Nyikela Vumbhoni Kun’wana Ni Kun’wana Laha Ku Nga Ni Vanhu
1 Hikwalaho ko xiya xiphemu lexi moya wa Xikwembu wu nga na xona evutirhelini bya yena, muapostola Pawulo u te: “Xikwembu hi xona xi miriseke.” U tlhele a ku: “Hi vatirhi-kuloni eka Xikwembu.” (1 Kor. 3:5-9) Leri i lunghelo leri hlamarisaka. Xana hi nga swi kombisa njhani erivaleni leswaku hi tlangela ku va vatirhi-kulorhi na Xikwembu? Hi ku twarisa mahungu lamanene eka hinkwavo lava hi hlanganaka na vona entirhweni wa yindlu na yindlu ni le tindhawini letin’wana hinkwato.
2 Hi lerisiwe ku ‘endla vanhu hinkwavo leswaku va va vadyondzisiwa.’ (Mt. 28:19) Loko hi burisana ni vanhu va nga ri vangani ntsena lava hi hlanganaka na vona loko hi ri evutirhelini, hi nga hela matimba hi xihatla hi vona onge a hi endlanga nchumu. Hi hala tlhelo, ha tiphina swinene hi vutirheli bya hina loko hi kota ku kuma vanhu vo tala ni ku burisana na vona. Leswi swi nga ha va xiphiqo, tanihi leswi swi lavaka leswaku hina hi hexe hi ya kun’wana ni kun’wana laha ku nga ni vanhu leswaku hi ta burisana na vona.
3 Swikombiso Leswi Pfunaka: Hi nga nyikela vumbhoni eka vanhu lava nga etimakete, etiphakeni, etindhawini ta vuwiselo endleleni, eswiticini ni lomu mathekisi ma khandziyeriwaka kona. Loko u tirhisa swofamba swa mani na mani, xana u va u lunghekele ku nyikela vumbhoni endleleni? Timbhoni timbirhi leti a ti khandziye bazi leri teleke hi vanhu loko ti ya enhlanganweni wa ntirho wa nsimu, ti burisane ni vanhu hi ku tirhisa swifaniso swa Paradeyisi leswi nga ebukwini leyi nge Vutivi, leswi hlamuselaka switshembiso swa Xikwembu swa vumundzuku. Tanihi leswi a va swi tiva leswaku swi nga endleka un’wana a va twa, jaha leri yimeke ekusuhi ri yingiserile naswona ri tsakisiwe hi leswi ri swi tweke. Ri nga si xika ebazini, ri amukele buku ni ku kombela leswaku un’wana a ri endzela ekaya ka rona.
4 Vahuweleri vo tala va kume ntsako eku nyikeleni ka vumbhoni hi xitshuketa. Makwerhu un’wana wa xisati u ye endhawini ya mabindzu ya kwalaho nindzhenga, ivi a burisana ni vanhu lava nga heta ku xava kambe lava vonakaka va nga jahanga. U fambise tibuku hinkwato leti a ri na tona enkwameni wakwe. Wanuna un’wana la tshame emovheni wakwe u tsakele timagazini leti a n’wi nyikeke tona. U tshame a va kona eminhlanganweni, naswona bulo ra vona ri kondletele ku tsakela kakwe.
5 I lunghelo ku tlakusa vito ra Yehovha. Hi ku kombisa ku hisekela ntirho wa hina wo chumayela, hi kombisa leswaku a hi xi hupanga xikongomelo xa tintswalo ta Xikwembu leti nga fanelangiki eka hina. Tanihi leswi ‘sweswi ku nga nkarhi lowu faneleke’ wo pfuna van’wana, a hi yeni kun’wana ni kun’wana laha ku nga ni vanhu ni ku nyikela vumbhoni eka vona malunghana ni ‘siku ra Yehovha ra ku ponisa.’—2 Kor. 6:1, 2.