Xikolo Xa Vutirheli Bya Le Tilweni Xa 2000
1 Xikolo xa Vutirheli bya le Tilweni xi ve mpfuno lowukulu eka vanhu va Yehovha. Ku tlula malembe ya 50 lama hundzeke, xi pfune vanhu va timiliyoni leswaku va hlakulela vuswikoti bya vona tanihi swivulavuri swa le rivaleni ni ku va vadyondzisi va ntiyiso wa Bibele. (Ps. 145:10-12; Mat. 28:19, 20) Xana wa yi vona ndlela leyi xikolo xi ku pfuneke ha yona? Xi nga hambeta xi ku pfuna eka lembe ra 2000 loko u hlanganyela eka xona hi xitalo ni ku tirhisa ndzayo leyi nyikeriwaka exikolweni.
2 Swiletelo mayelana ni swiavelo kun’we ni tibuku leti nga ta tirhisiwa swi hlamuseriwe eka tluka ro sungula ra xiyimiso xa xikolo xa 2000. Nkarhi lowu nkulumo yin’wana ni yin’wana yi nyikiweke wona, buku leyi nkulumo yi sekeriweke eka yona, ndlela leyi nkulumo yi nga ta nyikeriwa ha yona kun’we ni vuxokoxoko byin’wana swi hlamuseriwe eka tluka rero. Hi kombela leswaku u tinyika nkarhi wa ku hlaya swiletelo leswi hi vukheta u tlhela u swi tirhisa.
3 Ku Hlaya Ka Bibele Ka Vhiki Ni Vhiki: Ku ni swiyimiso swimbirhi leswi hambaneke swa ku hlaya ka Bibele eka xiyimiso xa xikolo. Lexin’wana i xiyimiso xa ku hlaya ka Bibele loku tolovelekeke lexi hlanganisaka kwalomu ka matluka ya ntlhanu ya Bibele. Tinhla-nkulu ta Bibele ti sekeriwe eka ku hlaya loku. Ku hlaya ka Bibele lokun’wana i xiengetelo lexi nga ni rungula leri engetelekeke kambirhi. Loko wo landzela xiyimiso lexi, u ta heta ku hlaya Bibele hinkwayo hi malembe manharhu. Ha swi tiva leswaku van’wana va nga ha lava ku hlaya tindzima to hlayanyana ku tlula leti kombisiweke eka xiyimiso xa xiengetelo, kambe van’wana swi nga ha va tikela ku fambisana na xona. Tsaka hi leswi u kotaka ku swi fikelela, u nga tiringanisi ni van’wana. (Gal. 6:4) Nchumu wa risima i ku hlaya Rito ra Xikwembu siku ni siku.—Ps. 1:1-3.
4 Loko u lava ku tsarisa eXikolweni xa Vutirheli bya le Tilweni, u fanele u vulavula ni mulanguteri wa xikolo. Hi kombela leswaku u nga swi tekeli hansi swiavelo swa wena naswona u nga tshiki ku hetisisa swiavelo swa wena hikwalaho ka swivangelo leswi nga nyawuliki. Tlangela xikolo tanihi lunghiselelo leri humaka eka Yehovha. Lunghiselela kahle, yi tive kahle nkulumo leyi u averiweke yona, yi nyikele hi mbilu ya wena hinkwayo, xisweswo u ta vuyeriwa hi xitalo exikolweni lexi xo hlawuleka.