Ku Lavisisa Lava Tsakelaka Hi Ku Fambisa Tibroxara
1 Tibroxara i switirho swa matimba swinene. Hi matluka ya 32 ntsena, broxara yi nga andlala ntiyiso wa Matsalwa ni ku hundzula mianakanyo ni tidyondzo leti nga fambisaniki ni vutivi bya Xikwembu.—2 Kor. 10:5.
2 Endzhaku ko hlaya broxara leyi nge Timbhoni ta Yehovha Ti Endla Ku Rhandza Ka Xikwembu Hi Vun’we eMisaveni Hinkwayo, wanuna un’wana u susumeteleke ku tsala a ku: “A ndzi si tshama ndzi yi vona nhlengeletano yo tano. . . . Swa tsakisa ku kuma vanhu lava xiximaka ku rhandza ka Xikwembu eka nguva leyi yi nga ni vukanganyisi byo tala bya vukhongeri.” N’anga yin’wana ya le Afrika yi dyondze broxara leyi nge Tsakela Vutomi eMisaveni Hi Masiku! Xana yi n’wi khumbise ku yini? U tshike vun’anga byakwe ivi a hlongola vavasati lava a a tshama na vona, ku sala nsati lonkulu. Kutani a n’wi teka hi nawu.
3 Broxara leyi nge Xana U Fanele Ku Pfumela Eka Vunharhu-un’we? i xitirho xa ntiyiso lexi tsariweke kahle, lexi ringaniselaka ni lexi humelelaka. Loko a hlamusela ha xona, mutsari wa swa vukhongeri wa The Sunday Gleaner le Jamaica, West Indies, u te: “Broxara leyi . . . i tlhari lerikulu ra Timbhoni naswona sweswi ku hava mupfumeri wa Vunharhu-un’we—kumbe vumbirhi-un’we—la nga langutanaka na rona. Xibukwana lexi xi tele hi mintshaho ya matimu ni ya vukhongeri ku kombisa leswaku dyondzo ya Vunharhu-un’we a yi tekiwanga eBibeleni. . . . Swi nonon’hwa ngopfu eka mutsari loyi wa vukhongeri ku vona ndlela leyi xirho lexi tolovelekeke—kumbe lexi nga ni xikhundla ekerekeni—xi nga ti hlamulaka ha yona timhaka leti ta matimba, to nonon’hwa leti hlamuseriwaka hi Timbhoni, ku kaneta mavonelo ya leswaku Yesu i Xikwembu.”
4 Ti Tirhise Kahle: Hi fanele hi tikarhatela ku fambisa switirho leswi swi humelelaka, swo saseka ni leswi dyondzisaka eka vanhu vo tala hi laha swi kotekaka ha kona ensin’wini ya ka hina. Tanihi leswi hi nga ni tibroxara to hambana-hambana, yin’wana ni yin’wana yi hlamusela xihloko xo karhi, hi fanele hi tiyimisela ku fambisa leyi hi vonaka yi fanela swinene eka munhu loyi hi vekaka vumbhoni eka yena. Ku tiva tibroxara ta hina ni ku va na tona hi ku hambana-hambana swi hi olovisela ku ti tirhisa kahle, entirhweni wa nsimu, ekaya kumbe kun’wana.
5 Hi xikombiso, loko u vulavula ni munhu loyi a nga yi twisisiki dyondzo ya Vunharhu-un’we ya Vujagana kumbe loyi a anakanyaka leswaku Yesu i Xikwembu, u nga tirhisa broxara yihi? Loko un’wana a vutisa leswaku hikwalaho ka yini Xikwembu lexi nga ni rirhandzu xi pfumelela vubihi byo tarisa xileswi, hi yihi broxara leyi a yi ta pfuna? Loko munhu a vula leswaku ku laveka hulumendhe leyi fanelaka vanhu, xana a nga faneriwa hi broxara yihi?
6 Loko u tiva leswaku u ta tirhisa broxara yihi, lwela ku pfuxa ku tsakela ka munhu yoloye hi leswi yi swi tameleke. Loko swiyimo swi pfumela, kombisa nhlamuselo kumbe xifaniso lexi xi nga ha pfuxaka ku tsakela kakwe leswaku a hlaya mhaka ya kona. Kumbexana u nga hlaya na yena ndzimana yin’we kumbe timbirhi, u pfula matsalwa lama kombisiweke ivi mi bula hi mhaka ya kona. Ku ni tidyondzo to tala ta Bibele leti sunguriweke hi ndlela leyi.
7 Tibroxara ta hina ti nyika tinhlamulo leti humaka eMatsalweni naswona ti nyika ntshembo eka lava konyaka ni ku kolola hikwalaho ka manyala hinkwawo lama endliwaka emisaveni. (Ringanisa Ezekiyele 9:4.) Vanhu lava fanaka ni tinyimpfu va amukela rungula leri tameriweke hi tibroxara to tano. I lunghelo ra hina ku tirhisa kahle tibroxara eka swiphemu hinkwaswo swa vutirheli bya hina loko hi ri karhi hi lavisisa lava tsakelaka.