Xikolo Xa Vutirheli Bya Le Tilweni Xa 2001

¹ Ku ni swivangelo swo tala swa Matsalwa leswi endlaka leswaku hinkwerhu hi lava ku hlanganyela hi xitalo hilaha hi nga kotaka hakona eXikolweni xa Vutirheli bya le Tilweni.—Swiv. 15:23; Mat. 28:19, 20; Mint. 15:32; 1 Tim. 4:12, 13; 2 Tim. 2:2; 1 Pet. 3:15.

² I khale xikolo lexi xi ri ni xiyimiso xa ku hlaya Bibele vhiki ni vhiki. Hi kota ku hlaya kwalomu ka tluka rin’we ra Bibele siku ni siku. Ku sukela haxawa, ku hlaya ka Bibele ka vhiki ni vhiki ku ta katsa ni vhiki ra mpfuxeto wo tsala. Xiyimiso xa ku hlaya ka Bibele loku engetelekeke, lexi a xi hleleriwe malembe manharhu lama hundzeke, se xi hetiwile. Kambe loko u lava ku hlaya mhaka leyi engetelekeke eBibeleni handle ka leyi nga exiyimisweni, u nga ha tiendlela xiyimiso xa wena n’wini xa ku hlaya.

³ Nkulumo No. 2 yi letela vamakwerhu leswaku va kota ku ‘ri hlaya erivaleni’ Rito ra Xikwembu. (1 Tim. 4:13) Loko u ri ni nkulumo ya ku hlaya, titolovete yona hi ku yi hlayela ehenhla hi ku phindha-phindha.

⁴ Nkulumo No. 3 na No. 4 ti sekeriwe ebukwini leyi nge Ku Hlamulana, leyi lunghiseleriweke ku tirhisiwa ensin’wini. Loko rungula leri u averiweke rona ri tele ku tlula nkarhi lowu u nyikiweke wona, hlawula ntsena leri nga tirhaka ensin’wini ya vandlha ra ka n’wina. U nga ha hlela nkulumo ya wena leswaku yi fanela nsimu ya ka n’wina.

⁵ Tikarhatele swinene ku hetisisa swiavelo swa wena hinkwaswo exikolweni. Tinyike nkarhi wa ku lunghiselela kahle naswona u vulavula swi suka embilwini. U ta va xikhutazo lexikulu evandlheni naswona u ta vuyeriwa hi ku hlanganyela hi mbilu hinkwayo eXikolweni xa Vutirheli bya le Tilweni hi 2001.