Ku Tiyimisela Ka Hina—Ku Landzela Ndlela Ya Yehovha Ya Ku Hanya
1 Yinhla-nkulu ya Mintsombano ya “Ku Hanya Hi Ndlela Ya Xikwembu” a ku ri xiboho lexi amukeriweke eka nkulumo yo hetelela. Xi sungule hi marito lawa: “Hi . . . pfumela hi mbilu hinkwayo leswaku ndlela ya Xikwembu i ndlela yo hanya leyi nga leyinene eka hinkwato.” Tsundzuka tin’wana ta tinhla-nkulu ta xiboho xexo leti hi ti hlamuleke hi ku, “INA!”
2 Hi tiyimisele ku tshama hi basile emahlweni ka Yehovha, hi nga ri na xivati xa misava. Hi ta hambeta hi rhangisa ku rhandza ka Xikwembu evuton’wini bya hina. Hi ku tirhisa Rito ra xona, ku nga Bibele, tanihi nkongomiso wa hina, a hi nge hambukeli exineneni kumbe eximatsini, xisweswo hi ta va hi tiyisa leswaku ndlela ya Xikwembu i ndlela leyinene ngopfu ku tlula ndlela ya misava.
3 Hi ku angarhela misava yi honisa ndlela ya Xikwembu ya ku hanya naswona yi kuma vuyelo bya kona. (Yer. 10:23) Hikwalaho hi fanele hi hambeta hi dyondzisiwa hi Yehovha, Muleteri wa hina Lonkulu, la nge: “Ndlela hi leyi, fambani ha yona.” (Esa. 30:21) Ndlela ya ku hanya ya Yehovha, leyi andlariweke eMatsalweni, i ya risima hi matlhelo hinkwawo. Leswaku hi landzela ndlela leyi, i swa nkoka leswaku hi swi tirhisa hi xitalo hinkwaswo leswi Yehovha a hi dyondzisaka swona.
4 Ndlela Ya Yehovha Leyi Tlakukeke Yo Dyondzisa: Yehovha u hi dyondzisa xikongomelo xa xiviri xa vutomi ni ndlela ya ku hanya vutomi bya hina hilaha ku vuyerisaka. U hi dyondzisa ku antswisa ntikelo wa vutomi bya hina hi tlhelo ra mianakanyo, ra mahanyelo ni ra moya. U hi dyondzisa ku hanyisana hi ku rhula ni vamakwerhu, mindyangu ya hina ni vanhu-kulorhi. U endla tano hi ku tirhisa buku-mpfuno yakwe, ku nga Bibele, ni hi ku tirhisa nhlengeletano yakwe.
5 Minhlangano ya hina ya vandlha yi na mpfuno lowukulu emhakeni leyi. Hi ku va kona nkarhi na nkarhi ni ku hlanganyela eminhlanganweni hinkwayo ya ntlhanu, hi kuma ndzetelo lowukulu tanihi vatirheli va mahungu lamanene ni dyondzo leyinene ya hanyelo ra Vukreste. (2 Tim. 3:16, 17) Muleteri wa hina Lonkulu u hi nyika dyondzo leyi engetelekeke ya le tilweni etinhlengeletanweni ni le mintsombanweni. Hi fanele hi tivekela pakani ya ku nga lavi ku lahlekeriwa hi nhlangano kumbe nongonoko loko rihanyo ni swiyimo swa hina swi hi pfumelela ku va kona.
6 Onge hi nga hambeta hi yi landzela hi ku hiseka ndlela ya Xikwembu ya ku hanya emasikwini lama taka, hinkwaswo hi swi endlela ku dzunisa Yehovha ni leswaku hi ta vuyeriwa hilaha ku nga heriki!—Esa. 48:17.