Ku Chumayela Mahungu Lamanene Hi Ku Khorwiseka Loku Tiyeke

¹ Eku sunguleni ka lembe-xidzana ro sungula, Yesu Kreste u lerise valandzeri vakwe leswaku va chumayela mahungu lamanene ya Mfumo ni ku “endla vanhu va matiko hinkwawo va va vadyondzisiwa.” (Mat. 24:14; 28:19, 20) Timbhoni ta Yehovha ti yingise xileriso xakwe hi tindleve timbirhi, lerova eku heleni ka lembe-xidzana ra vu-20, nhlayo ya vadyondzisiwa lava nga Vakreste ematikweni ya 234, yi ndlandlamukile yi tlula nhlayo ya 5 900 000. Vona ndlela leyi Tata wa hina wa le tilweni a dzunisiweke ha yona!

² Se hi sungule lembe-xidzana ra vu-21. Nala wa hina u ringeta hi mano leswaku a kavanyeta ntirho wa hina lowukulu wa ku chumayela hi Mfumo ni ku endla vanhu vadyondzisiwa. U tirhisa mintshikilelo ya mafambiselo lawa ya swilo leswaku a hi hambukisa, a dya nkarhi wa hina, ni ku heta ntamu wa hina hi swilo swo tala leswi nga nyawuriki. Ematshan’weni yo pfumelela mafambiselo lawa ma hi hlawulela leswi nga swa nkoka evuton’wini, Rito ra Xikwembu hi rona ri hi kombisaka nchumu wa nkoka hakunene—ku endla ku rhandza ka Yehovha. (Rhom. 12:2) Sweswo swi vula leswaku hi fanele hi yingisa xikhutazo xa Matsalwa xa ku ‘chumayela rito hi nguva leyinene ni hi nguva ya ku karhateka, hi hetisisa vutirheli bya hina hi xitalo.’—2 Tim. 4:2, 5.

³ Hlakulela Ku Khorwiseka Loku Tiyeke: Vakreste va fanele va “yima [va] hetiseka naswona [va] va ni ku khorwiseka loku tiyeke hi ku rhandza ka Xikwembu hinkwako.” (Kol. 4:12) Rito leri nge “ku khorwiseka” ri hlamuseriwa tanihi ku “kholwa eka swo karhi kumbe eka dyondzo yo karhi; kumbe ku va la khorwisiweke.” Leswi hi nga Vakreste hi fanele hi kholwa leswaku rito ra Xikwembu ra vuprofeta ri ta hetiseka ni leswaku sweswi hi nghene hi vuenti enkarhini lowu wa makumu. Hi fanele hi va ni ripfumelo leri tiyeke ku fana ni ra muapostola Pawulo, loyi a vuleke leswaku mahungu lamanene “i matimba ya Xikwembu ya ku ponisa un’wana ni un’wana la nga ni ripfumelo.”—Rhom. 1:16.

⁴ Diyavulosi u tirhisa vanhu vo homboloka ni vaxisi lava na vona va kanganyisiwaka, leswaku va kucetela ni ku hambukisa van’wana. (2 Tim. 3:13) Hikwalaho ka leswi hi tivisiweke xiyimo lexi ka ha ri emahlweni, hi teka magoza ya ku tiyisa ku khorwiseka ka hina leswaku hi ni ntiyiso. Ematshan’weni ya ku pfumelela mivilelo ya swa vutomi yi herisa ku hiseka ka hina, hi hambeta hi rhangisa swilaveko swa Mfumo. (Mat. 6:33, 34) A hi fanelanga hi rivala leswaku hi hanya eminkarhini leyi nga ni khombo, a hi fanelanga hi anakanya ni leswaku makumu ya mafambiselo lawa ya swilo ma ha ri ekule swinene. Ma kwala nyongeni. (1 Pet. 4:7) Hambiloko hi anakanya leswaku ku twarisiwa ka mahungu lamanene a ka ha humeleli swinene ematikweni man’wana hikwalaho ka vumbhoni lebyi ana se byi nyikeriweke, ntirho wa ku lemukisa vanhu wu fanele wu ya emahlweni.—Ezek. 33:7-9.

⁵ Hi leswi swivutiso-nkulu swa nkarhi lowu wa makumu: ‘Xana ndzi xi teka xi ri xa nkoka xileriso xa Yesu xa ku endla vanhu vadyondzisiwa? Loko ndzi chumayela mahungu lamanene, xana ndzi kombisa ku khorwiseka loku tiyeke ka leswaku Mfumo i wa xiviri? Xana ndzi tiyimisele ku hoxa xandla swinene hilaha ndzi nga kotaka hakona entirhweni lowu lowu ponisaka vutomi?’ Hi ku xiya mpfhuka lowu hi wu fambeke enkarhini lowu wa makumu, hi fanele hi nyikela nyingiso eka hina vini ni le ntirhweni wa hina wo chumayela ni wa ku dyondzisa. Ku endla tano swi ta hi ponisa kun’we ni lava hi yingisaka. (1 Tim. 4:16) Xana hinkwerhu ka hina hi nga ku tiyisa njhani ku khorwiseka ka hina tanihi vatirheli?

⁶ Tekelela Vatesalonika: Muapostola Pawulo, loko a tsundzuka ku hiseka ka vamakwerhu va le Tesalonika, u va byele marito lawa: “Mahungu lamanene lawa hi ma chumayelaka a ma humelelanga exikarhi ka n’wina hi ku vulavula ntsena kambe ni hi matimba ni moya lowo kwetsima ni ku khorwiseka lokukulu, tanihi leswi mi swi tivaka leswaku hi ve vanhu va muxaka muni eka n’wina hi swi endlela n’wina; naswona mi ve vatekeleri va hina ni va Hosi, hileswi mi amukeleke rito ehansi ka nhlomulo lowukulu hi ntsako wa moya lowo kwetsima.” (1 Tes. 1:5, 6) Ina, Pawulo u bumabumele vandlha ra le Tesalonika hikwalaho ka leswi ri chumayeleke hi ku hiseka ni hi ku khorwiseka lokukulu hambiloko ku ri ni maxangu yo tala lawa a ri langutane na wona. I yini leswi swi ri pfuneke ku endla tano? Leswi swi vangiwe ngopfu hi leswi ri voneke ku hiseka ni ku khorwiseka ka muapostola Pawulo ni vatirhi-kulobye, kutani sweswo swi ri pfunile swinene. Hi ndlela yihi?

⁷ Vutomi bya Pawulo ni vanghana vakwe lava a a famba-famba na vona, byi kombise leswaku a va ri ni moya wa Xikwembu ni leswaku hi mbilu hinkwayo a va swi kholwa leswi a va swi chumayela. Loko va nga si ya eTesalonika, Pawulo na Silasi va khomiwe hi ndlela yo biha eFilipiya. Va nga si tengisiwa, va biwile va tlhela va boheleriwa hi tingole. Hambiswiritano, xiyimo lexi a xi ku herisanga ku hisekela ka vona ku twarisa mahungu lamanene. Ku nghenelela ka Xikwembu ku endle leswaku va ntshunxiwa naswona ku endle leswaku mulanguteri wa khotso ni ndyangu wakwe va hundzuka, ivi ku pfulela vamakwerhu lava ndlela ya leswaku va ya emahlweni ni vutirheli bya vona.—Mint. 16:19-34.

⁸ Hi ku pfuniwa hi moya lowo kwetsima wa Xikwembu, Pawulo u ye eTesalonika. Loko a ri emutini lowu, u tirhe hi matimba leswaku a kuma swa ku tihanyisa naswona u tlhele a tikarhatela ku dyondzisa Vatesalonika ntiyiso. A a twarisa mahungu lamanene nkarhi wun’wana ni wun’wana. (1 Tes. 2:9) Ku chumayela ka Pawulo hi ku khorwiseka loku tiyeke a ku ri ni matimba swinene eka vanhu va ndhawu leyi lerova van’wana va tshike mikhuva ya vona ya khale ya ku gandzela swifaniso swa hava naswona va hundzuke malandza ya Xikwembu xa ntiyiso, Yehovha.—1 Tes. 1:8-10.

⁹ Nxaniso a wu va sivelanga vapfumeri lavantshwa ku chumayela mahungu lamanene. Hi ku susumetiwa hi ripfumelo ra vona lerintshwa ni hikwalaho ka leswi a va kholwa leswaku mikateko leyi nga heriki yi ta va ya vona, Vatesalonika va susumeteleke ku twarisa ntiyiso lowu va wu amukeleke hi ku hiseka. A va hiseka swinene lerova ripfumelo ni ku hiseka ka swirho swa vandlha leri, ku endle leswaku mahungu lamanene ma hangalaka etindhawini tin’wana ta Makedoniya hambi ku ri ku ya fika eAkaya. Hikwalaho, loko Pawulo a tsalela Vatesalonika papila rakwe ro sungula, ana se a va dumile hi mintirho ya vona leyinene. (1 Tes. 1:7) Mayana xikombiso lexinene swonghasi!

¹⁰ Ku Susumetiwa Hi Ku Rhandza Xikwembu Ni Vanhu: Ku fana ni Vatesalonika, xana hina hi nga endlisa ku yini hi hexe leswaku hi hambeta hi khorwiseka swinene loko hi chumayela mahungu lamanene namuntlha? Pawulo u tsarile mayelana na vona: “Minkarhi hinkwayo hi tsundzuka ntirho wa n’wina wo tshembeka ni ku tikarhata ka n’wina ka rirhandzu.” (1 Tes. 1:3) Swi le rivaleni leswaku a va rhandza Yehovha Xikwembu hi timbilu ta vona hinkwato ni vanhu lava va va chumayeleke. A ku ri rona rirhandzu leri leri susumeteleke Pawulo ni vanghana vakwe leswaku va nga hundziseli “mahungu lamanene ya Xikwembu ntsena [eka Vatesalonika] . . . , kambe ni mimoya-xiviri ya [vona].”—1 Tes. 2:8.

¹¹ Hilaha ku fanaka, ku rhandza ka hina Yehovha ni vanhu-kulorhi ku hi susumetela ku hlanganyela hi xitalo entirhweni wo chumayela lowu Xikwembu xi hi nyikeke wona leswaku hi wu endla. Hikwalaho ka leswi hi nga ni rirhandzu ro tano, ha swi vona leswaku i vutihlamuleri bya hina lebyi hi nyikiweke byona hi Xikwembu bya ku twarisa mahungu lamanene. Loko hi anakanyisisa kahle naswona hi tlangela leswi Yehovha a hi endleleke swona leswaku a hi kongomisa “evuton’wini bya xiviri,” hi susumetelaka ku byela van’wana ntiyiso wa risima lowu hi wu kholwaka hi timbilu ta hina hinkwato.—1 Tim. 6:19.

¹² Tanihi leswi hi endlaka ntirho wo chumayela hi ku hiseka, rirhandzu ra hina hi Yehovha ni vanhu ri fanele ri hambeta ri kula. Loko ri ya ri kula, hi ta susumeteleka ku engetela vutirheli bya hina bya yindlu ni yindlu ni ku tirhisa tindlela tin’wana leti ti nga kona ta ku nyikela vumbhoni. Hi ta tirhisa minkarhi ya ku nyikela vumbhoni bya xitshuketa eka vanghana ni maxaka, vaakelani ni lava hi tolovelaneke na vona. Hambiloko vanhu vo tala va nyenya mahungu lamanene lawa hi va byelaka wona niloko van’wana va ringeta ku kavanyeta ku twarisa ka hina rungula ra Mfumo, hina hi kuma ntsako. Ha yini? Hikuva ha swi tiva leswaku hi endla leswi hi swi kotaka leswaku hi nyikela vumbhoni ni ku pfuna vanhu leswaku va ponisiwa. Yehovha u ta katekisa matshalatshala ya hina ya ku lava vanhu va timbilu letinene. Hambiloko mintshikilelo ya vutomi yi hi hlasela hi matlhelo hinkwawo, niloko Sathana a lava ku hi tekela ntsako, ha swi kota ku ya emahlweni ni ku khorwiseka ka hina loku tiyeke ni ku hiseka ka hina eku twariseni ka vumbhoni eka van’wana. Loko hinkwerhu ka hina ho endla xiphemu xa hina, leswi swi ta endla leswaku hi va ni mavandlha yo tiya, lama hisekaka ku fana ni vandlha ra Tesalonika.

¹³ U Nga Lan’wi Loko U Ringiwa: Ku khorwiseka i ka nkoka loko hi langutana ni miringo yo hambana-hambana. (1 Pet. 1:6, 7) Yesu u swi veke erivaleni eka vadyondzisiwa vakwe leswaku loko va n’wi landzela, va “ta vengiwa hi matiko.” (Mat. 24:9) Leswi hi leswi swi humeleleke Pawulo na Silasi loko va ri eFilipiya. Rungula leri nga eka Mintirho ndzima 16 ri vula leswaku Pawulo na Silasi a va pfaleriwe ekhotsweni ra le xikarhi naswona a va boheleriwe hi tingole. Hi ntolovelo, khotso lerikulu a ri fana ni muako lowu nga ni kamara lerikulu endzeni leri a ri ri ni switokisi leswi a swi ri ni timboni ni tindhawu leti nghenisaka moya. Hambiswiritano, khotso ra le xikarhi a ri nga ri na tona timboni naswona moya lowu a wu nghena a wu nga nyawuli. Pawulo na Silasi va boheke ku tshama emunyameni, va dlawa hi ku hisa ni ku nun’hwa ka khotso rero ro nyenyetsa. Xana wa wu vona hi mahlo ya mianakanyo nhlomulo lowu va langutaneke na wona loko va boheleriwe hi tingole tiawara to tala, ni minhlana leyi nga ni mimpfembeti leyi pfempfaka ngati hikwalaho ko namuleriwa?

¹⁴ Ku nga khathariseki miringo leyi, Pawulo na Silasi va tshame va tshembekile. Va kombise ku khorwiseka loku humaka embilwini, loku ku va tiyiseke leswaku va tirhela Yehovha ku nga khathariseki ndzingo lowu a va langutane na wona. Ku khorwiseka ka vona ku kombisiwa hi ndzimana 25 ya ndzima 16, leyi vulaka leswaku Pawulo na Silasi a va “khongela ni ku vonga Xikwembu hi risimu.” Entiyisweni hambileswi a va ri ekhotsweni ra le xikarhi, etimbilwini ta vona a va tiyiseka swinene leswaku Xikwembu xa va amukela lerova va yimbelele va kala va twiwa hi vabohiwa lavan’wana! Hi fanele hi khorwiseka hi ndlela leyi fanaka ni leyi namuntlha, loko ripfumelo ra hina ri ringiwa.

¹⁵ Miringo leyi Diyavulosi a hi hlaselaka ha yona yi tele. Van’wana va xanisiwa hi mindyangu ya vona. Vunyingi bya vamakwerhu va hina byi langutana ni ku mangaleriwa eka valawuri. Hi nga ha langutana ni nkaneto wa vagwinehi. Ku ni swiphiqo swa timali kun’we ni ntshikilelo wa ku lava swa ku tihanyisa. Vantshwa va langutana ni ntshikilelo wa tintangha exikolweni. Xana hi nga langutana njhani ni miringo leyi hi ndlela leyi humelelaka? Xana i yini lexi lavekaka leswaku hi kombisa ku khorwiseka?

¹⁶ Xo sungula ni xa nkoka swinene i ku hlayisa vuxaka lebyikulu bya munhu hi yexe na Yehovha. Loko Pawulo na Silasi va ri ekhotsweni ra le xikarhi, a va nga tshameli ku rila hikwalaho ka swiphiqo leswi a va ri na swona kumbe ku tshamela ku tiputa vusiwana. Xikan’we-kan’we va vulavule ni Xikwembu hi xikhongelo va tlhela va xi dzunisa hi risimu. Ha yini? Hikwalaho ka leswi a va ri ni vuxaka lebyikulu ni Tata wa vona wa le tilweni. A va swi xiya leswaku a va xanisiwa hikwalaho ka ku yimela ku lulama naswona ku ponisiwa ka vona a ku titshege hi Yehovha.—Ps. 3:8.

¹⁷ Na hina namuntlha loko hi langutana ni miringo, hi fanele hi titshega hi Yehovha. Leswi hi nga Vakreste, Pawulo wa hi khutaza leswaku hi ‘tivisa Xikwembu swikombelo swa hina; kutani ku rhula ka Xikwembu loku tlulaka miehleketo hinkwayo ku ta rindza timbilu ta hina ni matimba ya hina ya mianakanyo.’ (Filp. 4:6, 7) Swi tiyisa nhlana swonghasi ku tiva leswaku Yehovha a nge swi pfumeleli leswaku hi langutana ni miringo hi ri hexe! (Esa. 41:10) Nkarhi hinkwawo u na hina ntsendze loko hi n’wi tirhela hi ku khorwiseka loku tiyeke.—Ps. 46:7.

¹⁸ Mpfuno wun’wana wa nkoka wa ku kombisa ku khorwiseka i ku tshama hi khomekile entirhweni wa Yehovha. (1 Kor. 15:58) Pawulo na Silasi va pfaleriwe ekhotsweni hikwalaho ka leswi a va khomekile hi ku chumayela mahungu lamanene. Xana va tshike ku chumayela hikwalaho ka miringo leyi a va langutane na yona? E-e, va hambete va chumayela hambi ku ri ekhotsweni naswona endzhaku ka ku ntshunxiwa ka vona, va kongome eTesalonika ivi va nghena emasinagogeni ya Vayuda leswaku va ‘kanerisana na vona hi Matsalwa.’ (Mint. 17:1-3) Loko hi tshemba Yehovha hi ku helela naswona hi kholwa leswaku hi tiva ntiyiso, ku hava lexi nga ta hi “hambanisa ni rirhandzu ra Xikwembu leri nga eka Kreste Yesu Hosi ya hina.”—Rhom. 8:35-39.

¹⁹ Swikombiso Swa Manguva Lawa Swa Ku Khorwiseka Loku Tiyeke: Ku ni vanhu vo tala lava nga swikombiso leswinene esikwini ra hina, lava ku fana na Pawulo na Silasi, va kombiseke ku khorwiseka loku tiyeke. Makwerhu un’wana la poneke ekampeni ya nxaniso ya Auschwitz, u hi chumbutela hi ta ripfumelo leri nga tsekatsekiki ni ku khorwiseka loku kombisiweke hi vamakwerhu van’wana lava a va ri ekampeni. Makwerhu loyi u ri: “Siku rin’wana loko ndzi ri karhi ndzi konanisiwa, mutirhela-mfumo un’wana u te eka mina a ndzi gwimbele swibakele. U te: ‘Xana hi ta endla yini hi n’wina vanhu ndzina? Hambiloko hi mi khoma, a mi vileli. Loko hi mi pfalela ekhotsweni, a mi karhateki nikatsongo. Loko hi mi yisa ekampeni ya nxaniso, a swi mi vavi. Loko hi mi gweva rifu, eka n’wina a swi vuli nchumu. Xana hi ta endla yini hi n’wina?’” Mayana ndlela leyi swi tiyisaka ripfumelo ha yona ku vona ripfumelo leri vamakwerhu va veke na rona ehansi ka swiyimo swo tano swo biha! Nkarhi ni nkarhi a va titshega hi Yehovha leswaku a va pfuna va tiyisela.

²⁰ Entiyisweni ha ku tsundzuka ku khorwiseka ka vamakwerhu vo tala loku va ku kombiseke loko va langutane ni ku vengana ka tinxaka loku ku veke kona emalembeni ya sweswinyana. Ku nga khathariseki leswi va tikumeke va ri eswiyin’weni leswi nga ni khombo, vamakwerhu lava nga ni vutihlamuleri va tiyimisele ku vona leswaku vamakwavo va khathaleriwa hi tlhelo ra moya. Hinkwavo va ye emahlweni hi ku tshembeka va ri ni ntshembo lowu tiyeke wa leswaku ‘tlhari rihi ni rihi leri nga ta endleriwa ku hlasela vona a ri nge humeleli.’—Esa. 54:17.

²¹ Vamakwerhu vo tala lava nga ni vanghana va vukati lava nga riki vapfumeri va kombisa ripfumelo leri tiyeke ni ku tiyisela. Makwerhu un’wana wa le Guadeloupe a a langutane ni nkaneto lowukulu wa nsati wakwe la nga riki mupfumeri. Leswaku a n’wi heta matimba lerova a nga yi eminhlanganweni ya Vukreste, nsati loyi a a nga n’wi swekeli swakudya kumbe ku n’wi hlantswela, a a nga n’wi ayineli hambi ku ri ku rhunga swiambalo swakwe. A ku hundza masiku yo tala nsati loyi a nga n’wi vulavurisi nuna wakwe. Hikwalaho ka leswi a a kombisa ku khorwiseka loku humaka embilwini eku tirheleni ka yena Yehovha ni ku vulavula na yena hi xikhongelo leswaku a kombela mpfuno, makwerhu loyi u swi kotile ku tiyisela. Ku fikela rini? U tiyisele malembe ya kwalomu ka 20—endzhaku ka malembe lawa, nsati wakwe u sungule ku kombisa ku hundzuka hakatsongo-tsongo. Eku heteleleni, u kume ntsako wa xiviri hikuva nsati wakwe u amukele ntshembo wa Mfumo wa Xikwembu.

²² Xo hetelela, a hi fanelanga hi rivala ku khorwiseka loku tiyeke ka vantshwa va hina lava yaka exikolweni siku na siku ivi va langutana ni ntshikilelo wa tintangha ni mintlhontlho yin’wana. Mayelana ni ntshikilelo wa ku lava ku fana ni vantshwa van’wana exikolweni, nhwanyana un’wana la nga Mbhoni u te: “Loko u ri exikolweni, lexi u khutaziwaka xona i ku xandzuka hi ndlela yo karhi. Vana va ku xixima swinene loko u endla swilo leswi fambisanaka ni ku xandzuka.” Vona ntshikilelo lowu vantshwa va hina va langutanaka na wona! Va fanele va tiyimisela ku lwisana ni miringo hi timbilu ta vona hinkwato.

²³ Vunyingi bya vantshwa va hina va byi hlayise kahle vutshembeki bya vona hambi va langutane ni miringo. Xikombiso xin’wana i xa muntshwa un’wana wa xisati wa le Furwa. Siku rin’wana endzhaku ka swakudya swa ninhlikanhi, vafana van’wana va ringete ku n’wi sindzisa leswaku a va tswontswa, u khongerile ivi a ala ni ku twa, hikwalaho vafana lava va n’wi tshikile. Endzhaku, un’wana wa vafana lava u ye eka yena ivi a vula leswaku u tsakisiwe hi xivindzi lexi a nga na xona. Muntshwa loyi u swi kotile ku nyikela vumbhoni hi ndlela leyinene malunghana ni Mfumo, u hlamusele mimpimanyeto leyi tlakukeke leyi Yehovha a yi vekeleke vanhu hinkwavo lava lavaka leswaku va kuma mikateko ya wona. Eka lembe rero, u tlhele a hlamusela tlilasi hinkwayo leswi a swi kholwaka.

²⁴ Mayana lunghelo ra risima swonghasi ku va hi hlayiwa exikarhi ka lava Yehovha a tsakelaka ku va tirhisa leswaku va vulavula hi ku khorwiseka loku tiyeke mayelana ni ku endla ku rhandza kakwe! (Kol. 4:12) Ku engetela kwalaho, hi ni lunghelo ra ku kombisa vutshembeki bya hina loko hi ri ehansi ka nxaniso lowu tisiwaka hi Nala wa hina la fanaka ni nghala, Sathana Diyavulosi. (1 Pet. 5:8, 9) U nga tshuki u rivala leswaku Yehovha u tirhisa rungula ra Mfumo leswaku a ta ponisa hina hi ri chumayelaka ni lava ri yingisaka. Onge swiboho swa hina leswi hi swi endlaka ni ndlela leyi hi hanyaka ha yona siku ni siku, swi nga kombisa leswaku hi rhangisa Mfumo. A hi hambeteni hi chumayela mahungu lamanene hi ku khorwiseka loku tiyeke!