Bokisi Ra Swivutiso

◼ Hi tihi tibuku leti hi faneleke hi ti dyondza ni vanhu lavantshwa loko va nga si khuvuriwa?

Munhu u fanele ku rhanga hi ku nghenisa vutivi lebyi kongomeke a nga si nyiketela vutomi byakwe eka Yehovha ni ku khuvuriwa. (Yoh. 17:3) Munhu loyi u ta kuma rungula leri lavekaka hi ku dyondza broxara leyi nge I Yini Leswi Xikwembu Xi Swi Languteleke Eka Hina? ni buku leyi nge Vutivi Lebyi Yisaka eVuton’wini Lebyi Nga Heriki. Hakanyingi ku ta rhanga ku dyondziwa broxara leyi nge Leswi Xi Swi Languteleke. Hambiswiritano, loko dyondzo yi sunguriwe hi buku leyi nge Vutivi, broxara leyi nge Leswi Xi Swi Languteleke yi fanele ku dyondziwa endzhaku ka loko ku hetiwe ku dyondza buku leyi. Ha yini leswi swi fanela?

Broxara leyi nge Leswi Xi Swi Languteleke yi ni nkatsakanyo wa tidyondzo ta xisekelo ta Bibele. Loko ku rhanga ku dyondziwa yona, yi ta pfuna xichudeni leswaku xi twisisa swilaveko swa xisekelo leswaku xi tsakisa Yehovha. Loko ku heteleriwa hi yona, ku ta va ku ri ndlela leyinene yo pfuxeta leswi dyondziweke ebukwini leyi nge Vutivi. Ku nga khathariseki leswaku mi rhanga hi yihi, khutaza xichudeni leswaku xi hlaya Matsalwa lama tiyisaka rungula ni ku va xi anakanyisisa ha wona. Tiyiseka leswaku u tirhisa ni swifaniso leswi kombisiweke tanihi leswi swi pfunaka swinene eku dyondziseni.—Vona Xihondzo xo Rindza xa January 15, 1997, matluka 16-17.

Loko xichudeni xa Bibele xi hete ku dyondza tibuku ha timbirhi, xi nga swi kota ku hlamula swivutiso hinkwaswo leswi vakulu va nga ta swi kambela na xona loko xi lunghiselela ku khuvuriwa. Loko ku endliwa sweswo, a swi nge he bohi leswaku ku fambisiwa dyondzo ya ximfumo ni xichudeni hi ku tirhisa buku yin’wana, kambe mudyondzisi wa xona u fanele a hambeta a xi pfuna swinene leswaku xi endla nhluvuko.—Vona Xihondzo xo Rindza xa January 15, 1996, matluka 14, 17.