Ku Dyondza Vuprofeta Bya Daniyele

¹ Ku sukela evhikini ra April 17, hi ta dyondza buku leyi nge Nyikela Nyingiso Eka Vuprofeta Bya Daniyele! eka Dyondzo ya Buku ya Vandlha. Vo tala ana se va yi hlayile buku leyi yo tsakisa swonghasi, kambe sweswi hi kume nkarhi wa ku tiphina hi ku yi dyondza hi ri ntlawa. Vahuweleri hinkwavo, lava tsakelaka ni vana, va rhambiwa, ina va khutaziwa ku va kona vhiki na vhiki eka dyondzo leyi yo dzika ya buku ya Bibele ya Daniyele.—Det. 31:12, 13.

² Xiyimiso Xa Dyondzo Ni Swiletelo: Xiyimiso lexi heleleke xa buku leyi nge Vuprofeta Bya Daniyele! xi le ka nkandziyiso lowu wa Vutirheli Bya Hina Bya Mfumo. Tiyiseka leswaku xi tshama xi ri kona ebukwini ya wena. Xiyimiso xi kombisa ndzima ni tindzimana leti nga ebukwini kun’we ni tindzimana ta Bibele leti humaka ebukwini ya Daniyele leti ku nga ta buriwa ha tona eka xiyenge xa vhiki rin’wana ni rin’wana. Tinhlamuselo ta le hansi ti kombisa ndlela leyi tidyondzo tin’wana leti nga ebukwini ti nga ta dyondziwa ha yona ni siku ra kona. Emakumu ka dyondzo yin’wana ni yin’wana ya vhiki, mufambisi u khutaziwa ku kambisisa ni ntlawa tindzimana to karhi ta Daniyele leti xaxametiweke eka xiyimiso xa vhiki rero. Loko nkarhi wu pfumela tindzimana ti nga hlayiwa ivi ti hlamuseriwa. Tindzimana tin’wana ta Bibele ti nga ha wela ni le ka vhiki leri landzelaka, hi ku va ti nghena ni le ka dyondzo leyi tlhandlamaka.

³ Yi Lunghiselele Kahle Dyondzo: Ku endliwe matshalatshala ya leswaku ku va ni nkarhi lowu eneleke vhiki ni vhiki leswaku ku buriwa hi dyondzo yo karhi ku nga tsutsumiwi. Ku ni tidyondzo tin’wana ta mune to koma. Hikwalaho, emakumu ka dyondzo ya vhiki ra June 5, mufambisi a nga ha katsa mpfuxeto wa Daniyele 2:1-40. Hi vhiki ra June 26, a nga ha pfuxeta Daniyele 3:1-30. Eka vhiki ra September 4 u ta katsa bulo ro tlhuvutsa swifaniso ni matsalwa lama nga eka tluka 139. Ku ta buriwa hi chati leyi nga eka matluka 188 na 189 eka dyondzo ya vhiki ra October 2.

⁴ Yi lunghiselele kahle dyondzo ya vhiki rin’wana ni rin’wana, u tlhela u tsakela ku hlanganyela eka yona. Tlangela lunghelo leri u nga na rona ro hlanganyela ni nhlengeletano ya Yehovha leyi vonakaka, u vuyeriwa hi vutlhari ni vutivi lebyi u nyikiwaka byona hi vatotiwa va yena vo tshembeka. (Dan. 12:3, 4) Khutaza van’wana hi musa leswaku va nga xwi eka dyondzo ya buku ya vhiki na vhiki. Onge hinkwerhu hi nga nyikela nyingiso eritweni ra Xikwembu ra vuprofeta leri hlavuteriweke hi ndlela yo hlamarisa ebukwini ya Daniyele.—Hev. 10:23-25; 2 Pet. 1:19.