ta nyikeriwa eka Xikolo xa Vutirheli bya le Tilweni hi 1999.