Nongonoko Lowuntshwa Wa Siku Ra Nhlengeletano Yo Hlawuleka — Watchtower LAYIBURARI YA LE KA WEB SITE

Nongonoko Lowuntshwa Wa Siku Ra Nhlengeletano Yo Hlawuleka

Nongonoko wa siku ra nhlengeletano yo hlawuleka lowu nga ta sungula hi September 1999, wu ni nhloko-mhaka leyi nge: “Ku Kambisisa Swilo Leswi Enteke Swa Xikwembu.” (1 Kor. 2:10) Hi swihi swilo swa risima leswi hi nga ta swi dyondza?

Loko vanhu va ri karhi va hlota vutivi, vo tala a va tsakisiwi hi leswi va swi kumaka. Bibele ya hi phyuphyisa, hilaha mulanguteri wa xifundza a nga ta yi andlala hakona mhaka leyi eka nkulumo leyi nga ni xihloko lexi nge “Swa Phyuphyisa Ku Kambisisa Rito Ra Xikwembu.” Xivulavuri lexi endzeke xi ta kombisa ndlela leyi ku kambisisa swilo leswi enteke swa Xikwembu swi fambisanaka ha yona ni ku chumayela mahungu lamanene loko xi nyikela nkulumo leyi nge “Xana U Ku Languta Njhani Ku Chumayela Hi Mfumo?”

Xana vatswari va nga va pfuna njhani vana va vona leswaku va dzika loko va kambisisa Rito ra Xikwembu? Ku ta nyikeriwa swiringanyeto leswi tirhaka eka nkulumo leyi nge “Dyondzisa Vana Va Wena Rito Ra Xikwembu.” Vantshwa lava nga Vakreste va pfuneka swinene hi ku tolovelana ni vanhu lava wupfeke emoyeni lava nga kona evandlheni. Eka nkulumo leyi nge “Vantshwa Lava Dyondzaka Eka Vanhu Lavakulu,” ku ta nyikeriwa swikombiso leswi kombaka ndlela leyi vantshwa va pfunekaka ha yona.

Hikwalaho ka yini hi fanele hi hisekela ku lavisisa xuma xa moya lexi fihliweke enkarhini lowu? Yehovha i Muhlavuteri wa swihundla. Xivulavuri lexi endzeke xi ta hlamusela leswi Yehovha a swi paluxeke eminkarhini ya khale ni ya manguva lawa eka nkulumo leyi nge “Yehovha U Hambeta A Hlavutela Swilo Leswi Enteke.” Leswi swi ta tiyisa ku tiyimisela ka hina ku ya emahlweni hi “kambisisa swilo leswi enteke swa Xikwembu.”

Sungula sweswi ku endla malunghiselelo ya ku va kona. Lava va navelaka ku kombisa ku tinyiketela ka vona eka Yehovha hi nkhuvulo, hi ku hatlisa va fanele va tivisa mulanguteri la ungamelaka. Ku navela ka hina ku dzika eRitweni ra Xikwembu ku ta kurisiwa hi leswi hi nga ta swi twa. Kutani ke, u nga lahlekeriwi hi siku leri ro hlawuleka ra ku leteriwa hi tlhelo ra moya!