Vaakelani Va Hina Va Fanele Va Twa Mahungu Lamanene

¹ Xikwembu xi rhandza leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:4) “Vanhu va mixaka hinkwayo” va katsa vaakelani va hina hinkwavo. Leswaku hi va fikelela hi mahungu lamanene ku laveka leswaku hi cinca-cinca swingheniso swa hina ni ku khumbeka hi leswi nga ha tsakisaka munhu un’wana ni un’wana loyi hi hlanganaka na yena. (1 Kor. 9:19-23) Nhlengeletano ya Yehovha yi hi nyike switirho leswi nga hi pfunaka leswaku hi fikelela timbilu ta lava nga ni “mboyamelo lowunene eka vutomi lebyi nga heriki.” (Mint. 13:48) A hi voneni ndlela leyi hi nga tirhisaka tibroxara to hambana-hambana ha yona hi July na August leswaku hi burisana ni vaakelani va hina malunghana ni swilaveko swa moya.

² Tibroxara Leti Nga Ta Fambisiwa: Laha hansi u ta kuma nxaxamelo wa swiringanyeto leswi nga ku pfunaka eku fambiseni ka tibroxara to karhi. Xiringanyeto xin’wana ni xin’wana xi katsa (1) xivutiso lexi tlhontlhaka mianakanyo leswaku u sungula bulo, (2) nhlamuselo ya laha tinhla leti u vulavulaka ha tona u nga ti kumaka kona eka broxara ni (3) tsalwa leri faneleke leri nga hlayiwaka hi nkarhi wa bulo. U nga ha vula marito ya wena n’wini loko u tsakela ku yisa bulo emahlweni, hi ku ya hi n’wangulo wa munhu. Eka vunyingi bya tibroxara leti, ku tshahiwe nkandziyiso lowu hundzeke wa Vutirheli Bya Hina Bya Mfumo laha u nga ta kuma xingheniso lexi nga ni vuxokoxoko xa broxara ya kona.

Xana Xikwembu Xa Hi Khathalela Hakunene?

Xana u ehleketa leswaku hi wihi ntshembo lowu nga kona wa vanhu lava xanisiweke?—Matluka 27-8, tindzimana 23-7; Esa. 65:17, 18; km-TS 7/97 tl. 4.

Xana Xikongomelo Xa Vutomi I Yini—U Nga Xi Kumisa Ku Yini?

Ha yini vanhu vo tarisa xileswi namuntlha va vonaka va nga enerisiwi hi vutomi bya vona?—Matluka 29-30, tindzimana 2, 25-6; Ps. 145:16; km-TS 7/96 tl. 4.

Tsakela Vutomi eMisaveni Hi Masiku!

Xana u tshama u tivutisa leswaku Yesu Kreste u endla yini sweswi?— Swifaniso 41-2; Nhlav. 11:15; km-TS 8/96 tl. 8.

Hulumendhe Leyi Nga Ta Tisa Paradeyisi.

Xana u nga tsakela ku tiva hi ta Mfumo lowu Yesu a hi dyondziseke ku wu khongelela?—Tluka 3; Mat. 6:9, 10; km-TS 8/96 tl. 8.

Loko U Feriwa Hi Loyi U N’wi Rhandzaka.

Xana u tshama u tivutisa leswaku u nga n’wi chavelela njhani munhu la feriweke hi loyi a n’wi rhandzaka?—Tluka 26, tindzimana 2-5; Yoh. 5:28, 29; km-TS 7/97 tl. 4.

Xana U Fanele Ku Pfumela Eka Vunharhu-un’we?

Xana ku twisisa ka hina muxaka lowu Xikwembu xi nga wona hakunene i swa nkoka eka vumundzuku bya hina?—Tluka 3, tindzimana 3, 7-8; Yoh. 17:3.

³ Tibroxara Tin’wana: Xiengetelo xa Vutirheli Bya Hina Bya Mfumo bya February 1998 xi xaxamete tibuku tin’wana, leti katsaka tibroxara, leti endleriweke ngopfu-ngopfu ku nyikela vumbhoni eka Mabudha, Mahindu, Mamoslem ni Vayuda. Kun’wana ni kun’wana laha swi faneleke, tibroxara leti ti nga ha fambiseriwa vanhu lava hi hlanganaka na vona. U nga pfuxeta swingheniso leswi nga eka matluka 4-6 ya xiengetelo xexo kun’we ni matluka 21-4 ebukwini leyi nge Ku Hlamulana ivi u endla swingheniso swo koma leswi nga endlaka leswaku vanhu lava va tsakela.

⁴ Ku lunghiseleriwe broxara yin’wana leswaku ku pfuniwa vanhu lava nga ha vaka va dyondzekile kambe va nga tivi swo tala hi Bibele. Yi endleriwe ku va susumetela ku kambisisa Rito ra Xikwembu. Laha swi faneleke, u nga ha hlawula ku fambisa leti landzelaka:

Buku Ya Vanhu Hinkwavo.

Xana wa pfumela leswaku ku va ni dyondzo leyi ringaneleke swi katsa ni ku kuma vutivi byo karhi bya leswi Bibele yi swi dyondzisaka?—Tluka 3, tindzimana 1-3 na tluka 30, ndzimana 2; Ekl. 12:9, 10.

⁵ Broxara Yo Dyondza Bibele: Xikongomelo xa hina evutirhelini ku fanele ku va ku sungula dyondzo ya Bibele, ku nga ha va eka riendzo ro sungula kumbe eka maendzo yo vuyela lama landzelelanaka. Hikwalaho ka xikongomelo lexi, hi ni broxara leyi landzelaka leyi swi olovaka ku yi tirhisa eku sunguleni ni le ku fambiseni ka tidyondzo ta le kaya ta Bibele:

I Yini Leswi Xikwembu Xi Swi Languteleke Eka Hina?

Xana a wu swi tiva leswaku hi xinkarhana xo ringana timinete ta 30 kumbe ta le hansi hi vhiki ku ringana mavhiki ya 16, u nga kuma ku twisisa ka xisekelo ka Bibele?—Dyondzo 2, ndzimana 6; 2 Tim. 3:16, 17; km-TS 3/97 tl. 4.

⁶ Exifanisweni xa Yesu xa Musamariya wa muakelani, u swi veke erivaleni leswaku muakelani wa xiviri hi loyi a kombisaka rirhandzu ni musa leswaku a pfuna van’wana lava nga emaxangwini. (Luka 10:27-37) Vaakelani va hina va le maxangwini hi tlhelo ra moya. Va fanele va ma twa mahungu lamanene. A hi byarheni vutihlamuleri bya ku va tivisa hi ta wona, xisweswo hi tikombisa hi ri vadyondzisiwa va xiviri va Yesu Kreste.—Mat. 24:14; Gal. 5:14.