Ndlela Leyi Swirho Swa Ndyangu Swi Nga Tirhisanaka Ha Yona Leswaku Swi Hlanganyela Hi Xitalo—Eminhlanganweni Ya Vandlha
1 Mindyangu ya Vukreste yi fanele yi yingisa xileriso xa ku hlengeletana kun’we eminhlanganweni ya vandlha. (Hev. 10:24, 25) Hi ku va ni ntirhisano, hinkwavo va nga swi kota ku lunghiselela, ku va kona ni ku hlanganyela eminhlanganweni. Swiyimo swa mindyangu swa hambana, kambe ku ni swilo leswi nuna wa Mukreste, nsati la nga mupfumeri kumbe mutswari la nga yexe a nga swi endlaka leswaku a tiyisa vun’we bya ndyangu etimhakeni ta swilo swa moya ku nga khathariseki nhlayo ya vana lava nga ekaya ni malembe ya vona.—Swiv. 1:8.
2 Tinyike Nkarhi Wa Ku Lunghiselela: Swirho swa ndyangu swa tirhisana emhakeni ya ku yi lunghiselela khwatsi minhlangano ya vandlha. Mindyangu yo tala yi dyondza xihloko xa vhiki na vhiki lexi dyondziwaka xa Xihondzo xo Rindza. Mindyangu yin’wana yi lunghiselela Dyondzo ya Buku ya Vandlha kumbe yi hlaya kun’we ku hlaya ka Bibele ka vhiki na vhiki. Xikongomelo i ku tiva tinhla-nkulu hi nga si ya eminhlanganweni. Hi ndlela leyi, hinkwavo va ta vuyeriwa swinene eka leswi dyondziwaka naswona va ta va va lunghekele ku hlanganyela loko nkarhi wu va pfulekela.—1 Tim. 4:15.
3 Tiyimisele Ku Hlanganyela: Un’wana ni un’wana endyangwini u fanele a va ni pakani ya ku phofula ntshembo wakwe eka van’wana hi ku hlamula eminhlanganweni. (Hev. 10:23) Xana xirho xin’wana xa ndyangu xi lava mpfuno kumbe xikhutazo leswaku xi endla tano? Xana hi wihi mpfuno lowu un’wana ni un’wana a wu lavaka eku lunghiseleleni ka swiavelo swa Xikolo xa Vutirheli bya le Tilweni? Vavasati va swi tsakela loko vanuna va vona va katseka naswona minkarhi yin’wana va va pfuna hi ku va nyika xifaniso lexi faneleke xa nkulumo kumbe ku yi hlela hi ndlela leyinene. A swi fanelanga leswaku vatswari va titwa va boheka ku lunghiselela vana va vona lava ha riki vatsongo tinkulumo. Ku endla tano swi nga ha endla leswaku vana va nga dyondzi ku tirhisa mianakanyo ya vona vini. Vatswari va nga pfuna vana va vona hi ku yingisela loko va ri karhi va hlaya swi twakala.—Ef. 6:4.
4 Lunghekela Ku Va Kona: Vana va nga dyondzisiwa va ha ri vatsongo leswaku va ambala ni ku lunghekela ku ya eminhlanganweni hi nkarhi lowu vekiweke. Swirho swa ndyangu swi fanele swi pfunana eka mintirho ya ndyangu leswaku swi nga hlweli.—Vona swiringanyeto leswi nga ebukwini leyi nge Ntsako eNdyangwini, matluka 112 ni leyi nge Vantshwa Va Vutisa, matluka 316-17.
5 Vatswari kun’we ni vana va nga anakanya hi marito ya Yoxuwa wa khale, loyi a vuleke a ku: “Loko nḍi ri mina ni yindlu ya mina, hi ta tirela Yehova.” Hikwalaho tiyimiseleni ku tirhisana leswaku mi ta hlanganyela hi xitalo eminhlanganweni ya vandlha.—Yox. 24:15.