Hi Ta Dyondza Buku Leyi Nge Ntsako eNdyangwini

Mi ta tsaka ku tiva leswaku ku sukela hi vhiki ra October 6, 1997, hi ta dyondza buku leyi nge Xihundla Xa Ntsako eNdyangwini eDyondzweni ya Buku ya Vandlha. A nga kona la nga lavaka ku lahlekeriwa hi lunghelo leri ra dyondzo ya ntlawa ra nkongomiso lowu pfunaka wa le Matsalweni wa vutomi bya ndyangu lowu tsakeke. Xiyimiso xa dyondzo leyi xi ta endla leswaku ku kambisisiwa ndzimana yin’wana ni yin’wana hi vukheta ni matsalwa ya Bibele lama nga ebukwini.

Ndzima hinkwayo yo sungula yi ta dyondziwa evhikini ro sungula ra dyondzo, tanihi leswi yi nga ni matsalwa ma nga ri mangani lama nga tshahiwangiki. Hikwalaho ka xivangelo lexi fanaka, ndzima 15 yi ta dyondziwa hinkwayo hi nkarhi wun’we. Hambiswiritano, tindzima letin’wana hinkwato ti ta avanyisiwa hi swiphemu swimbirhi, ku kambisisiwa hafu ya ndzima vhiki rin’wana ni rin’wana. Xisweswo, ku ta va ni nkarhi lowu eneleke wo hlaya ni ku hlamusela matsalwa lama kombisiweke kun’we ni ku kambisisa hi vukheta ku tirha ka matsalwa lama tshahiweke eka ndzimana yin’wana ni yin’wana.

Xiyenge xa nkoka xa dyondzo ku ta va ku burisana hi rungula leri nga ebokisini ro dyondzisa emakumu ka ndzima yin’wana ni yin’wana. Hikokwalaho, ku fanele ku va ni nkarhi lowu eneleke wo kambisisa swivutiso ni matsalwa lama kombisiweke lama nga ebokisini.

Vafambisi va Dyondzo ya Buku ya Vandlha va khutaziwa leswaku va yisa nyingiso wo hlawuleka eku lunghiseleleni ka vona dyondzo ni ku khutaza hinkwavo lava averiweke entlaweni wa vona, kun’we ni vanhu lavantshwa, leswaku va lunghiselela kahle, va va kona nkarhi na nkarhi naswona va hlanganyela.—om-TS 74-6.