Tirhisa Swiphephana Ku Vulavulela Buku Leyi Nge Nghwazi
1 Hi n’hweti ya June, hi ta va hi fambisa buku leyi nge Nghwazi Leyi Tshameke Yi Hanya. Vahuweleri vo tala va ta fambisa buku hi ku kongoma eka n’wini wa muti, kumbexana va tirhisa swiringanyeto swin’wana leswi nga eka Vutirheli Bya Hina Bya Mfumo bya August 1992. Ku tshinelela kun’wana ku nga ha endliwa hi ku tirhisa swin’wana swa swiphephana swa hina ku vulavulela nyiko leyi. Ha yini u nga ringeti xin’wana xa leswi landzelaka?
2 Xana Misava Leyi Yi Ta Pona? Swiphephana swi pfuna ngopfu eku sunguleni ka mabulo. Swi pfuna ku koka nyingiso wa n’wini wa muti hikuva swiphephana swi hlamusela tinhloko-mhaka ta nkoka leti ti va khumbaka.
Hi xikombiso u nga ha vula swo fana ni leswi:
◼ “Loko hi vulavula ni vanhu hi kume leswaku vo tala va karhatiwa hi . . . [hlawula xiendlakalo xa sweswinyana etimhakeni]. Swi tikomba onge swiyimo swa misava swi ya swi biha ngopfu. Van’wana va tivutisa loko misava leyi yi ta pona. Xana u titwisa ku yini hi sweswo? [Yimela n’wini wa muti a hlamula. Vanhu van’wana va ni langutelo lerinene.] Ndzi hlaye swin’wana leswi khutazaka leswi ndzi lavaka ku ku byela swona. Swi le ka xiphephana lexi. [Nyika n’wini wa muti xiphephana lexi nge Xana Misava Leyi Yi Ta Pona? na wena u khoma xa wena.] Vona ndlela leyi Yesu a profeteke leswaku . . . ” Hlaya ku sukela eka ndzimana leyi nga eka tluka 4 kumbe 5 leyi fambisanaka ni xiendlakalo xa sweswinyana lexi boxiweke exinghenisweni xa wena. Valavulela buku leyi nge Nghwazi. Loko yi vonaka yi faneleka, pfula eka rungula leri engetelekeke ra vuprofeta bya Yesu leri kombisiweke eka ndzima 111. U nga rivali ku tlakusa xivutiso xa mhaka yo bula ha yona loko u vuya.
3 Vutomi eMisaveni Leyintshwa Ya Ku Rhula: Xana ku hanya emisaveni ya ku rhula swi vula yini eka wena? Hi ntolovelo, vanhu va ehleketa hi swivono swo saseka swa milambu leyikulu ni minkova yo rhula, ni swiharhi swo xonga leswi hanyisanaka hi ku rhula. Lava va karhatiwaka hi swiyimo swa sweswi swa misava va nga ha kuma ntshembo wa misava leyintshwa ya ku rhula wu phyuphyisa swinene.
4 Xana u swi lunghekerile ku humesa xilo lexi phyuphyisaka ni lexinene, u xi nyika muakelani, vatirhi-kuloni ni lava u hlanganaka na vona eka yindlu na yindlu?
Loko u tirhisa xiphephana lexi nge “Vutomi eMisaveni Leyintshwa Ya Ku Rhula,” u nga ha vula swo fana ni leswi:
◼ “Xana u ehleketa leswaku swi ta kala swi koteka leswaku vanhu va hanya hi ku rhula hi laha swi kombisiweke ha kona eka xiphephana lexi? [Yimela n’wini wa muti a hlamula.] Languta eka xivulwa xo hetelela xa ndzimana yo sungula eka tluka 2. Xi vutisa xi ku: ‘Kambe i norho kumbe vunwa ntsena, ku tshemba leswaku swiyimo leswi swi ta va kona emisaveni?’ [Kutani u hlaya ndzimana leyi landzelaka exiphephanini.] Ku tshaha loku ka matilo lamantshwa ni misava leyintshwa ku huma eBibeleni, eka 2 Petro 3:13. Loko swi koteka leswaku u kuma Bibele ya wena, hi nga hlaya Pisalema 104:5 leswaku hi dyondza leswi engetelekeke hi vumundzuku bya misava.” Kumbe u nga ha hlaya ndzimana eBibeleni ya wena. Loko a tsakela, yisa bulo eka buku leyi nge Nghwazi, ndzima 133.
5 Ku fanele ku endliwa maendzo man’wana yo vuyela leswaku ku ‘cheletiwa’ mbewu leyi yi byariweke. (1 Kor. 3:6, 7) Xihloko lexi nga la hansi xi ringanyeta ndlela leyi dyondzo yi nga sunguriwaka ha yona hi buku leyi nge Nghwazi, eka riendzo ro sungula kumbe eka riendzo ro vuyela.