Xikolo Xa Vutirheli Bya Le Tilweni Xa 2002
1 Vanhu vo tala a va swi tekeli enhlokweni leswaku va fanele ku hlakulela vuswikoti byo vulavula. Hambiswiritano, ku kota ku vulavula i nyiko leyi humaka eka Yehovha. Yi endla leswaku hi kota ku burisana ni van’wana ni ku vula leswi nga emianakanyweni ya hina ni ndlela leyi hi titwaka ha yona. Xa nkoka ngopfu, hi kota ku dzunisa Xikwembu xa hina ha yona.—Ps. 22:22; 1 Kor. 1:4-7.
2 Xikolo xa Vutirheli bya le Tilweni xi letela vavanuna, vavasati ni vana ku twarisa vito ra Yehovha. (Ps. 148:12, 13) Xiyimiso xa xikolo xa 2002 xi tamele tinhloko-mhaka to tala ta Bibele, leti un’wana ni un’wana wa hina a nga vuyeriwaka eka tona ni ku ti tirhisa evutirhelini. Hi nga kurisa vutivi ni vuswikoti bya hina byo dyondzisa Rito ra Xikwembu hi ku lunghiselela xikolo ni ku hlanganyela eka xona.—Ps. 45:1.
3 Hlaya Bibele Siku Ni Siku: Loko hi tshama hi ri ni Bibele ekusuhi, hi nga yi hlaya nkarhi wun’wana ni wun’wana lowu hi wu kumaka. Vo tala va hina hi va ni nkarhi esikwini lowu hi nga wu tirhiselaka ku hlaya. Swi vuyerisa ngopfu ku hlaya hambi ko va tluka rin’we siku ni siku, hikuva hi swona leswi lavekaka leswaku munhu a kota ku fambisana ni xiyimiso xa ku hlaya Bibele, lexi kumekaka eka xiyimiso xa xikolo!—Ps. 1:1-3.
4 Ku kota ku hlaya Bibele hi ku rhelela ku ta hi pfuna leswaku hi fikelela timbilu ta vayingiseri va hina ni ku va khutaza leswaku va dzunisa Yehovha. Vamakwerhu lava averiwaka Nkulumo No. 2, va fanele ku titoloveta nkulumo ya vona hi ku yi hlayela ehenhla hi ku phindha-phindha. Mulanguteri wa xikolo u ta nkhensa ku hlaya koloko ivi a nyikela swiringanyeto swa ndlela leyi ku nga antswisiwaka ha yona.
5 Tirhisa Buku Leyi Nge Ku Hlamulana: Nkulumo No. 3 na No. 4 ti sekeriwe ebukwini leyi nge Ku hlamulana. Kumbexana vo tala va hina hi ta xalamukela ku xi tirhisa hilaha ku engetelekeke xitirho lexi pfunaka evutirhelini bya hina bya nsimu. Vamakwerhu va xisati va fanele ku hlela tinkulumo ta vona hi ndlela leyi tirhaka ensin’wini ya vandlha. Mulanguteri wa xikolo u fanele ku yisa nyingiso swinene eka ndlela leyi va dyondzisaka ni ku tirhisa Matsalwa ha yona.
6 Onge Xikolo xa Vutirheli bya le Tilweni xi nga hi pfuna hinkwerhu leswaku hi hambeta hi tirhisa nyiko ya ku kota ku vulavula, leyi Xikwembu xi hi nyikeke yona leswaku hi chumayela mahungu lamanene ni ku dzunisa Yehovha, Xikwembu xa hina lexikulu!—Ps. 34:1; Efe. 6:19.