Xikolo Xa Vutirheli Bya Le Tilweni Xa 1998

Ku nghena xikolo swi vula ku “dyondzisiwa kumbe ku leteriwa hi ku tirhisa vutivi kumbe vutshila lebyi kongomeke.” Hi ku tirhisa Xikolo xa Vutirheli bya le Tilweni, nkarhi na nkarhi hi leteriwa vutivi bya Xikwembu. Nakambe, ku hlanganyela ka hina exikolweni lexi swi hi endla leswaku hi kurisa vutshila bya hina bya ku vulavula ni ku dyondzisa. Nongonoko wa xikolo wa 1998 wu ta hi nyika tindlela to tala ta ku endla nhluvuko wa moya lowu engetelekeke.

Loko u kambisisa xiyimiso xa xikolo xa lembe leri taka, u ta swi vona leswaku nkarhi na nkarhi Nkulumo No. 3 yi ta va yi sekeriwe eka Tinhloko-mhaka To Vulavurisana Ta Bibele. Ku engetela kwalaho, buku leyi nge Ntsako eNdyangwini yi nghenisiwile eka xiyimiso xa dyondzo xa 1998, naswona Nkulumo No. 3 na No. 4 yi ta va yi sekeriwe eka yona nkarhi na nkarhi. Loko Nkulumo No. 4, yi sekeriwe ebukwini leyi nge Ntsako eNdyangwini, makwerhu wa xinuna u fanele a yi nyikela tanihi nkulumo ya vandlha. Naswona hi mi tsundzuxa leswaku ku nga vi na un’we enongonokweni wa xikolo la dyaka nkarhi.

Xiyimiso Lexintshwa: Leswaku ku ta vuyeriwa munhu un’wana ni un’wana, “Xiyimiso Xa Ku Hlaya Ka Bibele Loku Engetelekeke” xa vhiki rin’wana ni rin’wana xi kombisiwe eka swiangi ekusuhi ni nomboro ya risimu. Hambileswi tinkulumo ta vhiki na vhiki enongonokweni wa xikolo ti nga sekeriwangiki kona, swi endle pakani ya wena ku fambisana na kona. Leswi swi ta ku pfuna leswaku u tolovela ku hlaya Bibele siku na siku loko u nga si swi endla.

Leswaku u kuma rungula leri engetelekeke malunghana ni tinkulumo, tindzayo ni mimpfuxeto yo tsala, hi kombela u hlaya swiletelo leswi nga eka “Xiyimiso Xa Xikolo Xa Vutirheli Bya Le Tilweni Xa 1998,” kun’we ni tluka 5 ra Vutirheli Bya Hina Bya Mfumo bya October 1996.

Loko u nga si tsarisa eXikolweni xa Vutirheli bya le Tilweni, hi ku khutaza leswaku u tsarisa sweswi. Xikolo lexi xo hlawuleka xi endla ntirho wa nkoka wa ku letela malandza ya Yehovha lama titsongahataka ni lama tinyiketeleke leswaku ma faneleka ku antswa tanihi vatirheli va yena.—1 Tim. 4:13-16.