Ku Lulamisiwa Ka Xilaveko Xa Tiawara Ta Maphayona

¹ Hinkwerhu ha swi tlangela ku va ni maphayona ya nkarhi hinkwawo ni ya nkarhinyana lama tikarhataka evandlheni. Hambi ku ri etindhawini leti nsimu yi nga yitsongo naswona yi tirhiwaka nkarhi na nkarhi, maphayona ma veke xikombiso lexinene hi ku hiseka ka wona entirhweni wa Mfumo. Ma khutaza vahuweleri hinkwavo leswaku va tshama va ri karhi va hisekela ku lava lava nga ni “mboyamelo lowunene.”—Mint. 13:48.

² Sosayiti yi xiye ku tikeriwa loku yaka emahlweni loku maphayona ma langutaneke na kona, ngopfu-ngopfu malunghana ni ku kuma ntirho wa ku tihanyisa wa nkarhinyana lowu nga ta ma pfumelela ku khathalela swilaveko swa wona hi mfanelo leswaku ma ta ya emahlweni ni ntirho wa nkarhi hinkwawo. Nakambe xiyimo xa namuntlha xa ikhonomi ematikweni yo tala xi endle leswaku swi va tikela swinene van’wana ku nghenela ntirho wa vuphayona hambiloko va swi lava hi mbilu hinkwayo. Etin’hwetini ta sweswinyana, swiyimo leswi ni swin’wana swi kambisisiwe hi vukheta.

³ Hikwalaho ka mhaka leyi nga laha henhla, Sosayiti yi hungute xilaveko xa tiawara ta maphayona ya nkarhi hinkwawo ni ya nkarhinyana. Ku sukela hi 1999, xilaveko xa maphayona ya nkarhi hinkwawo ku ta va 70 wa tiawara n’hweti na n’hweti kumbe ntsengo wa tiawara ta 840 hi lembe. Xilaveko xa n’hweti yin’wana ni yin’wana xa maphayona ya nkarhinyana ku ta va 50 wa tiawara. Xilaveko xa tiawara ta maphayona yo hlawuleka kun’we ni varhumiwa a xi cincanga, hikwalaho ka leswi Sosayiti yi va pfunaka ku khathalela swilaveko swa vona swa xisekelo. Xisweswo, va nga swi kota ku nyikela nkarhi lowu engetelekeke entirhweni wa vona wo chumayela ni ku endla vadyondzisiwa.

⁴ Ha tshemba leswaku ku lulamisiwa loku ka xilaveko xa tiawara ku ta pfuna maphayona lama engetelekeke ku ya emahlweni ni lunghelo leri ra risima ra ntirho. Nakambe ku ta tlhela ku pfulela vahuweleri vo tala ndlela ya ku nghenela ntirho wa vuphayona bya nkarhi hinkwawo ni bya nkarhinyana. Leswi swi fanele swi va nkateko lowukulu eka un’wana ni un’wana evandlheni!