Ku Fambisa Tidyondzo Ta Le Kaya Ta Bibele Leti Endlaka Nhluvuko
1 I yini lexi muongori wa le Tanzania, muntshwa wa le Argentina, ni manana un’wana wa le Latvia va fanaka ha xona? 1997 Yearbook (matl. 8, 46, na 56) yi vika leswaku ha vanharhu ka vona va endle nhluvuko lowukulu etidyondzweni ta vona ta le kaya ta Bibele, leswi vangiweke hi ku tiyimisela ka vona ka ku va ni dyondzo yo tlula yin’we vhiki na vhiki hi ku tirhisa buku leyi nge Vutivi. Ku bumabumeriwe leswaku loko swi koteka, vahuweleri va fanele va dyondzisa ndzima yin’we ya buku leyi hi nkarhi wa dyondzo yin’wana ni yin’wana. Hambiswiritano, van’wana va swi kuma swi va nonon’hwela ku endla tano. Hambileswi hakanyingi swi nga ta titshega hi swiyimo ni vuswikoti bya ntumbuluko bya xichudeni xin’wana ni xin’wana, vadyondzisi lava nga ni ntokoto va humelerile hi ku tirhisa swiringanyeto leswi landzelaka.
2 Hilaha swi hlamuseriweke hakona eka xiengetelo xa Vutirheli Bya Hina Bya Mfumo bya June 1996, swa fanela leswaku u letela swichudeni swa wena leswaku swi lunghiselela dyondzo. Loko ma ha ku sungula, i swinene leswaku u hlamusela ni ku kombisa ndlela leyi leswi swi endliwaka ha yona. Va kombise buku leyi nge Vutivi leyi wena u dyondzaka ha yona. Lunghiselelani dyondzo yo sungula swin’we. Pfuna swichudeni leswaku swi kuma marito-nkulu kumbe swivulwa leswi hlamulaka xivutiso lexi kandziyisiweke hi ku kongoma ivi u swi khwatihata. Vahuweleri van’wana va tlhele va nyika swichudeni swa vona xitsalo xo fungha ha xona. Swi khutaze ku languta matsalwa hinkwawo loko swi ri karhi swi lunghiselela dyondzo. Hi ku endla tano, u ta va u swi letela ni ku lunghiselela ku va kona eDyondzweni ya Buku ya Vandlha ni le Dyondzweni ya Xihondzo xo Rindza.—Lk. 6:40.
3 Mudyondzisi lonene u ta nyika xichudeni nkarhi ku nga ri ku vulavula ngopfu a ri yexe. U papalata ku hambukisiwa hi tinhla letitsongo. A nga fanelanga a huma emhakeni. Ematshan’weni ya sweswo, u kandziyisa tinhla-nkulu ta dyondzo. Van’wana va nyike swichudeni tibuku tin’wana leti nga ta swi pfuna ku kuma tinhlamulo ta swivutiso. Ku tlula kwalaho, vanhu lava tsakelaka va ta kuma rungula leri engetelekeke hi vuxokoxoko loko va va kona eminhlanganweni ya vandlha.
4 A swi bohi ku pfula matsalwa hinkwawo lama kombisiweke edyondzweni. Tinhla-nkulu tin’wana ti nga ha hlamuseriwa hi matsalwa lama tshahiweke endzimaneni. Hi nkarhi wa mpfuxeto, kandziyisa matsalwa-nkulu lama hlamuseriweke ivi u khutaza xichudeni leswaku xi ma tsundzuka.
5 Xana Dyondzo Yin’wana Ni Yin’wana Yi Fanele Yi Teka Nkarhi Wo Tanihi Kwihi?: A hi xikolo-kolo leswaku dyondzo yi heta awara yin’we ntsena. Vini va miti van’wana va na wona nkarhi naswona va nga ha navela ku dyondza nkarhi wo leha. Kumbe xichudeni xi nga ha tsakela ku dyondza masiku yo hlayanyana evhikini. Leswi swi ta va vuyerisa lava nga endlaka tano.
6 Hilaha Esaya 60:8 yi kombisaka hakona, namuntlha madzana ya magidi ya vadzunisi va Yehovha lavantshwa ‘va haha kukotisa mapapa, ni tanihi matuva exihahlweni xa wona’ va ta emavandlheni ya vanhu va yena. Onge hinkwerhu hi nga endla xiphemu xa hina loko hi ri karhi hi tirha swin’we na Yehovha tanihi leswi a hatlisisaka ku hlengeletiwa ka vanhu lava fanaka ni tinyimpfu.—Esa. 60:22.