Lunghekela Ku Dyondza Vuprofeta Bya Esaya!

¹ “Vagandzeri vo tshembeka va nga tiyiseka leswaku Yehovha . . . a nge pfumeli leswaku misava ya Sathana yi engeteleriwa siku rin’we eka lawa yi pimeriweke wona.” Wolawo i marito lama khutazaka swonghasi! Xana ma tshahiwe kwihi? Ma tshahiwe ebukwini leyi nge Vuprofeta Bya Esaya—I Rivoningo Eka Vanhu Hinkwavo I. Xana vuprofeta bya Esaya byi hi nyika xivangelo xa leswaku hi fikelela makumu yo tano lama tsakisaka? Ina! Ebukwini yoleyo ya Bibele, nhloko-mhaka ya ku ponisiwa yi kandziyisiwe swi twala ni hi ndlela leyi nga lo dlaa, erivaleni. (Esa. 25:9) Hi yona mhaka leyi swi nga ta hi tiyisa nhlana swinene ku dyondza xiyenge lexi xa Rito ra Xikwembu eDyondzweni ya Buku ya Vandlha. Xana hi ta va kona vhiki rin’wana ni rin’wana leswaku hi yi dyondza? Ha yini hi fanele ku va kona?

² Eka Esaya 30:20, Yehovha u vuriwa ‘Muleteri wa hina Lonkulu.’ Mukreste ha un’we u fanele ku rhiya ndleve loko Yehovha a vulavula na hina hi ku tirhisa Rito ra yena ni minkandziyiso leyi sekeriweke eBibeleni, leyi humesiwaka hi “hlonga ro tshembeka ni ro tlhariha.” (Mat. 24:45; Esa. 48:17, 18) Kunene u vulavula na hina hi buku leyi nge Vuprofeta Bya Esaya I. U nga endla yini leswaku u pfuneka swinene hi ku yi dyondza?

³ Lunghiselela Leswaku U Ta Hlanganyela: Vhiki rin’wana ni rin’wana vekela nkarhi lowu eneleke etlhelo wa ku lunghiselela dyondzo ya buku. Hlaya tindzimana hinkwato ta rungula leri nga ta dyondziwa. Anakanya hi xivutiso ha xin’we xa ndzimana yin’wana ni yin’wana. Fungha tinhlamulo ebukwini ya wena. Tindzimana leti tshahiweke eka Esaya ti tsariwe hi marito yo dzwihala. Ti hlaye hi vukheta. Matsalwa laman’wana lama nga tshahiwangiki, ma hlaye leswaku u vona ndlela leyi ma nghenaka ha yona eka rungula rero. Anakanyisisa hi leswi u swi dyondzaka. Kutani leswi u swi lunghiseleleke, swi hlamusele van’wana edyondzweni ya buku.

⁴ Makwerhu la fambisaka dyondzo ya buku u fanele ku pfuna vayingiseri hinkwavo leswaku va yi tirhisa kahle Bibele ni ku twisisa ndlela leyi rungula leri hlayiwaka ri tirhaka ha yona eka hina. Loko ku ri wena wo sungula ku hlamula, hlamula hi ku komisa naswona u ba nhloko ya mhaka. Loko un’wana se a hlamurile u nga ha ndlandlamuxa yinhla leyi ku buriwaka hi yona. Kumbexana u nga ha kombisa ndlela leyi tsalwa-nkulu ri seketelaka nhloko-mhaka ha yona. Ringeta ku hlamula hi marito ya wena naswona u tsakela ku hlanganyela ebulwini.

⁵ A hi hisekeleni ku ri kambisisa swin’we rungula ra risima leri nga ebukwini ya Esaya. Ri ta hi khutaza ku hanya siku ha rin’we hi ri karhi hi tsakile, loko ha ha langutele leswaku Yehovha a hi ponisa!—Esa. 30:18.