Hi Fanele Hi Vuyela Hi Ku Phindha-phindha
1 Xana u angule kahle loko munhu un’wana a vulavula na wena ro sungula hi mahungu lamanene? Loko swi nga ri tano, u fanele u tsaka hileswi Timbhoni ta Yehovha ti vuyeke hi ku phindha-phindha ku fikela loko u hetelele hi ku amukela dyondzo ya Bibele. I swinene leswaku u ehleketa hi sweswo loko mi tirha hi ku phindha-phindha nsimu leyi mi averiweke yona.
2 Vutomi bya vanhu bya cinca-cinca nkarhi na nkarhi. Va langutana ni swiphiqo kumbe swiyimo leswintshwa, va twa hi swiendlakalo leswi vavisaka endhawini yo karhi kumbe emisaveni, va va ni swiphiqo swa timali, va vabya kumbe ku feriwa endyangwini. Swilo sweswo swi nga va endla va lava ku tiva xivangelo xa maxangu lawa. Hi fanele hi xiya swilo leswi karhataka vanhu emiehleketweni, kutani hi va nyika rungula leri chavelelaka.
3 Lowu I Ntirho Wa Ku Ponisa: Ehleketa hi vatirhi va ku ponisa endhawini leyi weriweke hi mhangu. Hambiloko van’wana va nga va va lava endhawini leyi ku kumekaka vanhu va nga ri vangani lava poneke, a va heli matimba ivi va tshika hikwalaho ka leswi vatirhi-kulobye va kumaka vanhu vo tala lava poneke endhawini yin’wana. Ntirho wa hina wa ku ponisa a wu si hela. Lembe na lembe, ku kumeka vanhu va madzana ya magidi lava lavaka ku pona ‘nhlomulo lowukulu.’—Nhlav. 7:9, 14.
4 “Un’wana ni un’wana loyi a vitanaka vito ra Yehovha u ta ponisiwa.” (Rhom. 10:13-15) Marito lawa ma fanele ma kandziyisa xilaveko xa ku phikelela eku chumayeleni eka un’wana ni un’wana wa hina. Ku sukela loko nsimu ya hina yi sungula ku hlanganisiwa, vana va kurile naswona sweswi va tlharihile lerova va nga tiehleketela kahle malunghana ni vumundzuku bya vona ni xikongomelo xa vutomi. A hi swi tivi leswaku i mani loyi eku heteleleni a nga ta yingisa. (Ekl. 11:6) Vanhu vo tala lava eku sunguleni a va kaneta, sweswi va amukele ntiyiso. Ntirho wa hina a hi ku avanyisa vanhu, kambe i wa ku hambeta hi va nyika lunghelo ra ku yingisa ni ku ponisiwa emisaveni leyi ya khale. Hilaha vadyondzisiwa vo sungula va Yesu va endleke hakona, hi fanele hi ‘hambeta hi ya’ eka vanhu naswona hi ringeta ku va endla va tsakela rungula ra Mfumo.—Mat. 10:6, 7.
5 Mhaka ya leswaku nkarhi wa ha ri kona wa leswaku hi chumayela, i xikombiso xa tintswalo ta Yehovha. (2 Pet. 3:9) Loko hi ri karhi hi nyika van’wana nkarhi wa ku twa rungula hi ku phindha-phindha, hi kandziyisa rirhandzu ra Xikwembu, hi ndlela leyi, ha xi dzunisa.