Ku Sungula Tidyondzo Ta Bibele Hi Buku Leyi Nge Nghwazi
1 Ku va ni dyondzo ya le kaya ya Bibele swa tsakisa swinene eka wena ni n’wini wa muti. Ku hava lexi xi nga ringanisiwaka ni ntsako wo avelana ni van’wana vutivi bya Bibele.—Swiv. 11:25.
2 Xikombiso Xa Masiku Ya Makumu: Loko u tirhise xiringanyeto lexi eka xihloko lexi nga la henhla naswona u sungule bulo ra wena hi xiphephana lexi nge Xana Misava Leyi Yi Ta Pona?, sweswi u nga yi sungula njhani dyondzo u tirhisa ndzima 111 ya buku leyi nge Nghwazi? Pfula buku eka ndzima 111, ivi u hlaya tindzimana tinharhu to sungula. Kutani u nga ha vutisa xivutiso xo sungula eku heleni ka ndzima: “I yini lexi susumetelaka xivutiso xa vaapostola, kambe i yini xin’wana lexi entiyisweni va nga na xona emianakanyweni ya vona?” Pfuna n’wini wa muti ku ehleketa hi nhlamulo naswona u dyondzisa hi ku tirhisa xikombiso. Endzhaku ko hlaya ndzimana ya vumune ku ya eka ya vutsevu, vutisa xivutiso xa vumbirhi: “I xiyenge xihi xa vuprofeta bya Yesu lexi hetisekaka hi 70 C.E., kambe i yini lexi nga humeleriki enkarhini wolowo?” Loko n’wini wa muti a vonaka a tsakela naswona a ri ni nkarhi, yisa bulo ra wena emahlweni.
3 Loko swi tikomba onge nkarhi wun’wana wu nga ha va wunene eka n’wini wa muti, u nga ha vutisa: “Xana u nga swi tsakela ku tiva leswaku ku hela ka mafambiselo lawa ya swilo ku ta va rini?” Kutani u nga ha hlela ku vuya u ta hlamula xivutiso lexi.
4 Xana Misava Ya Ku Rhula Yi Nga Va Kona? Loko u tirhise xiphephana lexi nge Vutomi eMisaveni Leyintshwa Ya Ku Rhula leswaku xi ku yisa ebukwini leyi nge Nghwazi, xana ndzima 133 yi nga pfuna njhani ku sungula dyondzo ya Bibele?
Endzhaku ko hlaya 2 Petro 3:13, u nga ha hlaya kumbe u katsakanya ndzimana ya vumbirhi eka tluka 3 ra xiphephana ivi u ku:
◼ “Yesu Kreste, N’wana wa Xikwembu, u ta va Hosi ya Mfumo wa Yehovha. Vona ndlela leyi buku leyi nge Nghwazi Leyi Tshameke Yi Hanya yi hlamuselaka Yesu ha yona ni ku hi tivisa leswi a nga ta swi endla enkarhini lowu taka.” Kutani hlaya ndzima hinkwayo. Vutisa n’wini wa muti xivutiso xo sungula eku heleni ka ndzima: “‘Ri ta va rihi lunghelo ro tsakisa ra vaponi va Armagedoni ni vana va vona?’ [Yimela nhlamulo. Swivutiso leswin’wana swi nga ha hlamuseriwa hi laha ku fanaka.] Xana wa swi tsakela ku va xiphemu xa misava leyintshwa leyi Yesu a nga ta va Hosi ya yona, a yi fuma? Ndzi lava ku kuma nkarhi vhiki rin’wana ni rin’wana leswaku ndzi ku pfuna hi Bibele u vona leswaku leswi u nga swi kumisa ku yini.”
5 Vanhu van’wana va nga ha tsakela bulo leri engetelekeke hi Yesu Kreste eka riendzo leri.
U nga ha ku:
◼ “Eka buku leyi ku endliwe matshalatshala yo hlamusela vutomi bya Yesu bya la misaveni eka Tievhangeli ta mune. Xana u nga swi tsakela ku dyondza leswi engetelekeke hi vutomi bya Yesu emisaveni?” Loko n’wini wa muti a pfumela, mi nga ha bula hi masingita yo sungula ya Yesu, eka ndzima 15.
6 Va ha tele vanhu va timbilu letinene lava rhandzaka ku lulama ni lava va lavaka mintlhantlho ya swiphiqo leswi va langutanaka na swona. Hakunene, ku avelana ni van’wana tidyondzo ta Yesu Kreste hi dyondzo ya Bibele i matshalatshala lama vuyerisaka swinene.