Xiyenge 4: Letela Swichudeni Ku Lunghiselela

Ku Fambisa Tidyondzo Ta Bibele Leti Endlaka Nhluvuko

¹ Xichudeni lexi hlayaka dyondzo ka ha ri emahlweni ivi xi fungha tinhlamulo, kutani xi anakanya hi ndlela leyi xi nga ta tiphofula ha yona hi marito ya xona n’wini, hakanyingi a xi hlweli ku endla nhluvuko hi tlhelo ra moya. Hikwalaho, loko dyondzo yi sunguriwile, lunghiselela na xona u ri karhi u xi komba ndlela yo lunghiselela. Swichudeni swo tala swa vuyeriwa loko mi lunghiselela swin’we ndzima kumbe dyondzo hinkwayo.

² Ku Fungha Tinhlamulo Ni Ku Tsala Tinhla Etlhelo Ka Tluka Ra Buku: Xi hlamusele ndlela yo kuma tinhlamulo ta swivutiso leswi nga ebukwini. Xi kombe buku ya wena leyi u nga fungha marito kumbe swiga ntsena. Loko mi ri karhi mi dyondza, xi nga landzela xikombiso xa wena, hi ku fungha ntsena xiga lexi nga ta xi pfuna leswaku xi tsundzuka nhlamulo. (Luka 6:40) Kutani xi kombele leswaku xi hlamula hi marito ya xona n’wini. Leswi swi ta ku pfuna ku vona leswaku xi ri twisise ku fikela kwihi rungula rero.

³ I swa nkoka leswaku loko xichudeni xi ri karhi xi lunghiselela, xi kambisisa matsalwa lama nga tshahiwangiki. (Mint. 17:11) Xi pfune xi tiva leswaku tsalwa rin’wana ni rin’wana leri nga tshahiwangiki ri seketela yinhla leyi nga endzimaneni. Xi kombe ndlela yo tsala tinhla to koma etlhelo ka tluka ra buku ya xona. Kandziyisa mhaka ya leswaku rungula leri dyondziwaka ri sekeriwe eBibeleni. Xi khutaze leswaku minkarhi hinkwayo loko xi hlamula eka dyondzo ya xona xi nghenisa matsalwa yo tala lama nga tshahiwangiki.

⁴ Kambisisa Xihloko Ivi U Endla Mpfuxeto: Loko xichudeni xi nga si sungula ku lunghiselela dyondzo ya xona, swi ta va swinene leswaku xi rhanga hi ku kambisisa rungula ra kona. Xi hlamusele leswaku xi nga ri kambisisa hi ku rhanga xi languta nhloko-mhaka, swihlokwana ni swifaniso. Tlhela u xi hlamusela leswaku xi gimeta ku lunghiselela ka xona, hi ku tinyika nkarhi wo pfuxeta tinhla-nkulu ta dyondzo yoleyo, kumbexana xi tirhisa bokisi ra mpfuxeto loko ri ri kona. Ku phindha-phindha koloko ku ta xi pfuna leswaku rungula rolero ri dzika emianakanyweni ya xona.

⁵ Loko hi letela xichudeni leswaku xi yi lunghiselela kahle dyondzo ya xona, swi ta xi pfuna leswaku xi nyikela tinhlamulo leti akaka eminhlanganweni ya vandlha. Swi ta xi pfuna nileswaku xi hlakulela mukhuva lowunene wo lunghiselela lowu nga ta xi pfuna hambiloko se ku hundze nkarhi wo leha xi hete dyondzo ya xona ya Bibele.